Yasa‘iyáh 31
31
1Un par afsos jo madad ke liye Misr ko játe, aur ghoṛoṉ par ‘itimád karte haiṉ; aur rathoṉ par bharosá rakhte haiṉ, is liye ki wuh bahut haiṉ; aur sawároṉ par, is liye ki wuh bahut zoráwar haiṉ; lekin Isráíl ke Quddús par nigáh nahíṉ karte, aur Ḳhudáwand ke tálib nahíṉ hote! 2Par wuh bhí to ‘aqlmand hai, aur balá názil karegá, aur apne kalám ko bátil na hone degá: wuh sharíroṉ ke gharáne par, aur un par jo badkirdároṉ kí himáyat karte haiṉ chaṛháí karegá. 3Kyúṉki Misrí to insán haiṉ, Ḳhudá nahíṉ; aur un ke ghoṛe gosht haiṉ, rúh nahíṉ; so jab Ḳhudáwand apná háth baṛháegá, to himáyatí gir jáegá, aur wuh jis kí himáyat kí gayí past ho jáegá, aur wuh sab ke sab ikaṭṭhe halák ho jáeṉge. 4Kyúṉki Ḳhudáwand ne mujh se yúṉ farmáyá hai, ki Jis tarah sher i babar, háṉ, jawán sher i babar, apne shikár par se g̣urrátá hai, aur agar bahut se gaḍariye us ke muqábale ko buláe jáeṉ, to un kí lalkár se nahíṉ ḍartá, aur un ke hujúm se dab nahíṉ játá: usí tarah Rabb u’l afwáj koh i Siyyún aur us ke ṭíle par laṛne ko utregá. 5Maṉḍláte húe parande kí tarah Rabb u’l afwáj Yarúshalem kí himáyat karegá; wuh himáyat karegá, aur riháí baḳhshegá, rahm karegá, aur bachá legá. 6Ai baní Isráíl, tum us kí taraf phiro, jis se tum ne saḳht bag̣áwat kí hai. 7Kyúṉki us waqt un meṉ se har ek apne chándí ke but, aur apní sone kí múrateṉ, jin ko tumháre háthoṉ ne ḳhatákárí ke liye banáyá, nikál pheṉkegá. 8Tab Asúr usí talwár se gir jáegá, jo insán kí nahíṉ, aur wuhí talwár jo admí kí nahíṉ, use halák karegí: wuh talwár ke sámne se bhágegá, aur us ke jawán mard ḳhirájguzár baneṉge. 9Aur wuh ḳhauf ke sabab se apne hasín makán se guzar jáegá, aur us ke sardár jhanḍe se ḳhaufzada ho jáeṉge, yih Ḳhudáwand farmátá hai, jis kí ág Siyyún meṉ aur bhaṭṭí Yarúshalem meṉ hai.
Currently Selected:
Yasa‘iyáh 31: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
