‘Ámús 5
5
1Ai Isráíl ke ḳhándán, is kalám ko, jis se maiṉ tum par nauha kartá húṉ, suno. 2Isráíl kí kuṉwárí gir paṛí; wuh phir na uṭhegí: wuh apní zamín par paṛí hai; us ko uṭhánewálá koí nahíṉ. 3Kyúṉki Ḳhudáwand Ḳhudá yúṉ farmátá hai, ki Isráíl ke gharáne ke liye, jis shahr se ek hazár nikalte the, us meṉ ek sau rah jáeṉge; aur jis se ek sau nikalte the, us meṉ das rah jáeṉge. 4Kyúṉki Ḳhudáwand Isráíl ke gharáne se yúṉ farmátá hai, ki Tum mere tálib ho, aur zinda raho: 5lekin Baitel ke tálib na ho, aur Jiljál meṉ dáḳhil na ho, aur Baírsaba‘ ko na jáo; kyúṉki Jiljál asírí meṉ jáegá, aur Baitel náchíz hogá. 6Tum Ḳhudáwand ke tálib ho, aur zinda raho; aisá na ho ki wuh Yúsuf ke gharáne meṉ ág kí mánind bhaṛke, aur use khá jáe, aur Baitel meṉ use bujhánewálá koí na ho. 7Ai ‘adálat ko nágdauná banánewálo, aur sadáqat ko ḳhák meṉ milánewálo, 8wuhí Suraiyá aur Jabbár sitároṉ ká ḳháliq hai, jo maut ke sáye ko matla‘ e núr aur roz i raushan ko shab i díjúr baná detá hai, aur samundar ke pání ko bulátá, aur rú e zamín par phailátá hai: jis ká nám Ḳhudáwand hai; 9wuh jo zabardastoṉ par nágahání halákat látá hai, jis se qil‘oṉ par tabáhí átí hai. 10Wuh pháṭak meṉ malámat karnewáloṉ se kína rakhte haiṉ, aur rástgo se nafrat karte haiṉ. 11Pas chúṉki tum miskínoṉ ko pámál karte ho, aur zulm karke un se gehúṉ chhín lete ho, is liye jo taráshe húe pattharoṉ ke makán tum ne banáe un meṉ na basoge, aur jo nafís tákistán tum ne lagáe un kí mai na píoge. 12Kyúṉki maiṉ tumhárí beshumár ḳhatáoṉ aur tumháre baṛe baṛe gunáhoṉ se ágáh húṉ; tum sádiqoṉ ko satáte aur rishwat lete ho, aur pháṭak meṉ miskínoṉ kí haqqtalafí karte ho. 13Is liye in aiyám meṉ peshbín ḳhámosh ho raheṉge, kyúṉki yih burá waqt hai. 14Badí ke nahíṉ balki nekí ke tálib ho, táki zinda raho; aur Ḳhudáwand Rabb u’l afwáj, tumháre sáth rahegá, jaisá kí tum kahte ho. 15Badí se ‘adáwat aur nekí se mahabbat rakkho, aur pháṭak meṉ ‘adálat ko qáim karo: sháyad Ḳhudáwand, Rabb u’l afwáj baní Yúsuf ke baqiye par rahm kare. 16Is liye Ḳhudáwand Ḳhudá, Rabb u’l afwáj, yúṉ farmátá hai, ki Sab bázároṉ meṉ nauha hogá, aur sab galiyoṉ meṉ Afsos! Afsos! kaheṉge; aur kisánoṉ ko mátam ke liye aur un ko jo nauhagarí meṉ mahárat rakhte haiṉ nauha ke liye buláeṉge. 17Aur sab tákistánoṉ meṉ mátam hogá; kyúṉki maiṉ tujh meṉ se hokar guzrúṉgá, Ḳhudáwand farmátá hai. 18Tum par afsos jo Ḳhudáwand ke din kí árzú karte ho! tum Ḳhudáwand ke din kí árzú kyúṉ karte ho? wuh to táríkí ká din hai, raushní ká nahíṉ. 19Jaise koí sher i babar se bháge aur ríchh use mile; yá ghar meṉjákar apná háth díwár par rakkhe, aur use sáṉp káṭ le. 20Kyá Ḳhudáwand ká din táríkí na hogá? us meṉ raushní na hogí, balki saḳht zulmat hogí, aur núr mutlaq na hogá. 21Maiṉ tumhárí ‘ídoṉ ko makrúh jántá aur un se nafrat rakhtá húṉ, aur maiṉ tumhárí muqaddas mahfiloṉ se bhí ḳhush na húṉgá. 22Aur agarchi tum mere huzúr soḳhtaní aur nazr kí qurbáníáṉ guzránoge, taubhí maiṉ un ko qubúl na karúṉgá; aur tumháre farbih jánwaroṉ kí shukráne kí qurbáníoṉ ko ḳhátir meṉ na láúṉgá. 23Tú apne sarod ká shor mere huzúr se dúr kar; kyúṉki maiṉ tere rabáb kí áwáz na sunúṉgá. 24Lekin ‘adálat ko pání kí mánind, aur sadáqat ko baṛí nahr kí mánind járí rakh. 25Ai baní Isráíl, kyá tum chálís baras tak biyábán meṉ mere huzúr zabíhe aur nazr kí qurbáníáṉ guzránte rahe? 26Tum to Milkúm ká ḳhaima, aur Kíwán ke but jo tum ne apne liye banáe uṭháe phirte the: 27pas Ḳhudáwand, jis ká nám Rabb u’l afwáj hai farmátá hai, Maiṉ tum ko Damishq se bhí áge asírí meṉ bhejúṉgá.
Currently Selected:
‘Ámús 5: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
