Popular Bible Verses from Yasa‘iyáh 43

Share

Dekho, maiṉ ek nayá kám karúṉgá; ab wuh zuhúr meṉ áegá; kyá tum us se náwáqif rahoge? háṉ, maiṉ biyábán meṉ ek ráh aur sahrá meṉ nadiyáṉ járí karúṉgá.

Jab tú sailáb meṉ se guzregá, to maiṉ tere sáth húṉgá; aur jab tú nadiyoṉ ko ‘ubúr karegá, to wuh tujhe na ḍubáeṉgí; jab tú ág par chalegá, to tujhe áṉch na lagegí; aur shu‘la tujhe na jaláegá.

ya‘ní ḲHUDáWAND yúṉ farmátá hai, ki Pichhlí bátoṉ ko yád na karo, aur qadím bátoṉ par sochte na raho.

Aur ab, ai Ya‘qúb, ḲHUDáWAND jis ne tujh ko paidá kiyá, aur jis ne, ai Isráíl, tujh ko banáyá, yúṉ farmátá hai; ki Ḳhauf na kar, kyúṉki maiṉ ne terá fidya diyá hai; maiṉ ne terá nám lekar tujhe buláyá hai, tú merá hai.

Chúṉki tú merí nigáh meṉ beshqímat aur mukarram ṭhahrá, aur maiṉ ne tujh se mahabbat rakkhí; is liye maiṉ tere badle log aur terí ján ke ‘iwaz meṉ ummateṉ de dúṉgá.

Kyúṉki maiṉ ḲHUDáWAND terá Ḳhudá, Isráíl ká Quddús, terá naját denewálá húṉ: maiṉ ne tere fidye meṉ Misr ko aur tere badle Kúsh aur Sabá ko diyá.

Tú ḳhauf na kar; kyúṉki maiṉ tere sáth húṉ: maiṉ terí nasl ko mashriq se le áúṉgá, aur mag̣rib se tujhe faráham karúṉgá

Maiṉ hí wuh húṉ, jo apne nám kí ḳhátir tere gunáhoṉ ko miṭátá húṉ; aur maiṉ terí ḳhatáoṉ ko yád nahíṉ rakkhúṉgá.

ḲHUDáWAND farmátá hai, Tum mere gawáh ho, aur merá ḳhádim bhí jise maiṉ ne barguzída kiyá: táki tum jáno, aur mujh par ímán láo, aur samjho, ki maiṉ wuhí húṉ: mujh se pahle koí Ḳhudá na húá, aur mere ba‘d bhí koí na hogá.

Maiṉ hí YAHOWáH húṉ; aur mere siwá koí bachánewálá nahíṉ.

Áj se maiṉ hí húṉ; âur koí nahíṉ, jo mere háth se chhuṛá sake: maiṉ kám karúṉgá, kaun hai jo use radd kar sake?

Janglí jánwar, gídaṛ, aur shutrmurg̣, merí ta‘zím kareṉge: kyúṉki maiṉ biyábán meṉ pání aur sahrá meṉ nadiyáṉ járí karúṉgá, táki mere logoṉ ke liye ya‘ní mere barguzídoṉ ke píne ke liye hoṉ: maiṉ ne in logoṉ ko apne liye banáyá, táki wuh merí hamd kareṉ.

maiṉ shimál se kahúṉgá, ki De ḍál; aur junúb se ki Rakh na chhoṛ; mere beṭoṉ ko dúr se, aur merí beṭiyoṉ ko zamín kí intihá se láo: har ek ko jo mere nám se kahlátá hai, aur jis ko maiṉ ne apne jalál ke liye ḳhalq kiyá; jise maiṉ ne paidá kiyá; háṉ, jise maiṉ hí ne banáyá.

Jis ne samundar meṉ ráh aur sailáb meṉ guzargáh banáí; jo jangí rathoṉ, aur ghoṛoṉ, aur lashkar, aur baháduroṉ ko nikál látá hai, (wuh sab ke sab leṭ gaye, wuh phir na uṭheṉge: wuh bujh gaye, háṉ, wuh battí kí tarah bujh gaye:)

Maiṉ ḲHUDáWAND tumhárá Quddús, Isráíl ká ḳháliq, tumhárá bádsháh húṉ.