Ḳhurúj 36
36
1Pas Bazalíel, aur Ahlíáb, aur sab raushanzamír ádmí kám kareṉ, jin ko Ḳhudáwand ne hikmat aur fahm se málámál kiyá hai, táki wuh maqdis kí ‘ibádat ke sab kám ko Ḳhudáwand ke hukm ke mutábiq anjám deṉ.
2Tab Músá ne Bazalíel aur Ahlíáb, aur sab raushanzamír ádmíoṉ ko buláyá, jin ke dil meṉ Ḳhudáwand ne hikmat bhar dí thí, ya‘ní jin ke dil meṉ tahrík húí ki jákar kám kareṉ. 3Aur jo jo hadye baní Isráíl láe the, ki un se maqdis kí ‘ibádat kí chízeṉ banáí jáeṉ, wuh sab unhoṉ ne Músá se le liye; aur log phir bhí apní ḳhushí se har subh us ke pás hadya láte rahe. 4Tab wuh sab ‘aqlmand kárígar, jo maqdis ke sab kám baná rahe the, apne apne kám ko chhoṛkar Músá ke pás áe. 5Aur wuh Músá se kahne lage, ki Log is kám ke saranjám ke liye, jis ke banáne ká hukm Ḳhudáwand ne diyá hai, zarúrat se bahut ziyáda le áe haiṉ. 6Tab Músá ne jo hukm diyá, us ká i‘lán unhoṉ ne tamám lashkargáh meṉ kará diyá; ki koí mard yá ‘aurat ab se maqdis ke liye hadya dene kí g̣araz se kuchh âur kám na banáe. Yúṉ wuh log âur láne se rok diye gaye. 7Kyúṉki jo sámán un ke pás pahuṉch chuká thá, wuh sáre kám ko taiyár karne ke liye, na faqat káfí, balki ziyáda thá.
8Aur kám karnewáloṉ meṉ jitne raushanzamír the, unhoṉ ne maqdis ke wáste bárík baṭe húe katán ke, aur ásmání, aur arg̣awání, aur surḳh rang ke kapṛoṉ ke das parde banáe, jin par máhir ustád ke háth ke kaṛhe húe karúbí the. 9Har parde kí lambáí aṭháís háth, aur chauṛáí chár háth thí; aur wuh sab parde ek hí náp ke the. 10Aur us ne páṉch parde ek dúsre ke sáth joṛ diye, aur dúsre páṉch parde bhí ek dúsre ke sáth joṛ diye. 11Aur us ne ek baṛe parde ke háshiye meṉ us ke miláne ke ruḳh par ásmání rang ke tukme banáe. Aise hí tukme us ne dúsre baṛe parde kí us taraf ke háshiye meṉ banáe, jidhar miláne ká ruḳh thá. 12Pachás tukme us ne ek parde meṉ, aur pachás hí dúsre parde ke háshiye meṉ us ke miláne ke ruḳh par banáe. Yih tukme ápas meṉ ek dúsre ke muqábil the. 13Aur us ne sone kí pachás ghunḍiyáṉ banáíṉ, aur un hí ghunḍiyoṉ se pardoṉ ko ápas meṉ aisá joṛ diyá, ki maskan milkar ek ho gayá. 14Aur bakrí ke báloṉ se gyárah parde maskan ke úpar ke ḳhaime ke liye banáe. 15Har parde kí lambáí tís háth, aur chauṛáí chár háth thí; aur wuh gyárah parde ek hí náp ke the. 16Aur us ne páṉch parde to ek sáth joṛe aur chha ek sáth. 17Aur pachás tukme, un juṛe húe pardoṉ meṉ se kanáre ke parde ke háshiye meṉ banáe, aur pachás hí tukme un dúsre juṛe húe pardoṉ meṉ se kanáre ke parde ke háshiye meṉ banáe. 18Aur us ne pítal kí pachás ghunḍiyáṉ bhí banáíṉ, táki un se us ḳhaime ko aisá joṛ de, ki wuh ek ho jáe. 19Aur ḳhaime ke liye ek g̣iláf meṉḍhoṉ kí surḳh rangí húí kháloṉ ká, aur us ke liye g̣iláf tuḳhas kí kháloṉ ká banáyá.
20Aur maskan ke wáste kíkar kí lakṛí ke taḳhte banáe ki khaṛe kiye jáeṉ. 21Har taḳhte kí lambáí das háth, aur chauṛáí ḍeṛh háth thí. 22Aur us ne ek ek taḳhte ke liye do do juṛí húí chúleṉ banáíṉ. Maskan ke sab taḳhtoṉ kí chúleṉ aisí hí banáíṉ. 23Aur maskan ke liye jo taḳhte bane the, un meṉ se bís taḳhte junúbí simt meṉ lagáe. 24Aur us ne un bíson taḳhtoṉ ke níche chándí ke chálís ḳháne banáe, ya‘ní har taḳhte kí donoṉ chúloṉ ke liye do do ḳháne. 25Aur maskan kí dúsrí taraf, ya‘ní shimálí simt ke liye bís taḳhte banáe. 26Aur un ke liye bhí chándí ke chálís hí ḳháne banáe, ya‘ní ek ek taḳhte ke níche do do ḳháne. 27Aur maskan ke pichhle hisse, ya‘ní mag̣ribí simt ke liye, chha taḳhte banáe. 28Aur do taḳhte maskan ke donoṉ konoṉ ke liye pichhle hisse meṉ banáe. 29Yih níche se duhre the, aur isí tarah úpar ke sire tak ákar ek hí halqe meṉ milá diye gaye the. Us ne donoṉ konoṉ ke donoṉ taḳhte isí ḍhab ke banáe. 30Pas áṭh taḳhte the, aur un ke liye chándí ke solah ḳháne, ya‘ní ek ek taḳhte ke liye do do ḳháne. 31Aur us ne kíkar kí lakṛí ke beṉḍe banáe, páṉch beṉḍe maskan kí ek taraf ke taḳhtoṉ ke liye, 32aur páṉch beṉḍe maskan kí dúsrí taraf ke taḳhtoṉ ke liye; aur páṉch beṉḍe maskan ke pichhle hisse meṉ mag̣ribí taraf ke taḳhtoṉ ke liye banáe. 33Aur us ne wasatí beṉḍe ko aisá banáyá, ki taḳhtoṉ ke bích meṉ se hokar ek sire se dúsre sire tak pahuṉche. 34Aur taḳhtoṉ ko sone se manḍhá aur sone ke kaṛe banáe, táki beṉḍoṉ ke liye ḳhánoṉ ká kám deṉ; aur beṉḍoṉ ko sone se manḍhá.
35Aur bích ká parda ásmání, arg̣awání, aur surḳh rang ke kapṛoṉ aur bárík baṭe húe katán ká banáyá, jis par máhir ustád ke háth ke karúbí kaṛhe húe the. 36Aur us ke liye kíkar ke chár sutún banáe, aur un ko sone se manḍhá. Un ke kunḍe sone ke the, aur us ne un ke liye chándí ke chár ḳháne ḍhálkar banáe. 37Aur us ne ḳhaime ke darwáze ke liye ek parda ásmání, arg̣awání, aur surḳh rang ke kapṛoṉ aur bárík baṭe húe katán ká banáyá; wuh bel búṭedár thá. 38Aur us ke liye páṉch sutún kunḍoṉ samet banáe, aur un ke siroṉ aur paṭṭiyoṉ ko sone se manḍhá. Un ke liye jo páṉch ḳháne the, wuh pítal ke bane húe the.
Currently Selected:
Ḳhurúj 36: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
