Yasa‘iyáh 19
19
1Misr kí bábat bár i nubuwwat.
Dekho, Ḳhudáwand ek tezrau bádal par sawár hokar Misr meṉ átá hai, aur Misr ke but us ke huzúr larzán hoṉge, aur Misr ká dil pighal jáegá. 2Aur maiṉ Misríoṉ ko ápas meṉ muḳhálif kar dúṉgá; un meṉ har ek apne bháí se aur har ek apne hamsáye se laṛegá; shahr shahr se aur súba súba se. 3Aur Misr kí rúh afsurda ho jáegí; aur maiṉ us ke mansúbe ko faná karúṉgá; aur wuh butoṉ aur afsúngaroṉ aur jinnát ke yároṉ aur jádúgaroṉ kí talásh kareṉge. 4Par maiṉ Misríoṉ ko ek sitamgar hákim ke qábú meṉ kar dúṉgá; aur zabardast bádsháh un par saltanat karegá; yih Ḳhudáwand, Rabb u’l afwáj, ká farmán hai. 5Aur daryá ká pání sukh jáegá, aur nadí ḳhushk aur ḳhálí ho jáegí. 6Aur nále badbú ho jáeṉge; aur Misr kí nahreṉ ḳhálí hoṉgí aur súkh jáeṉgí, aur bed aur nai murjhá jáeṉge. 7Daryá e Níl ke kanáre kí charágáheṉ, aur wuh sab chízeṉ jo us ke áspás boí játí haiṉ, murjhá jáeṉgí, aur bi’lkull nest o nábúd ho jáeṉgí. 8Tab mahígír mátam kareṉge, aur wuh sab jo daryá meṉ shust ḍálte haiṉ g̣amgín hoṉge; aur pání meṉ jál ḍálnewále niháyat betáb ho jáeṉge. 9Aur san jháṛne aur katán bunnewále ghabrá jáeṉge. 10Háṉ, us ke arkán shikasta aur tamám mazdúr ranjídaḳhátir hoṉge. 11Zu‘an ke sháhzáde bi’lkull ahmaq haiṉ; Fir‘aun ke sab se dánishmand mushíron kí mashwarat wahshiyána ṭhahrí; pas tum kyúṉkar Fir‘aun se kahte ho, ki Maiṉ dánishmandoṉ ká farzand, aur sháhán i qadím kí nasl húṉ? 12Ab tere dánishwar kaháṉ haiṉ? wuh tujhe ḳhabar deṉ; agar wuh jánte hoṉ, ki Rabb u’l afwáj ne Misr ke haqq meṉ kyá iráda kiyá hai. 13Zu‘an ke sháhzáde ahmaq ban gaye haiṉ; Núf ke sháhzádoṉ ne fareb kháyá; aur jin par Misrí qabáil ká bharosá thá, un hí ne un ko gumráh kiyá. 14Ḳhudáwand ne kajrawí kí rúh un meṉ ḍál dí hai: aur unhoṉ ne Misríoṉ ko un ke sab kámoṉ meṉ us matwále kí tarah bhaṭkáyá, jo qai karte húe ḍagmagátá hai. 15Aur Misríoṉ ká koí kám na hogá, jo sir, yá dum, yá ḳháss o ámm kar sake.
16Us waqt Rabb u’l afwáj ke háth chaláne se jo wuh Misr par chaláegá, Misrí ‘auratoṉ kí mánind ho jáeṉge, aur haibatzada aur hirásán hoṉge. 17Tab Yahúdáh ká mulk Misr ke liye dahshatnák hogá; har ek jis se us ká zikr ho ḳhauf kháegá, us iráde ke sabab se jo Rabb u’l afwáj ne un ke ḳhiláf kar rakkhá hai.
18Us roz mulk i Misr meṉ páṉch shahr hoṉge, jo Kan‘ání zabán boleṉge, aur Rabb u’l afwáj kí qasam kháeṉge; un meṉ se ek ká nám shahr i áftáb hogá.
19Us waqt mulk i Misr ke wasat meṉ Ḳhudáwand ká ek mazbah, aur us kí sarhadd par Ḳhudáwand ká ek sutún hogá. 20Aur wuh mulk i Misr meṉ Rabb u’l afwáj ke liye nishán aur gawáh hogá; is liye ki wuh sitamgaroṉ ke zulm se Ḳhudáwand se faryád kareṉge, aur wuh un ke liye riháí denewálá aur hámí bhejegá, aur wuh un ko riháí degá. 21Aur Ḳhudáwand apne áp ko Misríoṉ par záhir karegá, aur us waqt Misrí Ḳhudáwand ko pahcháneṉge, aur zabíhe aur hadye guzráneṉge; háṉ, wuh Ḳhudáwand ke liye mannat máneṉge aur adá kareṉge. 22Aur Ḳhudáwand Misríoṉ ko máregá, máregá aur shifá baḳhshegá; aur wuh Ḳhudáwand kí taraf rujú‘ láeṉge, aur wuh un kí du‘á sunegá, aur un ko sihhat baḳhshegá.
23Us waqt Misr se Asúr tak ek sháhráh hogí, aur Asúrí Misr meṉ áeṉge, aur Misrí Asúr ko jáeṉge; aur Misrí Asúríon ke sáth milkar ‘ibádat kareṉge.
24Tab Isráíl Misr aur Asúr ke sáth tísrá hogá, aur rú e zamín par barakat ká bá‘is ṭhahregá. 25Kyúṉki Rabb u’l afwáj un ko barakat baḳhshegá, aur farmáegá, Mubarak ho Misr merí ummat, Asúr mere háth kí san‘at, aur Isráíl merí mírás.
Currently Selected:
Yasa‘iyáh 19: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
