Yasa‘iyáh 32
32
1Dekh, ek bádsháh sadáqat se saltanat karegá, aur sháhzáde ‘adálat se hukmrání kareṉge. 2Aur ek shaḳhs áṉdhí se panáhgáh kí mánind hogá, aur túfán se chhipne kí jagah: aur ḳhushk zamín meṉ pání kí nadiyoṉ kí mánind aur mándagí kí zamín meṉ baṛí chaṭán ke sáye kí mánind hogá. 3Us waqt dekhnewáloṉ kí áṉkheṉ dhundhlí na hoṉgí, aur sunnewálon ke kán shanawá hoṉge. 4Jaldbáz ká dil ‘irfán hásil karegá, aur luknatí kí zabán sáf bolne meṉ musta‘idd hogí. 5Tab ahmaq bámuruwwat na kahláegá, aur baḳhíl ko koí saḳhí na kahegá. 6Kyúṉki ahmaq hamáqat kí báteṉ karegá, aur us ká dil badí ká mansúba báṉdhegá, ki bedíní kare, aur Ḳhudáwand ke ḳhiláf darog̣goí kare, aur bhúke ke peṭ ko ḳhálí kare, aur piyáse ko pání se mahrúm rakkhe. 7Aur baḳhíl ke hathyár zabún haiṉ: wuh bure mansúbe báṉdhá kartá hai, táki jhúṭhí bátoṉ se miskín ko aur muhtáj ko, jab ki wuh haqq bayán kartá ho, halák kare. 8Lekin sáhib i muruwwat saḳháwat kí báteṉ sochtá hai, aur wuh saḳháwat ke kámoṉ meṉ sábitqadam rahegá.
9Ai ‘aurato, tum jo árám meṉ ho, uṭho, merí áwáz suno; ai beparwá beṭiyo, merí bátoṉ par kán lagáo. 10Ai beparwá ‘aurato, sál se kuchh ziyáda ‘arse meṉ tum beárám ho jáogí: kyúṉki angúr kí fasl játí rahegí, phal jama‘ karne kí naubat na áegí. 11Ai ‘aurato, tum jo árám meṉ ho, thartharáo; ai beparwáo, muztarib ho: kapṛe utárkar barahna ho jáo: kamar par ṭáṭ báṉdho. 12Wuh dilpazír khetoṉ aur mewadár tákoṉ ke liye chhátí piṭeṉgí. 13Mere logoṉ kí sarzamín meṉ káṉṭe aur jháṛiyáṉ hoṉgí; balki ḳhushwaqt shahr ke tamám shádmán gharoṉ meṉ bhí. 14Kyúṉki qasr ḳhálí ho jáegá, aur ábád shahr tark kiyá jáegá, ‘Ofal aur dídbání ká burj hamesha tak máṉd bankar gorḳharoṉ kí árámgáheṉ, aur galloṉ kí charágáheṉ hoṉge. 15Táwaqte ki ‘álam i bálá se ham par rúh názil na ho, aur biyábán shádáb maidán na bane, aur shádáb maidán jangal na giná jáe. 16Tab biyábán meṉ ‘adl basegá, aur sadáqat shádáb maidán meṉ rahá karegí. 17Aur sadáqat ká anjám sulh hogá, aur sadáqat ká phal abadí árám o itmínán hogá. 18Aur mere log salámatí ke makánoṉ meṉ, aur beḳhatar gharoṉ meṉ, aur ásúdagí aur ásáish ke káshánoṉ meṉ raheṉge. 19Lekin jangal kí barbádí ke waqt ole paṛeṉge, aur shahr bi’lkull past ho jáegá. 20Tum ḳhushnasíb ho, jo sab nahroṉ ke áspás bote ho, aur bailoṉ aur gadhoṉ ko udhar le játe ho.
Currently Selected:
Yasa‘iyáh 32: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
