Yasa‘iyáh 22
22
1Royá kí wádí kí bábat bár i nubuwwat.
Ab tum ko kyá húá, ki tum sab ke sab koṭhoṉ par chaṛh gaye? 2Ai purshor aur g̣aug̣áí shahr, ai shádmán bastí, tere maqtúl na talwár se qatl húe, aur na laṛáí meṉ máre gaye. 3Tere sab sardár ikaṭṭhe bhág nikle, un ko tírandázoṉ ne asír kar liyá: jitne tujh meṉ páe gaye, sab ke sab, balki wuh bhí jo dúr se bhág gaye the, asír kiye gaye haiṉ. 4Isí liye maiṉ ne kahá, Merí taraf mat dekho, kyúṉki maiṉ zár zár roúṉgá; merí tasallí kí fikr mat karo, kyúṉki merí duḳhtar i qaum barbád ho gayí. 5Kyúṉki Ḳhudáwand, Rabb u’l afwáj, kí taraf se royá kí wádí meṉ yih dukh aur pámálí o beqarárí aur díwároṉ ko giráne aur paháṛoṉ tak faryád pahuṉcháne ká din hai. 6Kyúṉki ‘Ailám ne jangí rathoṉ aur sawároṉ ke sáth tarkash uṭhá liyá, aur Qír ne sipar ká g̣iláf utár diyá. 7Aur yúṉ húá, ki terí bihtarín wádíáṉ jangí rathoṉ se ma‘múr ho gayíṉ, aur sawároṉ ne pháṭak par saffáráí kí. 8Aur Yahúdáh ká niqáb utárá gayá, aur tú ab dasht i mahall ke siláhḳháne par nigáh kartá hai. 9Aur tum ne Dáúd ke shahr ke raḳhne dekhe, ki beshumár haiṉ: aur tum ne níche ke hauz meṉ pání jama‘ kiyá. 10Aur tum ne Yarúshalem ke gharoṉ ko giná, aur un ko giráyá, táki shahrpanáh ko mazbút karo. 11Aur tum ne puráne hauz ke pání ke liye donoṉ díwároṉ ke darmiyán ek âur hauz banáyá: lekin tum ne us ke pání par nigáh na kí, aur us kí taraf jis ne qadím se us kí tadbír kí, mutawajjih na húe. 12Aur us waqt Ḳhudáwand, Rabb u’l afwáj, ne rone, aur mátam karne, aur sir munḍáne, aur ṭáṭ se kamar báṉdhne ká hukm diyá thá. 13Lekin dekho, ḳhushí aur shádmání, gáe bail ko zabh karná, aur bheṛ bakrí ko halál karná, aur goshtḳhwárí o mainoshí, ki áo, kháeṉ aur píeṉ, kyúṉki kal to ham mareṉge. 14Aur Rabb u’l afwáj ne mere kán meṉ kahá, ki Tumhárí is badkirdárí ká kaffára tumháre marne tak bhí na ho sakegá, yih Ḳhudáwand, Rabb u’l afwáj, ká farmán hai.
15Ḳhudáwand Rabb u’l afwáj yúṉ farmátá hai, ki Us ḳhazáṉchí Shabnáh pás jo mahall par mu‘aiyan hai, já aur kah, 16Tú yaháṉ kyá kartá hai? aur terá yaháṉ kaun hai, ki tú yaháṉ apne liye qabr taráshtá hai? balandí par apní gor taráshtá hai, aur chaṭán meṉ apne liye ghar khudwátá hai. 17Dekh, ai zabardast, Ḳhudáwand tujh ko zor se dúr pheṉk degá; wuh yaqínan tujhe pakaṛ rakkhegá. 18Wuh beshakk tujh ko geṉd kí mánind ghumá ghumákar wasí‘ mulk meṉ uchhálegá; waháṉ tú maregá, aur terí hashmat ke rath wahíṉ raheṉge, ai apne áqá ke ghar kí ruswáí. 19Aur maiṉ tujhe tere mansab se bartaraf karúṉgá; háṉ, wuh tujhe terí jagah se kheṉch utáregá. 20Aur us roz yúṉ hogá, ki maiṉ apne bande Iliyáqím bin Ḳhilqiyáh ko buláúṉgá. 21Aur maiṉ terí ḳhil‘at use pahináúṉgá, aur terá paṭká us par kasúṉgá, aur terí hukúmat us ke háth meṉ supurd kar dúṉgá; aur wuh ahl i Yarúshalem ká aur baní Yahúdáh ká báp hogá. 22Aur maiṉ Dáúd ke ghar kí kunjí us ke kandhe par rakkhúṉgá; pas wuh kholegá, aur koí band na karegá; aur wuh band karegá, aur koí na kholegá. 23Aur maiṉ us ko khúṉṭí kí mánind mazbút jagah meṉ muhkam karúṉgá; aur wuh apne báp ke gharáne ke liye jalálí taḳht hogá. 24Aur us ke báp ke ḳhándán kí sárí hashmat ya‘ní ál o aulád aur sab chhoṭe baṛe bartan, piyáloṉ se lekar qaráboṉ tak, sab ko usí se mansúb kareṉge. 25Rabb u’l afwáj farmátá hai, Us waqt wuh khúṉṭí jo mazbút jagah meṉ lagáí gayí thí, hiláí jáegí, aur wuh káṭí jáegí, aur gir jáegí, aur us par ká bojh gir paṛegá; kyúṉki Ḳhudáwand ne yúṉ farmáyá hai.
Currently Selected:
Yasa‘iyáh 22: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
