‘Ámús 9
9
1Maiṉ ne Ḳhudáwand ko mazbah ke pás khaṛe dekhá, aur us ne farmáyá, Sutúnoṉ ke sir par már, táki ástáne hil jáeṉ, aur un sab ke siroṉ par un ko pára pára kar de; aur un ke baqiye ko maiṉ talwár se qatl karúṉgá: un meṉ se ek bhí bhág na sakegá; un meṉ se ek bhí bach na niklegá. 2Agar wuh pátál meṉ ghus jáeṉ, to merá háth waháṉ se un ko kheṉch nikálegá: aur agar ásmán par chaṛh jáeṉ, to maiṉ waháṉ se un ko utár láúṉgá: 3agar wuh koh i Karmil kí choṭí par já chhipeṉ, to maiṉ un ko waháṉ se ḍhúṉḍh nikálúṉgá; aur agar samundar kí tah meṉ merí nazar se g̣áib ho jáeṉ, to maiṉ waháṉ sáṉp ko hukm karúṉgá, aur wuh un ko káṭegá: 4aur agar dushman un ko asír karke le jáeṉ, to waháṉ talwár ko hukm karúṉgá, aur wuh un ko qatl karegí; aur maiṉ un kí bhaláí ke liye nahíṉ, balki buráí ke liye un par nigáh rakkhúṉgá. 5Kyúṉki Ḳhudáwand Rabb u’l afwáj wuh hai, ki agar zamín ko chhú de, to wuh gudáz ho jáe, aur us kí sab ma‘múrí mátam kare; wuh bi’lkull daryá e Níl kí tarah uṭhe, aur rúd i Misr kí tarah phir sukaṛ jáe. 6Wuhí ásmán par apne báláḳháne ta‘mír kartá hai, usí ne zamín par apne gumbad kí bunyád rakkhí hai; wuh samundar ke pání ko bulákar rú e zamín par phailá detá hai; usí ká nám Ḳhudáwand hai. 7Ḳhudáwand farmátá hai, Ai baní Isráíl, kyá tum mere liye ahl i Kúsh kí aulád kí mánind nahíṉ ho? Kyá maiṉ Isráíl ko mulk i Misr se, aur Filistíoṉ ko Kaftúr se, aur Arámíoṉ ko Qír se nahíṉ nikál láyá húṉ? 8Dekho, Ḳhudáwand Ḳhudá kí áṉkheṉ is gunahgár mamlukat par lagí haiṉ; Ḳhudáwand farmátá hai, maiṉ use rú e zámín se nest o nábúd kar dúṉgá; magar Ya‘qúb ke gharáne ko bi’lkull nábúd na karúṉgá. 9Kyúṉki dekho, maiṉ hukm karúṉgá, aur baní Isráíl ko sab qaumoṉ meṉ, jaise chhalní se chhánte haiṉ, chhánúṉgá; aur ek dána bhí zamín par girne na páegá. 10Merí ummat ke sab gunahgár log, jo kahte haiṉ, ki Ham par na píchhe se áfat áegí aur na áge se, talwár se máre jáeṉge.
11Maiṉ us roz Dáúd ke gire húe maskan ko khaṛá karke us ke raḳhnoṉ ko band karúṉgá; aur us ke khanḍar kí marammat karke use pahle kí tarah ta‘mír karúṉgá; 12táki wuh Adom ke baqiye, aur un sab qaumoṉ par, jo mere nám se kahlátí haiṉ, qábiz hoṉ; is ko wuqú‘ meṉ lánewálá, Ḳhudáwand farmátá hai. 13Dekho, wuh din áte haiṉ, Ḳhudáwand farmátá hai, ki jotnewálá káṭnewále ko aur angúr kuchalnewálá bonewále ko já legá, aur paháṛoṉ se nayí mai ṭapkegí, aur sab ṭíle gudáz hoṉge. 14Aur maiṉ baní Isráíl apne logoṉ ko asírí se wápas láúṉgá, wuh ujṛe shahroṉ ko ta‘mír karke un meṉ búd o básh kareṉge; aur tákistán legákar un kí mai píeṉge; wuh bág̣ lagáeṉge, aur un ke phal kháeṉge. 15Kyúṉki maiṉ un ko un ke mulk meṉ qáim karúṉgá, aur wuh phir kabhí apne watan se, jo maiṉ ne un ko baḳhshá hai, nikále na jáeṉge, Ḳhudáwand terá Ḳhudá farmátá hai.
Currently Selected:
‘Ámús 9: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
