Yasa‘iyáh 47
47
1Ai kuṉwárí duḳhtar i Bábul, utar á, aur ḳhák par baiṭh; ai Kasdíoṉ kí duḳhtar tú betaḳht zamín par baiṭh; kyúṉki ab tú narmandám aur náznín na kahláegí. 2Chakkí le aur áṭá pís: apná niqáb utár aur dáman sameṭ le, ṭáṉgeṉ naṉgí karke nadiyoṉ ko ‘ubúr kar. 3Terá badan beparda kiyá jáegá, balki terá satr bhí dekhá jáegá: maiṉ badla lúṉgá, aur kisí par shafaqat na karúṉgá. 4Hamárá fidya denewále ká nám Rabb u’l afwáj, ya‘ní Isráíl ká Quddús hai. 5Ai Kasdíoṉ kí beṭí, chup hokar baiṭh, aur andhere meṉ dáḳhil ho: kyúṉki ab tú mamlukatoṉ kí ḳhátún na kahláegí. 6Maiṉ apne logoṉ par g̣azabnák húá, maiṉ ne apní mírás ko nápák kiyá, aur un ko tere háth meṉ sauṉp diyá: tú ne un par rahm na kiyá; tú ne búṛhoṉ par bhí apná bhárí júá rakkhá. 7Aur tú ne kahá bhí, ki Maiṉ abad tak ḳhátún baní rahúṉgí: so tú ne apne dil meṉ in bátoṉ ká ḳhayál na kiyá, aur in ke anjám ko na sochá.
8Pas ab yih bát sun, ai tú jo ‘ishrat meṉ g̣arq hai, jo beparwá rahtí hai, jo apne dil meṉ kahtí hai, ki Maiṉ húṉ, aur mere siwá koí nahíṉ; maiṉ bewa kí tarah na baiṭhúṉgí, aur na beaulád hone kí hálat se wáqif húṉgí: 9so nágahán ek hí din meṉ yih do musíbateṉ tujh par á paṛeṉgí, ya‘ní tú beaulád aur bewa ho jáegí: tere jádú kí ifrát aur tere sihr kí kasrat ke báwujúd yih musíbateṉ púre taur se tujh par á paṛeṉgí. 10Kyúṉki tú ne apní sharárat par bharosá kiyá; tú ne kahá, Mujhe koí nahíṉ dekhtá: terí hikmat aur terí dánish ne tujhe bahkáyá: aur tú ne apne dil meṉ kahá, Maiṉ hí húṉ aur mere siwá âur koí nahíṉ. 11Is liye tujh par musíbat á paṛegí, jis ká mantar tú nahíṉ jántí; aur aisí balá tujh par názil hogí, jis ko tú dúr na kar sakegí: yakáyak tabáhí tujh par áegí, jis kí tujh ko kuchh ḳhabar nahíṉ. 12Ab apná jádú aur apná sárá sihr jis kí tú ne bachpan hí se mashq kar rakkhí hai isti‘mál kar; sháyad tú un se nafa‘ páe, sháyad tú g̣álib áe. 13Tú apní mashwaratoṉ kí kasrat se thak gayí: ab aflákpaimá aur munajjim aur wuh jo máh ba máh áyanda hálát daryáft karte haiṉ, uṭheṉ, aur jo kuchh tujh par ánewálá hai, us se tujh ko bacháeṉ. 14Dekh, wuh bhúse kí mánind hoṉge; ág un ko jaláegí; wuh apne áp ko shu‘le kí shiddat se bachá na sakeṉge: yih ág na tápne ke angáre hogí, na us ke pás baiṭh sakeṉge. 15Jin ke liye tú ne mihnat kí tere liye aise hí hoṉge: jin ke sáth tú ne apní jawání hí se tijárat kí, un meṉ se har ek apní ráh legá; tujh ko bachánewálá koí na rahegá.
Currently Selected:
Yasa‘iyáh 47: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
