Popular Bible Verses from Yasa‘iyáh 25

Share

Ai ḲHUDáWAND, tú merá Ḳhudá hai; maiṉ terí tamjíd karúṉgá, tere nám kí sitáish karúṉgá; kyúṉki tú ne ‘ajíb kám kiye haiṉ, terí maslahateṉ qadím se wafádárí aur sachcháí haiṉ.

Wuh maut ko hamesha ke liye nábúd karegá; aur Ḳhudáwand ḲHUDá sab ke chihroṉ se áṉsú poṉchh ḍálegá; aur apne logoṉ kí ruswáí tamám sarzamín par se miṭá degá: kyúṉki ḲHUDáWAND ne yih farmáyá hai.

Aur us waqt yúṉ kahá jáegá, Lo, yih hamárá Ḳhudá hai; ham us kí ráh takte the, aur wuhí ham ko bacháegá: yih ḲHUDáWAND hai; ham us ke intizár meṉ the, ham us kí naját se ḳhush o ḳhurram hoṉge.

Aur wuh is paháṛ par us parde ko jo tamám logoṉ par paṛá hai, aur us niqáb ko jo sab qaumoṉ par laṭak rahá hai, dúr kar degá.

Aur RABB u’l afwáj is paháṛ par sab qaumoṉ ke liye farbih chízoṉ se ek ziyáfat taiyár karegá, balki ek ziyáfat talchhaṭ par se nithrí húí mai se, háṉ, farbih chízoṉ se jo purmag̣z hoṉ, aur mai se jo talchhaṭ par se ḳhúb nithrí húí ho.