‘Ámús 6
6
1Un par afsos jo Siyyún meṉ bá ráhat, aur kohistán i Sámariya meṉ befikr hain, ya‘ní raís i aqwám ke shurafá, jin ke pás baní Isráíl áte haiṉ. 2Tum Kalnah tak jákar dekho; aur waháṉ se Hamát i a‘zam tak sair karo; aur phir Filistíoṉ ke Ját ko jáo: kyá wuh in mamlukatoṉ se bihtar haiṉ? kyá un kí hudúd tumhárí hudúd se ziyáda wasí‘ haiṉ? 3Tum jo bure din ká ḳhayál multawí karke zulm kí kursí nazdík karte ho; 4jo háthídáṉt ke palang par leṭte, aur chárpáiyoṉ par daráz hote, aur galle meṉ se barroṉ ko aur tawele meṉ se bachhṛoṉ ko lekar kháte ho; 5aur rabáb kí áwáz ke sáth gáte, aur apne liye Dáúd kí tarah músíqí ke sáz íjád karte ho; 6jo piyáloṉ meṉ se mai píte, aur apne badan par bihtarín ‘itr malte ho; lekin Yúsuf kí shikastahálí se g̣amgín nahíṉ hote. 7Is liye wuh pahle asíroṉ ke sáth asír hokar jáeṉge, aur un kí ‘aish o nashát ká ḳhátima ho jáegá. 8Ḳhudáwand Ḳhudá ne apní zát kí qasam kháí hai, Ḳhudáwand Rabb u’l afwáj, yúṉ farmátá hai, ki Maiṉ Ya‘qúb kí hashmat se nafrat rakhtá húṉ, aur us ke qasroṉ se mujhe ‘adáwat hai; is liye maiṉ shahr ko us kí sárí ma‘múrí samet hawála kar dúṉgá. 9Balki yúṉ hogá, ki agar kisí ghar meṉ das ádmí báqí hoṉge, to wuh bhí mar jáeṉge. 10Aur jab kisí ká rishtadár jo us ko jalátá hai use uṭháegá, táki us kí haḍḍiyoṉ ko ghar se nikále, aur us se jo ghar ke andar hai púchhegá, Kyá koí âur tere sáth hai? to wuh jawáb degá, Koí nahíṉ; tab wuh kahegá, Chup rah, aisá na ho, ki ham Ḳhudáwand ke nám ká zikr kareṉ. 11Kyúṉki dekh, Ḳhudáwand ne hukm de diyá hai, aur baṛe baṛe ghar raḳhnoṉ se, aur chhoṭe shigáfoṉ se barbád hoṉge. 12Kyá chaṭánoṉ par ghoṛe dauṛeṉge? yá koí bailoṉ se waháṉ hal chaláegá? taubhí tum ne ‘adálat ko indráyan aur samra e sadáqat ko nágdauná baná rakkhá hai: 13tum behaqíqat chízoṉ par faḳhr karte, aur kahte ho, Kyá ham ne apne liye apní táqat se síṉg nahíṉ nikále? 14Lekin Ḳhudáwand Rabb u’l afwáj farmátá hai, Ai baní Isráíl, dekho, maiṉ tum par ek qaum ko chaṛhá láúṉgá, aur wuh tum ko Hamát ke madḳhal se wádí e ‘Araba tak pareshán karegí.
Currently Selected:
‘Ámús 6: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
