Yasa‘iyáh 25
25
1Ai Ḳhudáwand, tú merá Ḳhudá hai; maiṉ terí tamjíd karúṉgá, tere nám kí sitáish karúṉgá; kyúṉki tú ne ‘ajíb kám kiye haiṉ, terí maslahateṉ qadím se wafádárí aur sachcháí haiṉ. 2Kyúṉki tú ne shahr ko ḳhák ká ḍher kiyá; háṉ, fasíldár shahr ko khanḍar baná diyá: aur pardesiyoṉ ke mahall ko bhí yaháṉ tak ki shahr na rahá; wuh phir ta‘mír na kiyá jáegá. 3Is liye zabardast log terí sitáish kareṉge, aur haibatnák qaumoṉ ká shahr tujh se ḍaregá. 4Kyúṉki tú miskín ke liye qil‘a aur muhtáj ke liye pareshání ke waqt maljá, aur áṉdhí se panáhgáh, aur garmí se bacháne ko sáya húá, jis waqt zálimoṉ kí sáṉs díwárkan túfán kí mánind ho. 5Tú pardesiyoṉ ke shor ko ḳhushk makán kí garmí kí mánind dúr karegá; aur jis tarah abr ke sáye se garmí nest hotí hai, usí tarah zálimoṉ ká shádiyána bajáná mauqúf hogá. 6Aur Rabb u’l afwáj is paháṛ par sab qaumoṉ ke liye farbih chízoṉ se ek ziyáfat taiyár karegá, balki ek ziyáfat talchhaṭ par se nithrí húí mai se, háṉ, farbih chízoṉ se jo purmag̣z hoṉ, aur mai se jo talchhaṭ par se ḳhúb nithrí húí ho. 7Aur wuh is paháṛ par us parde ko jo tamám logoṉ par paṛá hai, aur us niqáb ko jo sab qaumoṉ par laṭak rahá hai, dúr kar degá. 8Wuh maut ko hamesha ke liye nábúd karegá; aur Ḳhudáwand Ḳhudá sab ke chihroṉ se áṉsú poṉchh ḍálegá; aur apne logoṉ kí ruswáí tamám sarzamín par se miṭá degá: kyúṉki Ḳhudáwand ne yih farmáyá hai.
9Aur us waqt yúṉ kahá jáegá, Lo, yih hamárá Ḳhudá hai; ham us kí ráh takte the, aur wuhí ham ko bacháegá: yih Ḳhudáwand hai; ham us ke intizár meṉ the, ham us kí naját se ḳhush o ḳhurram hoṉge. 10Kyúṉki is paháṛ par Ḳhudáwand ká háth barqarár rahegá, aur Moáb apní hí jagah meṉ aisá kuchlá jáegá, jaise mazbale ke pání meṉ ghás kuchlí játí hai. 11Aur wuh us meṉ us kí mánind jo tairte húe háth phailátá hai apne háth phailáegá: par wuh us ke g̣urúr ko, us ke háthoṉ ke fannfareb samet, past karegá. 12Aur wuh terí fasíl ke úṉche burjoṉ ko toṛkar past karegá, aur zamín ke, balki ḳhák ke barábar kar degá.
Currently Selected:
Yasa‘iyáh 25: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
