‘Ámús 7
7
1Ḳhudáwand Ḳhudá ne mujhe royá dikháí, aur kyá dekhtá húṉ, ki us ne zirá‘at kí áḳhirí roídagí kí ibtidá meṉ ṭiḍḍiyáṉ paidá kíṉ; aur, dekho, yih sháhí kaṭáí ke ba‘d áḳhirí roídagí thí. 2Aur jab wuh zamín kí ghás ko bi’lkull khá chukíṉ, to maiṉ ne ‘arz kí, ki Ai Ḳhudáwand Ḳhudá, mihrbání se mu‘áf farmá: Ya‘qúb kí kyá haqíqat hai, ki wuh qáim rah sake? kyúṉki wuh chhoṭá hai. 3Ḳhudáwand is se báz áyá: aur us ne farmáyá, ki Yúṉ na hogá.
4Phir Ḳhudáwand Ḳhudá ne mujhe royá dikháí, aur kyá dekhtá húṉ, ki Ḳhudáwand Ḳhudá ne ág ko buláyá ki muqábala kare; aur wuh bahr i ‘amíq ko nigal gayí, aur nazdík thá ki zamín ko khá jáe. 5Tab maiṉ ne ‘arz kí, ki Ai Ḳhudáwand Ḳhudá, mihrbání se báz á: Ya‘qúb kí kyá haqíqat hai, ki wuh qáim rah sake? kyúṉki wuh chhoṭá hai. 6Ḳhudáwand is se báz áyá: aur Ḳhudáwand Ḳhudá ne farmáyá, ki Yúṉ bhí na hogá.
7Phir us ne mujhe royá dikháí, aur kyá dekhtá húṉ, ki Ḳhudáwand ek díwár par jo sáhúl se banáí gayí thí khaṛá hai; aur sáhúl us ke háth meṉ hai. 8Aur Ḳhudáwand ne mujhe farmáyá, ki Ai ‘Ámús, tú kyá dekhtá hai? Maiṉ ne ‘arz kí, ki Sáhúl. Tab Ḳhudáwand ne farmáyá, Dekh, maiṉ apní qaum Isráíl meṉ sáhúl laṭkáúṉgá, aur maiṉ phir un se darguzar na karúṉgá. 9Aur Izháq ke úṉche maqám barbád hoṉge, aur Isráíl ke maqdis wírán ho jáeṉge; aur maiṉ Yarubi‘ám ke gharáne ke ḳhiláf talwár lekar uṭhúṉgá.
10Tab Baitel ke káhin ‘Amasiyáh ne sháh i Isráíl Yarubi‘ám ko kahlá bhejá, ki ‘Ámús ne tere ḳhiláf baní Isráíl meṉ fitna barpá kiyá hai, aur mulk meṉ us kí bátoṉ kí bardásht nahíṉ. 11Kyúṉki ‘Ámús yúṉ kahtá hai, ki Yarubi‘ám talwár se márá jáegá, aur Isráíl yaqínan apne watan se asír hokar jáegá. 12Aur Amasiyáh ne ‘Ámús se kahá, Ai g̣aibgo, tú Yahúdáh ke mulk ko bhág já; wahíṉ khá pí, aur nubuwwat kar: 13par Baitel meṉ phir kabhí nubuwwat na karná: kyúṉki yih bádsháh ká maqdis, aur sháhí mahall hai. 14Tab ‘Ámús ne Amasiyáh ko jawáb diyá, ki Maiṉ na nabí húṉ, na nabí ká beṭá; balki charwáhá, aur gúlar ká phal baṭornewálá húṉ. 15Aur jab maiṉ galle ke píchhe píchhe játá thá, to Ḳhudáwand ne mujhe liyá aur farmáyá, ki Já, merí qaum Isráíl se nubuwwat kar. 16Pas ab tú Ḳhudáwand ká kalám sun: Tú kahtá hai, ki Isráíl ke ḳhiláf nubuwwat, aur Izháq ke gharáne ke ḳhiláf kalám na kar: 17is liye Ḳhudáwand yúṉ farmátá hai, Terí bíwí shahr meṉ kasbí banegí, aur tere beṭe aur terí beṭiyáṉ talwár se máre jáeṉge, aur terí zamín jaríb se taqsím kí jáegí, aur tú ek nápák mulk meṉ maregá, aur Isráíl yaqínan apne watan se asír hokar jáegá.
Currently Selected:
‘Ámús 7: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
