Húsí‘a 5
5
1Ai káhino, yih bát suno; ai baní Isráíl kán lagáo; ai bádsháh ke gharáne, suno, is liye ki fatwá tum par hai; kyúṉki tum Misfáh men phandá, aur Tabúr par dám bane ho. 2Bág̣í ḳhúnrezí meṉ g̣arq haiṉ; lekin maiṉ un sab kí tádíb karúṉgá. 3Maiṉ Ifráím ko jántá hún, aur Isráíl bhí mujh se chhipá nahíṉ; kyúṉki, ai Ifráím, tú ne badkárí kí hai; Isráíl najis húá. 4Un ke a‘mál un ko Ḳhudá kí taraf rujú‘ nahíṉ hone dete; kyúṉki badkárí kí rúh un meṉ maujúd hai, aur wuh Ḳhudáwand ko nahíṉ jánte. 5Aur faḳhr i Isráíl us ke muṉh par gawáhí detá hai, aur Isráíl aur Ifráím apní badkirdárí meṉ gireṉge, aur Yahúdáh bhí un ke sáth giregá. 6Wuh apne rewaṛoṉ aur galloṉ ke wasíle se Ḳhudáwand ke tálib hoṉge, lekin us ko na páeṉge; wuh un se dúr ho gayá hai. 7Unhoṉ ne Ḳhudáwand ke sáth bewafáí kí; kyúṉki un se ajnabí bachche paidá húe; ab ek mahíne ká ‘arsa un kí jáedád samet un ko khá jáegá.
8Jibi‘ah meṉ qarná phúṉko, aur Rámah meṉ turhí; Bait Áwan meṉ lalkáro, ki Ai Binyamín, ḳhabardár, píchhe dekh. 9Tádíb ke din Ifráím wírán hogá: jo kuchh yaqínan honewálá hai, maiṉ ne Isráílí qabáil ko jatá diyá hai. 10Yahúdáh ke umará sarhaddoṉ ko sarkánewáloṉ kí mánind haiṉ; maiṉ un par apná qahr pání kí tarah unḍelúṉgá. 11Ifráím mazlúm aur fatwá se dabá hai, kyúṉki us ne taqlíd par qaná‘at kí. 12Pas maiṉ Ifráím ke liye kíṛá húṉgá, aur Yahúdáh ke gharáne ke liye ghun. 13Jab Ifráím ne apní bímárí, aur Yahúdáh ne apne zaḳhm ko dekhá, to Ifráím Asúr ko gayá aur us muḳhálif bádsháh ko da‘wat dí, lekin wuh na tum ko shifá de saktá hai, aur na tumháre zaḳhm ká indimál kar saktá hai. 14Kyúṉki maiṉ Ifráím ke liye sher i babar aur baní Yahúdáh ke liye jawán sher kí mánind húṉgá; maiṉ, háṉ, maiṉ hí pháṛúṉgá, aur chalá jáúṉgá; maiṉ uṭhá le jáúṉgá, aur koí chhuṛánewálá na hogá. 15Maiṉ rawána húṉgá aur apne maskan ko chalá jáúṉgá, jab tak ki wuh apne gunáhoṉ ká iqrár karke mere chihre ke tálib na hoṉ; wuh apní musíbat meṉ baṛí sargarmí se mere tálib hoṉge.
Currently Selected:
Húsí‘a 5: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
