Yasa‘iyáh 33
33
1Tujh par afsos, ki tú g̣árat kartá hai, aur g̣árat na kiyá gayá thá; tú dag̣ábází kartá hai, aur kisí ne tujh se dag̣ábází na kí thí! Jab tú g̣árat kar chukegá, to tú g̣árat kiyá jáegá; aur jab tú dag̣ábází kar chukegá, to âur log tujh se dag̣ábází kareṉge. 2Ai Ḳhudáwand, ham par rahm kar; kyúṉki ham tere muntazir haiṉ: tú har subh un ká bázú ho, aur musíbat ke waqt hamárí naját. 3Hangáme kí áwáz sunte hí log bhág gaye: tere uṭhte hí qaumeṉ tittar bittar ho gayíṉ. 4Aur tumhárí lúṭ ká mál usí tarah baṭorá jáegá, jis tarah kíṛe baṭor lete haiṉ: log us par ṭiḍḍí kí tarah ṭúṭ paṛeṉge. 5Ḳhudáwand sarfaráz hai, kyúṉki wuh balandí par rahtá hai: us ne ‘adálat aur sadáqat se Siyyún ko ma‘múr kar diyá hai. 6Aur tere zamáne meṉ amn hogá, naját o hikmat aur dánish kí firáwání hogí: Ḳhudáwand ká ḳhauf us ká ḳhazána hai.
7Dekh, un ke bahádur báhar faryád karte haiṉ, aur sulh ke elchí phúṭ phúṭkar rote haiṉ. 8Sháhráheṉ sunsán haiṉ, koí chalnewálá na rahá: us ne ‘ahdshikaní kí, shahroṉ ko haqír jáná, aur insán ko hisáb meṉ nahíṉ látá. 9Zamín kuṛhtí aur murjhátí hai. Lubnán ruswá húá, aur murjhá gayá: Shárún biyábán kí mánind hai: Basan aur Karmil bebarg ho gaye. 10Ḳhudáwand farmátá hai, Ab maiṉ uṭhúṉgá; ab maiṉ sarfaráz húṉgá; ab maiṉ sarbaland húṉgá. 11Tum bhúse se bárdár hoge, phús tum se paidá hogá: tumhárá dam ág kí tarah tum ko bhasam karegá. 12Aur log jale chúne kí mánind hoṉge, wuh un káṉṭoṉ kí mánind hoṉge, jo káṭkar ág meṉ jaláe jáeṉ.
13Tum jo dúr ho, suno, ki maiṉ ne kyá kiyá: aur tum jo nazdík ho, merí qudrat ká iqrár karo. 14Wuh gunahgár jo Siyyún meṉ haiṉ ḍar gaye: kapkapí ne bedínoṉ ko á dabáyá hai; kaun ham meṉ se us muhlik ág meṉ rah saktá hai? aur kaun ham meṉ se abadí shu‘loṉ ke darmiyán bas saktá hai? 15Wuh jo rástraftár aur durustguftár hai, jo zulm ke nafa‘ ko haqír jántá hai, jo rishwat se dastbardár hai, jo apne kán band kartá hai, táki ḳhúnrezí ke mazmún na sune, aur áṉkheṉ múṉdtá hai, táki ziyánkárí na dekhe. 16Wuh balandí par rahegá, us kí panáhgáh paháṛ ká qil‘a hogá, us ko roṭí dí jáegí, us ká pání muqarrar hogá. 17Terí áṉkheṉ bádsháh ká jamál dekheṉgí: wuh bahut dúr tak wasí‘ mulk par nazar kareṉgí. 18Terá dil us dahshat par sochegá, kaháṉ hai wuh ginnewálá? kaháṉ hai wuh tolnewálá? kaháṉ hai wuh jo burjoṉ ko gintá thá? 19Tú phir un tundḳho logoṉ ko na dekhegá, jin kí bolí tú samajh nahíṉ saktá, jin kí zabán begána hai, jo terí samajh meṉ nahíṉ átí. 20Hamárí ‘ídgáh, Siyyún, par nazar kar: terí áṉkheṉ Yarúshalem ko dekheṉgí, jo salámatí ká maqám hai, balki aisá ḳhaima, jo hiláyá na jáegá, jis kí meḳhoṉ meṉ se ek bhí ukháṛí na jáegí, aur us kí ḍoriyoṉ meṉ se ek bhí toṛí na jáegí. 21Balki waháṉ zú’l jalál Ḳhudáwand baṛí baṛí nadiyoṉ aur nahroṉ ke badle hamárí gunjáish ke liye áp maujúd hogá, ki waháṉ ḍáṉḍ kí koí kishtí na jáegí, aur na shándár jaházoṉ ká guzar us meṉ hogá. 22Kyúṉki Ḳhudáwand hamárá hákim hai: Ḳhudáwand hamárá sharí‘at denewálá hai, Ḳhudáwand hamárá bádsháh hai, wuhí ham ko bacháegá. 23Terí rassiyáṉ ḍhílí haiṉ: log mastúl kí chúl ko mazbút na kar sake: wuh bádbán na phailá sake, so lúṭ ká wáfir mál taqsím kiyá gayá, laṉgṛe bhí g̣anímat par qábiz ho gaye. 24Waháṉ ke báshindoṉ meṉ bhí koí na kahegá, ki Maiṉ bímár húṉ: aur un ke gunáh baḳhshe jáeṉge.
Currently Selected:
Yasa‘iyáh 33: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
