Ḳhurúj 38
38
1aur soḳhtaní qurbání ká mazbah kíkar kí lakṛí ká banáyá. Us kí lambáí páṉch háth, aur chauṛáí páṉch háth thí. Wuh chaukhúṉṭá thá, aur us kí úṉcháí tín háth thí. 2Aur us ne us ke chároṉ konoṉ par síṉg banáe. Síṉg aur wuh mazbah donoṉ ek hí ṭukṛe ke the, aur us ne us ko pítal se manḍhá. 3Aur us ne mazbah ke sab zurúf, ya‘ní degeṉ, aur belche, aur kaṭore, aur síḳheṉ, aur angíṭhiyáṉ banáíṉ. Us ke sab zurúf pítal ke the. 4Aur us ne mazbah ke liye us kí chároṉ taraf kanáre ke níche pítal kí jálí kí jhanjarí is tarah lagáí, ki wuh us kí ádhí dúr tak pahuṉchtí thí. 5Aur us ne pítal kí jhanjarí ke chároṉ konoṉ meṉ lagáne ke liye chár kaṛe ḍhále, táki choboṉ ke liye ḳhánoṉ ká kám deṉ. 6Aur chobeṉ kíkar kí lakṛí kí banákar un ko pítal se manḍhá. 7Aur us ne wuh chobeṉ mazbah kí donoṉ taraf ke kaṛoṉ meṉ us ke uṭháne ke liye ḍál díṉ. Wuh khokhlá taḳhtoṉ ká baná húá thá.
8Aur jo ḳhidmatguzár ‘aurateṉ ḳhaima e ijtimá‘ ke darwáze par ḳhidmat kartí thíṉ, un ke áínoṉ ke pítal se us ne pítal ká hauz aur pítal hí kí us kí kursí banáí.
9Phir us ne sahn banáyá, aur junúbí simt ke liye us sahn ke parde bárík baṭe húe katán ke the; aur sab milákar sau háth lambe the. 10Un ke liye bís sutún, aur un ke wáste pítal ke bís ḳháne the; aur sutúnoṉ ke kunḍe aur paṭṭiyáṉ chándí kí thíṉ. 11Aur shimálí simt meṉ bhí wuh sau háth lambe, aur un ke liye bís sutún aur un ke wáste bís hí pítal ke ḳháne the; aur sutúnoṉ ke kunḍe aur paṭṭiyáṉ chándí kí thíṉ. 12Aur mag̣ribí simt ke liye sab parde milákar pachás háth ke the. Un ke liye das sutún aur das hí un ke ḳháne the; aur sutúnoṉ ke kunḍe aur paṭṭiyáṉ chándí kí thíṉ. 13Aur mashriqí simt meṉ bhí wuh pachás hí háth ke the. 14Us ke darwáze kí ek taraf pandrah háth ke parde, aur un ke liye tín sutún aur tín ḳháne the. 15Aur dúsrí taraf bhí waisá hí thá. Pas sahn ke darwáze ke idhar aur udhar pandrah pandrah háth ke parde the. Un ke liye tín tín sutún aur tín hí tín ḳháne the. 16Sahn ke girdágird ke sab parde bárík baṭe húe katán ke bune húe the. 17Aur sutúnoṉ ke ḳháne pítal ke, aur un ke kunḍe aur paṭṭiyáṉ chándí kí thíṉ. Un ke sire chándí se manḍhe húe; aur sahn ke kull sutún chándí kí paṭṭiyoṉ se jaṛe húe the. 18Aur sahn ke darwáze ke parde par bel búṭe ká kám thá; aur wuh ásmání, aur arg̣awání, aur surḳh rang ke kapṛoṉ aur bárík baṭe húe katán ká buná húá thá. Us kí lambáí bís háth, aur úṉcháí sahn ke pardoṉ kí chauṛáí ke mutábiq páṉch háth thí. 19Un ke liye chár sutún aur chár hí un ke wáste pítal ke ḳháne the. Un ke kunḍe chándí ke the, aur un ke siroṉ par chándí manḍhí húí thí, aur un kí paṭṭiyáṉ bhí chándí kí thíṉ. 20Aur maskan kí aur sahn ke girdágird kí sab meḳheṉ pítal kí thíṉ.
21Aur maskan, ya‘ní maskan i shahádat ke jo sámán Láwíoṉ kí ḳhidmat ke liye bane, aur jin ko Músá ke hukm ke mutábiq Hárún káhin ke beṭe Itamar ne giná, un ká hisáb yih hai. 22Bazalíel bin Úrí bin Húr ne, jo Yahúdáh ke qabíle ká thá, sab kuchh, jo Ḳhudáwand ne Músá ko farmáyá thá, banáyá. 23Aur us ke sáth Dán ke qabíle ká Ahlíáb bin Aḳhísamak thá, jo kandakár aur máhir kárígar thá, aur ásmání, aur arg̣awání, aur surḳh rang ke kapṛoṉ, aur bárík katán par bel búṭe káṛhtá thá.
24Sab soná, jo maqdis kí chízoṉ ke kám meṉ lagá, ya‘ní hadye ká soná, untís qintár, aur maqdis kí misqál ke hisáb se sát sau tís misqál thá. 25Aur jamá‘at meṉ se gine húe logoṉ ke hadye kí chándí ek sau qintár, aur maqdis kí misqál ke hisáb se ek hazár sát sau pachhattar misqál thí. 26Maqdis kí misqál ke hisáb se fí ádmí jo nikalkar shumár kiye húoṉ meṉ mil gayá, ek bíká, ya‘ní ním misqál, bís baras aur us se ziyáda ‘umr ke logoṉ se liyá gayá thá. Yih chha lákh tín hazár sáṛhe páṉch sau mard the. 27Is sau qintár chándí se maqdis ke aur bích ke parde ke ḳháne ḍhále gaye; sau qintár se sau hí ḳháne bane, ya‘ní ek ek qintár ek ek ḳháne meṉ lagá. 28Aur un ke ek hazár sát sau pachhattar misqál chándí se sutúnoṉ ke kunḍe bane, aur un ke sire manḍhe gaye, aur un ke liye paṭṭiyáṉ taiyár húíṉ. 29Aur hadye ká pítal sattar qintár aur do hazár chár sau misqál thá. 30Is se us ne ḳhaima e ijtimá‘ ke darwáze ke ḳháne aur pítal ká mazbah, aur us ke liye pítal kí jhanjarí aur mazbah ke sáre zurúf, 31aur sahn ke girdágird ke ḳháne, aur sahn ke darwáze ke ḳháne, aur maskan kí meḳheṉ, aur sahn ke chároṉ taraf kí meḳheṉ banáíṉ.
Currently Selected:
Ḳhurúj 38: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
