Húsí‘a 4
4
1Ai baní Isráíl, Ḳhudáwand ká kalám suno; kyúṉki is mulk ke rahnewáloṉ se Ḳhudáwand ká jhagṛá hai; kyúṉki yih mulk rástí o shafaqat, aur Ḳhudáshinásí se ḳhálí hai. 2Badzabání, ‘ahdshikaní, aur ḳhúnrezí, aur chorí, aur harámkárí ke siwá âur kuchh nahíṉ hotá; wuh zulm karte haiṉ, aur ḳhún par ḳhún hotá hai. 3Is liye mulk mátam karegá, aur us ke tamám báshinde janglí jánwaroṉ aur hawá ke parandoṉ samet nátawán ho jáeṉge, balki samundar kí machhliyáṉ bhí g̣áib ho jáeṉgí. 4Taubhí koí dúsre ke sáth bahs na kare, aur na koí use ilzám de; kyúṉki tere log un kí mánind haiṉ jo káhin se bahs karte haiṉ. 5Is liye tú din ko gir paṛegá, aur tere sáth nabí bhí rát ko giregá, aur maiṉ terí máṉ ko tabáh karúṉgá. 6Mere log ‘adam i ma‘rifat se halák húe; chúṉki tú ne ma‘rifat ko radd kiyá, is liye maiṉ bhí tujh ko radd karúṉgá, táki tú mere huzúr káhin na ho; aur chúṉki tú apne Ḳhudá kí sharí‘at ko bhúl gayá hai, is liye maiṉ bhí terí aulád ko bhúl jáúṉgá. 7Júṉ júṉ wuh firáwán húe mere ḳhiláf ziyáda gunáh karne lage; pas maiṉ un kí hashmat ko ruswáí se badal ḍálúṉgá. 8Wuh mere logoṉ ke gunáh par guzrán karte haiṉ, aur un kí badkirdárí ke árzúmand haiṉ. 9Pas jaisá logoṉ ká hál waisá hí káhinoṉ ká hál hogá; maiṉ un kí rawish kí sazá, aur un ke a‘mál ká badla un ko dúṉgá. 10Chúṉki un ko Ḳhudáwand ká ḳhayál nahíṉ, is liye wuh kháeṉge, par ásúda na hoṉge; wuh badkárí kareṉge, lekin ziyáda na hoṉge. 11Badkárí, aur mai, aur nayí mai se basírat játí rahtí hai. 12Mere log apne káṭh ke putle se suwál karte haiṉ, un ká laṭh un ko jawáb detá hai; kyúṉki badkárí kí rúh ne un ko gumráh kiyá hai, aur apne Ḳhudá kí panáh ko chhoṛkar badkárí karte haiṉ. 13Paháṛoṉ kí choṭiyoṉ par wuh qurbáníáṉ guzránte haiṉ, aur ṭíloṉ par aur balút o chinár o batam ke níche baḳhúr jaláte haiṉ; kyúṉki un ká sáya achchhá hai; pas bahú beṭiyáṉ badkárí kartí haiṉ. 14Jab tumhárí bahú beṭiyáṉ badkárí kareṉgí, to maiṉ un ko sazá na dúṉgá; kyúṉki wuh áp hí badkároṉ ke sáth ḳhalwat meṉ játe haiṉ; aur kasbíoṉ ke sáth qurbáníáṉ guzránte haiṉ; pas jo log dánish se ḳhálí haiṉ, barbád kiye jáeṉge. 15Ai Isráíl, agarchi tú badkárí kare, taubhí aisá na ho ki Yahúdáh bhí gunahgár ho; tum Jiljál meṉ na áo, aur Bait Áwan par na jáo, aur Ḳhudáwand kí hayát kí qasam na kháo. 16Kyúṉki Isráíl ne sarkash bachhiyá kí mánind sarkashí kí hai; ab Ḳhudáwand un ko kusháda jagah meṉ barre kí mánind charáegá. 17Ifráím butoṉ se mil gayá hai; use chhoṛ do. 18Wuh maiḳhwárí se ser hokar badkárí meṉ mashg̣úl hote haiṉ, us ke hákim ruswáídost haiṉ. 19Hawá ne use apne dáman meṉ uṭhá liyá; wuh apní qurbáníoṉ se sharminda hoṉge.
Currently Selected:
Húsí‘a 4: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
