Yasa‘iyáh 45
45
1 Ḳhudáwand apne mamsúh Ḳhoras ke haqq meṉ yúṉ farmátá hai, ki Maiṉ ne us ká dahiná háth pakṛá, ki ummatoṉ ko us ke sámne zer karúṉ, aur bádsháhoṉ kí kamareṉ khulwá ḍálúṉ; aur darwázoṉ ko us ke liye khol dúṉ, aur pháṭak band na kiye jáeṉge; 2maiṉ tere áge áge chalúṉgá, aur náhamwár jagahoṉ ko hamwár baná dúṉgá: maiṉ pítal ke darwázoṉ ko ṭukṛe ṭukṛe karúṉgá, aur lohe ke beṉḍoṉ ko káṭ ḍálúṉgá: 3aur maiṉ zulmát ke ḳhazáne, aur poshída makánoṉ ke dafíne tujhe dúṉgá, táki tú jáne ki maiṉ Ḳhudáwand Isráíl ká Ḳhudá húṉ, jis ne tujhe nám lekar buláyá hai. 4Maiṉ ne apne ḳhádim Ya‘qúb, aur apne barguzída Isráíl kí ḳhátir tujhe nám lekar buláyá: maiṉ ne tujhe ek laqab baḳhshá, agarchi tú mujh ko nahíṉ jántá. 5Maiṉ hí Ḳhudáwand húṉ, âur koí nahíṉ; mere siwá koí Ḳhudá nahíṉ: maiṉ ne terí kamar báṉdhí, agarchi tú ne mujhe na pahcháná: 6táki mashriq se mag̣rib tak log ján leṉ, ki mere siwá koí nahíṉ: maiṉ hí Ḳhudáwand húṉ, mere siwá koí dúsrá nahíṉ. 7Maiṉ hí raushní ká mújid aur táríkí ká ḳháliq húṉ; maiṉ salámatí ká bání, aur balá ko paidá karnewálá húṉ; maiṉ hí Ḳhudáwand yih sab kuchh karnewálá húṉ.
8Ai ásmán, úpar se ṭapak paṛ; háṉ, bádal rastbází barsáeṉ: zamín khul jáe, aur naját aur sadáqat ká phal láe: wuh un ko ikaṭṭhe ugáe; maiṉ Ḳhudáwand us ká paidá karnewálá húṉ.
9Afsos us par jo apne ḳháliq se jhagaṛtá hai! Ṭhíkrá to zamín ke ṭhíkroṉ meṉ se hai! Kyá miṭṭí kumhár se kahe, ki Tú kyá banátá hai? kyá terí dastkárí kahe, Us ke to háth nahíṉ? 10Us par afsos, jo báp se kahe, Tú kis chíz ká wálid hai? aur máṉ se kahe, Tú kis chíz ki wálida hai? 11Ḳhudáwand Isráíl ká Quddús aur Ḳháliq yúṉ farmátá hai, ki Kyá tum ánewálí chízoṉ kí bábat mujh se púchhoge? kyá tum mere beṭoṉ yá merí dastkárí kí bábat mujhe hukm doge? 12Maiṉ ne zamín banáí, aur us par insán ko paidá kiyá: aur maiṉ hí ne, háṉ, mere háthoṉ ne ásmán ko táná, aur us ke sab lashkaroṉ par maiṉ ne hukm kiyá. 13Rabb u’l afwáj farmátá hai, Maiṉ ne us ko sadáqat meṉ barpá kiyá hai, aur maiṉ us kí tamám ráhoṉ ko hamwár karúṉgá: wuh merá shahr banáegá, aur mere asíroṉ ko bag̣air qímat aur ‘iwaz liye ázád kar degá.
14 Ḳhudáwand yúṉ farmátá hai, ki Misr kí daulat aur Kúsh kí tijárat, aur Sabá ke qaddáwar log tere pás áeṉge, aur tere hoṉge; wuh terí pairawí kareṉge; wuh beṛiyáṉ pahine húe apná mulk chhoṛkar áeṉge: aur tere huzúr sijda kareṉge, wuh terí minnat kareṉge, aur kaheṉge, Yaqínan Ḳhudá tujh meṉ hai; aur koí dúsrá nahíṉ, aur us ke siwá koí Ḳhudá nahíṉ. 15Ai Isráíl ke Ḳhudá, ai naját denewále, yaqínan tú poshída Ḳhudá hai. 16But banánewále sab ke sab pashemán aur sarásíma hoṉge; wuh sab ke sab sharminda hoṉge. 17Lekin Ḳhudáwand Isráíl ko bachákar abadí naját baḳhshegá: tum abadu’l ábád tak kabhí pashemán aur sarásíma na hoge.
18Kyúṉki Ḳhudáwand jis ne ásmán paidá kiye, wuhí Ḳhudá hai; usí ne zamín banáí aur taiyár kí; usí ne use qáim kiyá; us ne use ‘abas paidá nahíṉ kiyá, balki us ko ábádí ke liye árásta kiyá: wuh yúṉ farmátá hai, ki Maiṉ Ḳhudáwand húṉ; aur mere siwá âur koí nahíṉ. 19Maiṉ ne zamín kí kisí tárík jagah meṉ, poshídagí meṉ, to kalám nahíṉ kiyá: maiṉ ne Ya‘qúb kí nasl ko nahíṉ farmáyá, ki ‘Abas mere tálib ho: maiṉ Ḳhudáwand sach kahtá húṉ, aur rástí kí báteṉ bayán farmátá húṉ. 20Tum jo qaumoṉ meṉ se bach nikle ho, jama‘ hokar áo, milkar nazdík ho: wuh jo apní lakṛí kí khodí húí múrat liye phirte haiṉ, aur aise ma‘búd se jo bachá nahíṉ saktá du‘á karte haiṉ, dánish se ḳhálí haiṉ. 21Tum manádí karo, aur un ko nazdík láo; háṉ, wuh báham mashwarat kareṉ; kis ne qadím hí se yih záhir kiyá? kis ne qadím aiyám meṉ is kí ḳhabar pahle hí se dí hai? kyá maiṉ Ḳhudáwand hí ne yih nahíṉ kiyá? so mere siwá koí Ḳhudá nahíṉ hai; sádiqu’l qaul aur naját denewálá Ḳhudá mere siwá koí nahíṉ. 22Ai intihá e zamín ke sab rahnewálo, tum merí taraf mutawajjih ho, aur naját páo, kyúṉki maiṉ Ḳhudá húṉ, aur mere siwá koí nahíṉ. 23Maiṉ ne apní zát kí qasam kháí hai, kalám i sidq mere muṉh se niklá hai aur wuh ṭalegá nahíṉ, ki har ek ghuṭná mere huzúr jhukegá, aur har ek zabán merí qasam kháegí. 24Mere haqq meṉ har ek kahegá, ki Yaqínan Ḳhudáwand hí meṉ rástbází aur tawánáí hai; usí ke pás wuh áegá, aur sab jo us se bezár the pashemán hoṉge. 25Isráíl kí kull nasl Ḳhudáwand meṉ sádiq ṭhahregí, aur us par faḳhr karegí.
Currently Selected:
Yasa‘iyáh 45: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
