Ḳhurúj 35
35
1Aur Músá ne baní Isráíl kí sárí jamá‘at ko jama‘ karke kahá, Jin bátoṉ par ‘amal karne ká hukm Ḳhudáwand ne tum ko diyá hai, wuh yih haiṉ. 2Chha din kám káj kiyá jáe, lekin sátwáṉ din tumháre liye roz i muqaddas, ya‘ní Ḳhudáwand ke árám ká sabt ho; jo koí us meṉ kuchh kám kare, wuh már ḍálá jáe. 3Tum sabt ke din apne apne gharoṉ meṉ kahíṉ bhí ág na jaláná.
4Aur Músá ne baní Isráíl kí sárí jamá‘at se kahá, Jis bát ká hukm Ḳhudáwand ne diyá hai, wuh yih hai, ki 5tum apne pás se Ḳhudáwand ke liye hadya láyá karo. Jis kisí ke dil kí ḳhushí ho, wuh Ḳhudáwand ká hadya láe; soná, aur chándí, aur pítal, 6aur ásmání rang, aur arg̣awání rang, aur surḳh rang ke kapṛe, aur mihín katán, aur bakriyoṉ kí pashm, 7aur meṉḍhoṉ kí surḳh rangí húí kháleṉ, aur tuḳhas kí kháleṉ, aur kíkar kí lakṛí, 8aur jaláne ká tel, aur masah karne ke tel ke liye aur ḳhushbúdár baḳhúr ke liye masálih, 9aur afod aur sínaband ke liye sulaimání patthar, aur âur jaṛáú patthar. 10Aur tumháre darmiyán jo raushanzamír haiṉ, wuh ákar wuh chízeṉ banáeṉ, jin ká hukm Ḳhudáwand ne diyá hai; 11ya‘ní maskan aur us ká ḳhaima aur g̣iláf aur us kí ghunḍiyáṉ; aur taḳhte, aur beṉḍe, aur us ke sutún, aur ḳháne; 12sandúq aur us kí chobeṉ; sarposh, aur bích ká parda; 13mez aur us kí chobeṉ, aur us ke sab zurúf; aur nazr kí roṭiyáṉ; 14aur raushní ke liye sham‘adán, aur us ke bartan, aur chirág̣, aur jaláne ká tel; 15aur baḳhúr jaláne kí qurbángáh, aur us kí chobeṉ, aur masah karne ká tel, aur ḳhushbúdár baḳhúr; aur maskan ke darwáze ke liye darwáze ká parda; 16aur soḳhtaní qurbání ká mazbah, aur us ke liye pítal kí jhanjrí aur us kí chobeṉ, aur us ke sab zurúf; aur hauz, aur us kí kursí; 17aur sahn ke parde sutúnoṉ samet, aur un ke ḳháne; aur sahn ke darwáze ká parda; 18aur maskan kí meḳheṉ, aur sahn kí meḳheṉ, aur un donoṉ kí rassiyáṉ; 19aur maqdis kí ḳhidmat ke liye bel búṭe kaṛhe húe libás; aur Hárún káhin ke liye muqaddas libás, aur us ke beṭoṉ ke libás, táki wuh káhin kí ḳhidmat ko anjám deṉ.
20Tab baní Isráíl kí sárí jamá‘at Músá ke pás se ruḳhsat húí. 21Aur jis jis ká jí cháhá, aur jis jis ke dil meṉ rag̣bat húí, wuh ḳhaima e ijtimá‘ ke kám aur waháṉ kí ‘ibádat aur muqaddas libás ke liye Ḳhudáwand ká hadya láyá. 22Aur kyá mard, kyá ‘aurat, jitnoṉ ká dil cháhá, wuh sab jugnúṉ báliyáṉ, angushtaríyáṉ, aur bázúband, jo sab sone ke zewar the, láne lage. Is taríqe se logoṉ ne Ḳhudáwand ko sone ká hadya diyá. 23Aur jis jis ke pás ásmání rang, aur arg̣awání rang, aur surḳh rang ke kapṛe, aur mihín katán, aur bakriyoṉ kí pashm, aur meṉḍhoṉ kí surḳh rangí húí kháleṉ, aur tuḳhas kí kháleṉ thíṉ, wuh un ko le áe. 24Jis ne chándí yá pítal ká hadya dená cháhá, wuh waisá hí hadya Ḳhudáwand ke liye láyá; aur jis kisí ke pás kíkar kí lakṛí thí, wuh usí ko le áyá. 25Aur jitní ‘aurateṉ hoshyár thíṉ, unhoṉ ne apne háthoṉ se kát kátkar ásmání, aur arg̣awání, aur surḳh rang ke, aur mihín katán ke tár lákar diye. 26Aur jitní ‘auratoṉ ke dil hikmat kí taraf máil the, unhoṉ ne bakriyoṉ kí pashm kátí. 27Aur jo sardár the, wuh afod aur sínaband ke liye sulaimání patthar, aur âur jaṛáú patthar, 28aur raushní aur masah karne ke tel, aur ḳhushbúdár baḳhúr ke liye masálih aur tel láe. 29Yúṉ baní Isráíl apní hí ḳhushí se Ḳhudáwand ke liye hadye láe; ya‘ní jis jis mard yá ‘aurat ká jí cháhá, ki in kámoṉ ke liye jin ke banne ká hukm Ḳhudáwand ne Músá kí ma‘rifat diyá thá, kuchh de, wuh unhoṉ ne diyá.
30Aur Músá ne baní Isráíl se kahá: Dekho, Ḳhudáwand ne Bazalíel bin Úrí bin Húr ko, jo Yahúdáh ke qabíle meṉ se hai, nám lekar buláyá hai. 31Aur us ne use hikmat, aur fahm, aur dánish, aur har tarah kí san‘at ke liye rúhu’lláh se ma‘múr kiyá hai. 32Aur san‘atkárí meṉ, aur sone, aur chándí aur pítal ke kám meṉ, 33aur jaṛáú patthar aur lakṛí ke taráshne meṉ, g̣araz har ek nádir kám ke banáne meṉ, máhir kiyá hai. 34Aur us ne use, aur Aḳhísamak ke beṭe Ahlíáb ko bhí, jo Dán ke qabíle ká hai, hunar sikháne kí qábiliyat baḳhshí hai; 35aur un ke diloṉ meṉ aisí hikmat bhar dí hai, jis se wuh har tarah kí san‘at meṉ máhir hoṉ, aur kandakár ká, aur máhir ustád ká, aur zardoz ká, jo ásmání, arg̣awání, aur surḳh rang ke kapṛoṉ, aur mihín katán par gulkárí kartá hai, aur juláhe ká, aur har tarah ke dastkár ká kám kar sakeṉ, aur ‘ajíb aur nádir chízeṉ íjád kareṉ.
Currently Selected:
Ḳhurúj 35: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
