Yasa‘iyáh 24
24
1Dekho, Ḳhudáwand zamín ko ḳhálí aur sarnigún karke wírán kartá hai, aur us ke báshindoṉ ko tittar bittar kar detá hai. 2Aur yúṉ hogá, ki jaisá ra‘íyat ká hál waisá hí káhin ká; jaisá naukar ká, waisá hí us ke sáhib ká; jaisá lauṉḍí ká, waisá hí us kí bíbí ká; jaisá ḳharídár ká, waisá hí bechnewále ká; jaisá qarz denewále ká, waisá hí qarz lenewále ká; jaisá súd denewále ká, waisá hí súd lenewále ká. 3Zamín bi’lkull ḳhálí kí jáegí, aur bashiddat g̣árat hogí; kyúṉki yih kalám Ḳhudáwand ká hai. 4Zamín g̣amgín hotí aur murjhátí hai: jahán betáb aur pazhmurda hotá hai, zamín ke ‘álíqadr log nátawán hote haiṉ. 5Zamín apne báshindoṉ se najis húí, kyúṉki unhoṉ ne sharí‘atoṉ ko ‘udúl kiyá: áín se munharif húe, ‘ahd i abadí ko toṛá. 6Is sabab se la‘nat ne zamín ko nigal liyá, aur us ke báshinde mujrim ṭhahre: aur isí liye zamín ke log bhasam húe, aur thoṛe se ádmí bach gaye. 7Nayí mai g̣amzada, aur ták pazhmurda hai; aur sab jo dilshád the áh bharte haiṉ. 8Ḍholakoṉ kí ḳhushí band ho gayí, ḳhushí manánewáloṉ ká g̣ul o shor tamám húá, barbat kí shádmání játí rahí. 9Wuh phir gít ke sáth mai nahíṉ píte, pínewáloṉ ko sharáb talḳh ma‘lúm hogí. 10Sunsán shahr wírán ho gayá, har ek ghar band ho gayá, ki koí andar na já sake. 11Mai ke liye bázároṉ meṉ wáwailá ho rahá hai: sárí ḳhushí par táríkí chhá gayí, mulk kí ‘ishrat játí rahí. 12Shahr meṉ wírání hí wírání hai, aur pháṭak toṛ phoṛ diye gaye. 13Kyúṉki zamín meṉ logoṉ ke darmiyán yúṉ hogá, jaisá zaitún ká daraḳht jháṛá jáe, jaise angúr toṛne ke ba‘d ḳhoshachíní. 14Wuh ápní áwáz baland kareṉge, wuh gít gáeṉge; Ḳhudáwand ke jalál ke sabab se samundar se lalkáreṉge. 15Pas tum mashriq meṉ Ḳhudáwand kí aur samundar ke jazíroṉ meṉ Ḳhudáwand ke nám kí jo Isráíl ká Ḳhudá hai, tamjíd karo.
16Intihá e zamín se nag̣moṉ kí áwáz ham ko sunáí detí hai, jalál o ‘azmat sádiq ke liye. Par maiṉ ne kahá, Maiṉ gudáz ho gayá, maiṉ halák húá, mujh par afsos! dag̣ábázoṉ ne dag̣á kí; háṉ, dag̣ábázoṉ ne baṛí dag̣á kí. 17Ai zamín ke báshinde, ḳhauf aur gaṛhá, aur dám tujh par musallit haiṉ. 18Aur yúṉ hogá, ki jo ḳhaufnák áwáz sunkar bháge, gaṛhe meṉ giregá; aur jo gaṛhe se nikal áe, dám meṉ phaṉsegá: kyúṉki ásmán kí khiṛkiyáṉ khul gayíṉ, aur zamín kí bunyádeṉ hil rahí haiṉ. 19Zamín bi’lkull ujaṛ gayí, zamín yaksar shikasta húí, aur shiddat se hiláí gayí. 20Wuh matwále kí mánind ḍagmagáegí, aur jhoṉpṛí kí tarah áge píchhe sarkáí jáegí; kyúṉki us ke gunáh ká bojh us par bhárí húá, wuh giregí aur phir na uṭhegí.
21Aur us waqt yúṉ hogá, ki Ḳhudáwand ásmání lashkar ko ásmán par, aur zamín ke bádsháhoṉ ko zamín par sazá degá. 22Aur wuh un qaidíoṉ kí mánind jo gaṛhe meṉ ḍále jáeṉ, jama‘ kiye jáeṉge: aur wuh qaidḳháne meṉ qaid kiye jáeṉge, aur bahut dinoṉ ke ba‘d un kí ḳhabar lí jáegí. 23Aur jab Rabb u’l afwáj koh i Siyyún par aur Yarúshalem meṉ apne buzurg bandoṉ ke sámne hashmat ke sáth saltanat karegá, to chánd muztarib aur súraj sharminda hogá.
Currently Selected:
Yasa‘iyáh 24: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
