Yasa‘iyáh 21
21
1Dasht i daryá kí bábat bár i nubuwwat.
Jis tarah junúbí girdbád zor se chalá átá hai, usí tarah wuh dasht se aur muhíb sarzamín se nazdík á rahá hai. 2Ek haulnák royá mujhe nazar áí; dag̣ábáz dag̣ábází kartá hai, aur g̣áratgar g̣árat kartá hai; ai ‘Ailám, chaṛháí kar; ai Mádí muhásara kar; maiṉ wuh sab karáhná jo us ke sabab se húá mauqúf kartá húṉ. 3So merí kamar meṉ saḳht dard hai, aur maiṉ goyá dard i zih meṉ taṛaptá húṉ; maiṉ aisá hirásán húṉ, ki sun nahíṉ saktá; maiṉ aisá pareshán húṉ, ki dekh nahíṉ saktá. 4Merá dil dhaṛaktá hai, aur haul yakáyak mujh par g̣álib á gayá; shifq i shám jis ká maiṉ árzúmand thá, mere liye ḳhaufnák ho gayí. 5Dastarḳhwán bichháyá gayá, nigahbán khaṛá kiyá gayá, wuh kháte haiṉ aur píte haiṉ; uṭho, ai sardáro; sipar par tel malo. 6Kyúṉki Ḳhudáwand ne mujhe yúṉ farmáyá, ki Já, nigahbán biṭhá; wuh jo kuchh dekhe so batáe. 7Us ne sawár dekhe, jo do do áte the, aur gadhoṉ aur úṉṭon par sawár, aur us ne baṛe g̣aur se suná. 8Tab us ne sher kí sí áwáz se pukárá, Ai Ḳhudáwand maiṉ apní dídgáh par tamám din khaṛá rahá, aur maiṉ ne har rát pahre kí jagah par káṭí. 9Aur dekh, sipáhíoṉ ke g̣ol aur un ke sawár do do karke áte haiṉ; phir us ne yúṉ kahá, ki Bábul gir paṛá, gir paṛá; aur us ke ma‘búdoṉ kí sab taráshí húí múrateṉ bi’lkull ṭúṭí paṛí haiṉ. 10Ai mere gáhe húe, aur mere khalíhán ke g̣alla, jo kuchh maiṉ ne Rabb u’l afwáj Isráíl ke Ḳhudá se suná, tum se kah diyá.
11Dúmah kí bábat bár i nubuwwat.
Kisí ne mujh ko Sha‘ír se pukárá, ki Ai nigahbán, rát kí kyá ḳhabar hai? Ai nigahbán, rát kí kyá ḳhabar hai? 12Nigahbán ne kahá, Subh hotí hai, aur rát bhí; agar tum púchhná chahte ho, to púchho: tum phir áná.
13‘Arab kí bábat bár nubuwwat.
Ai Dadáníoṉ ke qáfilo, tum ‘Arab ke jangal meṉ rát káṭoge. 14Wuh piyáse ke pás pání láe, Taimá kí sarzamín ke báshinde roṭí lekar bhágnewále se milne ko nikle. 15Kyúṉki wuh talwároṉ ke sámne se, naṉgí talwár se, aur kheṉchí húí kamán se, aur jang kí shiddat se bháge haiṉ. 16Kyúṉki Ḳhudáwand ne mujh se yúṉ farmáyá, ki Mazdúr ke barasoṉ ke mutábiq ek baras ke andar andar Qídár kí sárí hashmat játí rahegí. 17Aur tírandázoṉ kí ta‘dád ká baqiya ya‘ní baní Qídár ke bahádur thoṛe se hoṉge: kyúṉki Ḳhudáwand Isráíl ke Ḳhudá ne yúṉ farmáyá hai.
Currently Selected:
Yasa‘iyáh 21: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
