Yasa‘iyáh 46
46
1Bel jhuktá hai, Nabú ḳham hotá hai; un ke but jánwaroṉ aur chaupáyoṉ par lade haiṉ: jo chízeṉ tum uṭháe phirte the thake húe chaupáyoṉ par ladí haiṉ. 2Wuh jhukte aur báham ḳham hote haiṉ; wuh us bojh ko bachá na sake, aur wuh áp hí asírí meṉ chale gaye haiṉ.
3Ai Ya‘qúb ke gharáne, aur ai Isráíl ke ghar ke sab báqímánda logo, jin ko batn hí se maiṉ ne uṭháyá, aur jin ko rihm hí se maiṉ ne god meṉ liyá, merí suno: 4maiṉ tumháre buṛhápe tak wuhí húṉ, aur sarsafed hone tak tum ko uṭháe phirúṉgá: maiṉ hí ne ḳhalq kiyá, aur maiṉ hí uṭhátá rahúṉgá; maiṉ hí liye chalúṉgá, aur riháí dúṉgá. 5Tum mujhe kis se tashbíh doge, aur mujhe kis ke barábar ṭhahráoge, aur mujhe kis kí mánind kahoge, táki ham mushábih hoṉ? 6Jo thailí se báifrát soná nikálte aur chándí ko tarázú meṉ tolte haiṉ, wuh sunár ko ujrat par lagáte haiṉ, aur wuh us se ek but banátá hai; phir wuh us ke sámne jhukte, balki sijda karte haiṉ. 7Wuh use kandhe par uṭháte haiṉ, wuh use le jákar us kí jagah par nasb karte haiṉ, aur wuh khaṛá rahtá hai; wuh apní jagah se saraktá nahíṉ: balki agar koí use pukáre, to wuh na jawáb de saktá hai, aur na use musíbat se chhuṛá saktá hai.
8Ai gunahgáro, is ko yád rakkho, aur mard bano; is par phir socho. 9Pahlí bátoṉ ko jo qadím se haiṉ yád karo, ki maiṉ Ḳhudá húṉ, aur koí dúsrá nahíṉ: maiṉ Ḳhudá húṉ, aur mujh sá koí nahíṉ; 10jo ibtidá hí se anjám kí ḳhabar detá húṉ, aur aiyám i qadím se wuh báteṉ jo ab tak wuqú‘ meṉ nahíṉ áíṉ batátá húṉ; aur kahtá húṉ, ki Merí maslahat qáim rahegí, aur maiṉ apní marzí bi’lkull púrí karúṉgá: 11jo mashriq se ‘uqáb ko ya‘ní us shaḳhs ko jo mere iráde ko púrá karegá dúr ke mulk se bulátá húṉ; maiṉ hí ne yih kahá, aur maiṉ hí is ko wuqú‘ meṉ láúṉgá; maiṉ ne is ká iráda kiyá, aur maiṉ hí ise púrá karúṉgá. 12Ai saḳhtdilo, jo sadáqat se dúr ho, merí suno: 13maiṉ apní sadáqat ko nazdík látá húṉ, wuh dúr nahíṉ hogí, aur merí naját táḳhír na karegí; aur maiṉ Siyyún ko naját aur Isráíl ko apná jalál baḳhshúṉgá.
Currently Selected:
Yasa‘iyáh 46: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
