‘Ámús 2
2
1 Ḳhudáwand yúṉ farmátá hai, ki Moáb ke tín balki chár gunáhoṉ ke sabab se maiṉ us ko besazá na chhoṛúṉgá; kyúṉki us ne sháh i Adom kí haḍḍiyoṉ ko jalákar chúna baná diyá hai: 2pas maiṉ Moáb par ág bhejúṉgá, aur wuh Qaryot ke qasroṉ ko khá jáegí; aur Moáb lalkár aur narsinge kí áwáz aur shor o g̣aug̣á ke darmiyán maregá: 3aur maiṉ qází ko us ke darmiyán se káṭ ḍálúṉgá, aur us ke tamám umará ko us ke sáth qatl karúṉgá, Ḳhudáwand farmátá hai.
4 Ḳhudáwand yúṉ farmátá hai, ki Yahúdáh ke tín balki chár gunáhoṉ ke sabab se maiṉ us ko besazá na chhoṛúṉgá; kyúṉki unhoṉ ne Ḳhudáwand kí sharí‘at ko radd kiyá, aur us ke ahkám kí pairawí na kí, aur un ke jhúṭhe ma‘búdoṉ ne, jin kí pairawí un ke bápdádá ne kí, un ko gumráh kiyá hai: 5pas maiṉ Yahúdáh par ág bhejúṉgá, jo Yarúshalem ke qasroṉ ko khá jáegí.
6 Ḳhudáwand yúṉ farmátá hai, ki Isráíl ke tín balki chár gunáhoṉ ke sabab se maiṉ us ko besazá na chhoṛúṉgá; kyúṉki unhoṉ ne sádiq ko rupaye kí ḳhátir, aur miskín ko jútiyoṉ ke joṛe kí ḳhátir bech ḍálá. 7Wuh miskínoṉ ke sir par kí gard ká bhí lálach rakhte haiṉ, aur halímoṉ ko un kí ráh se gumráh karte haiṉ; aur báp beṭá ek hí ‘aurat ke pás jáne se mere muqaddas nám kí takfír karte haiṉ; 8aur wuh har mazbah ke pás girau liye húe kapṛoṉ par leṭte haiṉ; aur apne Ḳhudá ke ghar meṉ jurmáne se ḳharídí húí mai píte haiṉ. 9Háláṉki maiṉ hí ne un ke sámne se Amoríoṉ ko nest kiyá, jo deodároṉ kí mánind baland aur balútoṉ kí mánind mazbút the; háṉ, maiṉ hí ne úpar se un ká phal barbád kiyá, aur níche se un kí jaṛeṉ káṭíṉ. 10Aur maiṉ hí tum ko mulk i Misr se nikál láyá, aur chálís baras tak biyábán meṉ tumhárí rahbárí kí, táki tum Amoríoṉ ke mulk par qábiz ho jáo. 11Aur maiṉ ne tumháre beṭoṉ meṉ se nabí, aur tumháre jawánoṉ meṉ se Nazír barpá kiye. Ḳhudáwand farmátá hai, Ai baní Isráíl, kyá yih sach nahíṉ? 12Lekin tum ne Nazíroṉ ko mai piláí, aur nabíoṉ ko hukm diyá ki nubuwwat na kareṉ. 13Dekho, maiṉ tum ko aisá dabáúṉgá, jaise púloṉ se ladí húí gáṛí dabátí hai. 14Tab tezraftár se bhágne kí táqat játí rahegí, aur zoráwar ká zor bekár hogá, aur bahádur apní ján na bachá sakegá. 15Aur kamán kheṉchnewálá khaṛá na rahegá, aur tezqadam aur sawár apní ján na bachá sakeṉge. 16Aur pahlawánoṉ meṉ se jo koí diláwar hai naṉgá nikal bhágegá, Ḳhudáwand farmátá hai.
Currently Selected:
‘Ámús 2: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
