Ḳhurúj 37
37
1Aur Bazalíel ne wuh sandúq kíkar kí lakṛí ká banáyá. Us kí lambáí ḍháí háth aur chauṛáí ḍeṛh háth, aur úṉcháí ḍeṛh háth thí. 2Aur us ne us ke andar aur báhar ḳhális soná manḍhá, aur us ke liye girdágird ek sone ká táj banáyá. 3Aur us ne us ke chároṉ páyoṉ par lagáne ko sone ke chár kaṛe ḍhále. Do kaṛe to us kí ek taraf, aur do dúsrí taraf the. 4Aur us ne kíkar kí lakṛí kí chobeṉ banákar un ko sone se manḍhá. 5Aur un choboṉ ko sandúq kí donoṉ taraf ke kaṛoṉ meṉ ḍálá, táki sandúq uṭháyá jáe. 6Aur us ne sarposh ḳhális sone ká banáyá. Us kí lambáí ḍháí háth aur chauṛáí ḍeṛh háth thí. 7Aur us ne sarposh ke donoṉ siroṉ par sone ke do karúbí ghaṛkar banáe; 8ek karúbí ko us ne ek sire par rakkhá, aur dúsre ko dúsre sire par. Donoṉ siroṉ ke karúbí aur sarposh ek hí ṭukṛe se bane the. 9Aur karúbíoṉ ke bázú úpar se phaile húe the, aur un ke bázúoṉ se sarposh ḍhaká húá thá; aur un karúbíoṉ ke chihre sarposh kí taraf aur ek dúsre ke muqábil the.
10Aur us ne wuh mez kíkar kí lakṛí kí banáí. Us kí lambáí do háth, aur chauṛáí ek háth, aur úṉcháí ḍeṛh háth thí. 11Aur us ko ḳhális sone se manḍhá, aur us ke liye girdágird sone ká ek táj banáyá. 12Aur us ne ek kangní chár ungal chauṛí us ke chároṉ taraf rakkhí, aur us kangní par girdágird sone ká ek táj banáyá. 13Aur us ne us ke liye sone ke chár kaṛe ḍhálkar un ko us ke chároṉ páyoṉ ke chároṉ konoṉ meṉ lagáyá: 14yih kaṛe kangní ke pás the, táki mez uṭháne kí choboṉ ke ḳhánoṉ ká kám deṉ. 15Aur us ne mez uṭháne kí wuh chobeṉ kíkar kí lakṛí kí banáíṉ, aur un ko sone se manḍhá. 16Aur us ne mez par ke sab zurúf, ya‘ní us ke tabáq, aur chamche, aur baṛe baṛe piyále, aur unḍelne ke áftábe ḳhális sone ke banáe.
17Aur us ne sham‘adán ḳhális sone ká banáyá. Wuh sham‘adán aur us ká páya aur us kí ḍaṉḍí ghaṛe húe the. Yih sab aur us kí piyáliyáṉ, aur laṭtú, aur phúl ek hí ṭukṛe ke bane húe the. 18Aur chha sháḳheṉ us kí donoṉ taraf se niklí húí thíṉ. Sham‘adán kí tín sháḳheṉ to us kí ek taraf se, aur tín sháḳheṉ us kí dúsrí taraf se. 19Aur ek sháḳh meṉ bádám ke phúl kí shakl kí tín piyáliyáṉ aur ek laṭṭú aur ek phúl thá, aur dúsrí sháḳh meṉ bhí bádám ke phúl kí shakl kí tín piyáliyáṉ aur ek laṭṭú aur ek phúl thá. G̣araz, us sham‘adán kí chhaoṉ sháḳhoṉ meṉ sab kuchh aisá hí thá. 20Aur ḳhud sham‘adán meṉ bádám ke phúl kí shakl kí chár piyáliyáṉ apne apne laṭṭú aur phúl samet baní thíṉ. 21Aur sham‘adán kí chhaoṉ niklí húí sháḳhoṉ meṉ se har do do sháḳheṉ aur ek ek laṭṭú ek hí ṭukṛe ke the. 22Un ke laṭṭú aur un kí sháḳheṉ sab ek hí ṭukṛe ke the. Sárá sham‘adán ḳhális sone ká aur ek hí ṭukṛe ká ghaṛá húá thá. 23Aur us ke liye sát chirág̣ banáe, aur us ke gulgír aur guldán ḳhális sone ke the. 24Aur us ne us ko, aur us ke sab zurúf ko, ek qintár ḳhális sone se banáyá.
25Aur us ne baḳhúr jaláne kí qurbángáh kíkar kí lakṛí kí banáí. Us kí lambáí ek háth, aur chauṛáí ek háth thí. Wuh chaukhúṉṭí thí, aur us kí úṉcháí do háth thí, aur wuh aur us ke síṉg ek hí ṭukṛe ke the. 26Aur us ne us ke úpar kí sath, aur girdágird kí atráf aur síṉgoṉ ko ḳhális sone se manḍhá, aur us ke liye sone ká ek táj girdágird banáyá. 27Aur us ne us kí donoṉ taraf ke donoṉ pahlúoṉ meṉ táj ke níche sone ke do kaṛe banáe, jo us ke uṭháne kí choboṉ ke liye ḳhánoṉ ká kám deṉ. 28Aur chobeṉ kíkar kí lakṛí kí banáíṉ, aur un ko sone se manḍhá. 29Aur us ne masah karne ká pák tel, aur ḳhushbúdár masálih ká ḳhális baḳhúr gandhí kí hikmat ke mutábiq taiyár kiyá;
Currently Selected:
Ḳhurúj 37: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
