Yasa‘iyáh 43
43
1Aur ab, ai Ya‘qúb, Ḳhudáwand jis ne tujh ko paidá kiyá, aur jis ne, ai Isráíl, tujh ko banáyá, yúṉ farmátá hai; ki Ḳhauf na kar, kyúṉki maiṉ ne terá fidya diyá hai; maiṉ ne terá nám lekar tujhe buláyá hai, tú merá hai. 2Jab tú sailáb meṉ se guzregá, to maiṉ tere sáth húṉgá; aur jab tú nadiyoṉ ko ‘ubúr karegá, to wuh tujhe na ḍubáeṉgí; jab tú ág par chalegá, to tujhe áṉch na lagegí; aur shu‘la tujhe na jaláegá. 3Kyúṉki maiṉ Ḳhudáwand terá Ḳhudá, Isráíl ká Quddús, terá naját denewálá húṉ: maiṉ ne tere fidye meṉ Misr ko aur tere badle Kúsh aur Sabá ko diyá. 4Chúṉki tú merí nigáh meṉ beshqímat aur mukarram ṭhahrá, aur maiṉ ne tujh se mahabbat rakkhí; is liye maiṉ tere badle log aur terí ján ke ‘iwaz meṉ ummateṉ de dúṉgá. 5Tú ḳhauf na kar; kyúṉki maiṉ tere sáth húṉ: maiṉ terí nasl ko mashriq se le áúṉgá, aur mag̣rib se tujhe faráham karúṉgá; 6maiṉ shimál se kahúṉgá, ki De ḍál; aur junúb se ki Rakh na chhoṛ; mere beṭoṉ ko dúr se, aur merí beṭiyoṉ ko zamín kí intihá se láo: 7har ek ko jo mere nám se kahlátá hai, aur jis ko maiṉ ne apne jalál ke liye ḳhalq kiyá; jise maiṉ ne paidá kiyá; háṉ, jise maiṉ hí ne banáyá. 8Un andhe logoṉ ko jo áṉkheṉ rakhte haiṉ, aur un bahroṉ ko jin ke kán haiṉ báhar láo. 9Tamám qaumeṉ faráham kí jáeṉ, aur sab ummateṉ jama‘ hoṉ: un ke darmiyán kaun hai, jo use bayán kare, yá ham ko pichhlí báteṉ batáe? wuh apne gawáhoṉ ko láeṉ, táki wuh sachche sábit hoṉ: aur log suneṉ, aur kaheṉ, ki Yih sach hai. 10Ḳhudáwand farmátá hai, Tum mere gawáh ho, aur merá ḳhádim bhí jise maiṉ ne barguzída kiyá: táki tum jáno, aur mujh par ímán láo, aur samjho, ki maiṉ wuhí húṉ: mujh se pahle koí Ḳhudá na húá, aur mere ba‘d bhí koí na hogá. 11Maiṉ hí Yahowáh húṉ; aur mere siwá koí bachánewálá nahíṉ. 12Maiṉ ne i‘lán kiyá, aur maiṉ ne naját baḳhshí, aur maiṉ hí ne záhir kiyá, jab tum meṉ koí ajnabí ma‘búd na thá: so tum mere gawáh ho, Ḳhudáwand farmátá hai, ki maiṉ hí Ḳhudá húṉ. 13Áj se maiṉ hí húṉ; âur koí nahíṉ, jo mere háth se chhuṛá sake: maiṉ kám karúṉgá, kaun hai jo use radd kar sake?
14 Ḳhudáwand tumhárá naját denewálá Isráíl ká Quddús yúṉ farmátá hai, ki Tumhárí ḳhátir maiṉ ne Bábul par ḳhurúj karáyá, aur maiṉ un sab ko faráríoṉ kí hálat meṉ aur Kasdíoṉ ko bhí jo apne jaházoṉ meṉ lalkárte the le áúṉgá. 15Maiṉ Ḳhudáwand tumhárá Quddús, Isráíl ká ḳháliq, tumhárá bádsháh húṉ. 16Jis ne samundar meṉ ráh aur sailáb meṉ guzargáh banáí; 17jo jangí rathoṉ, aur ghoṛoṉ, aur lashkar, aur baháduroṉ ko nikál látá hai, (wuh sab ke sab leṭ gaye, wuh phir na uṭheṉge: wuh bujh gaye, háṉ, wuh battí kí tarah bujh gaye:) 18ya‘ní Ḳhudáwand yúṉ farmátá hai, ki Pichhlí bátoṉ ko yád na karo, aur qadím bátoṉ par sochte na raho. 19Dekho, maiṉ ek nayá kám karúṉgá; ab wuh zuhúr meṉ áegá; kyá tum us se náwáqif rahoge? háṉ, maiṉ biyábán meṉ ek ráh aur sahrá meṉ nadiyáṉ járí karúṉgá. 20Janglí jánwar, gídaṛ, aur shutrmurg̣, merí ta‘zím kareṉge: kyúṉki maiṉ biyábán meṉ pání aur sahrá meṉ nadiyáṉ járí karúṉgá, táki mere logoṉ ke liye ya‘ní mere barguzídoṉ ke píne ke liye hoṉ: 21maiṉ ne in logoṉ ko apne liye banáyá, táki wuh merí hamd kareṉ. 22Taubhí, ai Ya‘qúb, tú ne mujhe na pukárá; balki, ai Isráíl, tú mujh se tang á gayá. 23Tú barroṉ ko apní soḳhtaní qurbáníoṉ ke liye mere huzúr nahíṉ láyá; aur tú ne apne zabíhoṉ se merí ta‘zím nahíṉ kí. Maiṉ ne tujhe hadya láne par majbúr nahíṉ kiyá, aur lubán jaláne kí taklíf nahíṉ dí. 24Tú ne rupaye se mere liye agar ko nahíṉ ḳharídá, aur tú ne mujhe apne zabíhoṉ kí charbí se ser nahíṉ kiyá: lekin tú ne apne gunáhoṉ se mujhe zerbár kiyá, aur apní ḳhatáoṉ se mujhe bezár kar diyá. 25Maiṉ hí wuh húṉ, jo apne nám kí ḳhátir tere gunáhoṉ ko miṭátá húṉ; aur maiṉ terí ḳhatáoṉ ko yád nahíṉ rakkhúṉgá. 26Mujhe yád dilá; ham ápas meṉ bahs kareṉ: apná hál bayán kar, táki tú sádiq ṭhahre. 27Tere baṛe báp ne gunáh kiyá, aur tere tafsír karnewáloṉ ne merí muḳhálafat kí hai. 28Is liye maiṉ ne maqdis ke amíroṉ ko nápák ṭhahráyá, aur Ya‘qúb ko la‘nat, aur Isráíl ko ta‘nazaní ke hawále kiyá.
Currently Selected:
Yasa‘iyáh 43: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
