‘Ámús 3
3
1Ai baní Isráíl, ai sab logo, jin ko maiṉ mulk i Misr se nikál láyá, yih bát suno, jo Ḳhudáwand tumhárí bábat farmátá hai, 2Dunyá ke sab gharánoṉ meṉ se maiṉ ne sirf tum ko barguzída kiyá hai: is liye maiṉ tum ko tumhárí sárí badkirdárí kí sazá dúṉgá. 3Agar do shaḳhs báham muttafiq na hoṉ, to kyá ikaṭṭhe chal sakeṉge? 4Kyá sher i babar jangal meṉ garjegá, jab ki us ko shikár na milá ho? aur agar jawán sher ne kuchh na pakṛá ho, to kyá wuh g̣ár meṉ se apní áwáz baland karegá? 5kyá koí chiṛiyá zamín par dám meṉ phaṉs saktí hai, jab ki us ke liye dám hí na bichháyá gayá ho? kyá phandá jab tak ki kuchh na kuchh us meṉ phaṉsá na ho zamín par se uchhlegá? 6Kyá yih mumkin hai, ki shahr meṉ narsingá phúṉká jáe, aur log na káṉpeṉ? yá koí balá shahr pa ráe, aur Ḳhudáwand ne use na bhejá ho? 7Yaqínan Ḳhudáwand Ḳhudá kuchh nahíṉ kartá, jab tak ki apná bhed apne ḳhidmatguzár nabíoṉ par pahle áshkárá na kare. 8Sher i babar garjá hai, kaun na ḍaregá? Ḳhudáwand Ḳhudá ne farmáyá hai, kaun nubuwwat na karegá?
9Ashdúd ke qasroṉ meṉ, aur mulk i Misr ke qasroṉ meṉ manádí karo, aur kaho, Sámariya ke paháṛoṉ par jama‘ ho jáo, aur dekho, us meṉ kaisá hangáma aur zulm hai. 10Kyúṉki wuh nekí karná nahíṉ jánte, Ḳhudáwand farmátá hai, jo apne qasroṉ meṉ zulm aur lúṭ ko jama‘ karte haiṉ. 11Is liye Ḳhudáwand Ḳhudá yúṉ farmátá hai, ki Dushman mulk ká muhásara karegá, aur terí quwwat ko tujh se dúr karegá, aur tere qasr lúṭe jáeṉge. 12Ḳhudáwand yúṉ farmátá hai, ki Jis tarah se charwáhá do ṭáṉgeṉ, yá kán ká ek ṭukṛá, sher i babar ke muṉh se chhuṛá letá hai, usí tarah baní Isráíl, jo Sámariya meṉ palang ke goshe meṉ aur reshmín farsh par baiṭhe rahte haiṉ, chhuṛá liye jáeṉge. 13Ḳhudáwand Ḳhudá, Rabb u’l afwáj, farmátá hai, suno, aur baní Ya‘qúb ke ḳhiláf gawáhí do. 14Kyúṉki jab maiṉ Isráíl ke gunáhoṉ kí sazá dúṉgá, to Baitel ke mazbahoṉ ko bhí dekh lúṉgá; aur mazbah ke síṉg kaṭkar zamín par gir jáeṉge. 15Aur Ḳhudáwand farmátá hai, Maiṉ zimastání aur tábistání gharoṉ ko barbád karúṉgá; aur háthídáṉt ke ghar mismár kiye jáeṉge, aur bahut se makán wírán hoṉge.
Currently Selected:
‘Ámús 3: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
