‘Ámús 8
8
1Ḳhudáwand Ḳhudá ne mujhe royá dikháí, aur kyá dekhtá húṉ, ki tábistání mewoṉ kí ṭokrí hai. 2Aur us ne farmáyá, Ai ‘Ámús, tú kyá dekhtá hai? Maiṉ ne ‘arz kí, ki Tábistání mewoṉ kí ṭokrí. Tab Ḳhudáwand ne mujhe farmáyá, ki Merí qaum Isráíl ká waqt á pahuṉchá hai; ab maiṉ us se darguzar na karúṉgá. 3Aur us waqt maqdis ke nag̣me nauhe ho jáeṉge, Ḳhudáwand Ḳhudá farmátá hai; já ba já bahut sí lásheṉ paṛí hoṉgí; wuh chupke chupke un ko nikál pheṉkeṉge. 4Tum jo cháhte ho ki muhtájoṉ ko nigal jáo, aur miskínon ko mulk se nest karo; 5aur aifah ko chhoṭá aur misqál ko baṛá banáte, aur fareb kí tarázú se dag̣ábází karte, aur kahte ho, ki Naye chánd ká din kab guzregá táki ham g̣alla becheṉ? aur sabt ká din kab ḳhatm hogá ki gehúṉ ke khatte kholeṉ? táki miskín ko rupaye se 6aur muhtáj ko ek joṛí jútiyoṉ se ḳharídeṉ, aur gehúṉ kí phaṭkan becheṉ: yih bát suno! 7Ḳhudáwand ne Ya‘qúb kí hashmat kí qasam khákar farmáyá hai, Maiṉ un ke kámoṉ meṉ se ek ko bhí hargiz na bhúlúṉgá. 8Kyá is sabab se zamín na thartharáegí, aur us ká har ek báshinda mátam na karegá? háṉ, wuh bi’lkull daryá e Níl kí tarah uṭhegí, aur rúd i Misr kí tarah phailkar phir sukaṛ jáegí. 9Aur Ḳhudáwand Ḳhudá farmátá hai, Us roz áftáb do pahar hí ko g̣urúb ho jáegá, aur maiṉ roz i raushan hí meṉ zamín ko tárík kar dúṉgá: 10tumhárí ‘ídoṉ ko mátam se, aur tumháre nag̣moṉ ko nauhoṉ se badal dúṉgá; aur har ek kí kamar par ṭáṭ bandhwáúṉgá, aur har ek ke sir par chandlápan bhejúṉgá; aur aisá mátam barpá karúṉgá, jaisá iklaute beṭe par hotá hai, aur us ká anjám roz i talḳh sá hogá. 11Ḳhudáwand Ḳhudá farmátá hai, Dekho, wuh din áte haiṉ, ki maiṉ is mulk meṉ qaht ḍálúṉgá; na pání kí piyás aur na roṭí ká qaht, balki Ḳhudáwand ká kalám sunne ká; 12tab log samundar se samundar tak, aur shimál se mashriq tak bhaṭakte phireṉge, aur Ḳhudáwand ke kalám kí talásh meṉ idhar udhar dauṛeṉge, lekin kahíṉ na páeṉge. 13Aur us roz hasín kuṉwáriyáṉ aur jawán mard piyás se betáb ho jáeṉge; 14jo Sámariya ke but kí qasam kháte haiṉ, aur kahte haiṉ, Ai Dán, tere ma‘búd kí qasam, aur Baírsaba‘ ke taríq kí qasam, wuh gir jáeṉge, aur phir hargiz na uṭheṉge.
Currently Selected:
‘Ámús 8: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
