Húsí‘a 6
6
1Áo, ham Ḳhudáwand kí taraf rujú‘ kareṉ; kyúṉki usí ne pháṛá hai, aur wuhí ham ko shifá baḳhshegá; usí ne márá hai, aur wuhí hamárí marhampaṭṭí karegá. 2Wuh do roz ke ba‘d ham ko hayát i táza baḳhshegá, aur tísre roz uṭhá khaṛá karegá, aur ham us ke huzúr zindagí basar kareṉge. 3Áo, ham daryáft kareṉ, aur Ḳhudá ke ‘irfán meṉ taraqqí kareṉ; us ká zuhúr subh kí mánind yaqíní hai, aur wuh hamáre pás barsát kí mánind, ya‘ní áḳhirí barsát kí mánind jo zamín ko seráb kartí hai, áegá.
4Ai Ifráím, maiṉ tujh se kyá karúṉ? Ai Yahúdáh, maiṉ tujh se kyá karúṉ? kyúṉki tumhárí nekí subh ke bádal aur shabnam kí mánind jald játí rahtí hai. 5Is liye maiṉ ne un ko nabíoṉ ke wasíle se káṭ ḍálá, aur apne kalám se qatl kiyá hai: aur merá ‘adl núr kí mánind chamaktá hai. 6Kyúṉki maiṉ qurbání nahíṉ balki rahm pasand kartá húṉ, aur Ḳhudáshinásí ko soḳhtaní qurbáníoṉ se ziyáda cháhtá húṉ. 7Lekin wuh ‘ahdshikan ádmíoṉ kí mánind haiṉ; unhoṉ ne waháṉ mujh se bewafáí kí hai. 8Jili‘ád badkirdárí kí bastí hai; wuh ḳhúnálúda hai. 9Jis tarah se rahzanoṉ ke g̣ol kisí ádmí kí ghát meṉ baiṭhte haiṉ, usí tarah káhinoṉ kí guroh Sikm kí ráh meṉ qatl kartí hai; háṉ, unhoṉ ne badkárí kí hai. 10Maiṉ ne Isráíl ke gharáne meṉ ek haulnák chíz dekhí; Ifráím meṉ badkárí páí játí hai, aur Isráíl najis ho gayá. 11Ai Yahúdáh, tere liye bhí kaṭáí ká waqt muqarrar hai, jab maiṉ apne logoṉ ko asírí se wápas láúṉgá.
Currently Selected:
Húsí‘a 6: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
