‘Ámús 1
1
1Taqú‘a ke charwáhoṉ meṉ se ‘Ámús ká kalám jo us par sháh i Yahúdáh ‘Uzziyáh aur sháh i Isráíl Yarubi‘ám bin Yúás ke aiyám meṉ Isráíl kí bábat bhauṉchál se do sál pahle royá meṉ názil húá.
2Us ne kahá, ki Ḳhudáwand Siyyún se na‘ra máregá, aur Yarúshalem se áwáz baland karegá; aur charwáhoṉ kí charágáheṉ mátam kareṉgí, aur Karmil kí choṭí súkh jáegí.
3 Ḳhudáwand yúṉ farmátá hai, ki Damishq ke tín balki chár gunáhoṉ ke sabab se maiṉ us ko besazá na chhoṛúṉgá; kyúṉki unhoṉ ne Jili‘ád ko khalíhán meṉ dáone ke áhaní auzár se rauṉd ḍálá hai: 4aur maiṉ Hazáel ke gharáne meṉ ág bhejúṉgá, jo Binhadad ke qasroṉ ko khá jáegí. 5Aur maiṉ Damishq ká aṛbangá toṛúṉgá, aur wádí e Áwan ke báshindoṉ, aur Bait ‘Adan ke farmánrawá ko káṭ ḍálúṉgá; aur Arám ke log asír hokar Qír ko jáeṉge, Ḳhudáwand farmátá hai.
6 Ḳhudáwand yúṉ farmátá hai, ki G̣azzah ke tín balki chár gunáhoṉ ke sabab se maiṉ us ko besazá na chhoṛúṉgá; kyúṉki wuh sab logoṉ ko asír karke le gaye, táki un ko Adom ke hawále kareṉ: 7pas maiṉ G̣azzah kí shahrpanáh par ág bhejúṉgá, jo us ke qasroṉ ko khá jáegí: 8aur Ashdúd ke báshindoṉ, aur Asqalon ke farmánrawá ko káṭ ḍálúṉgá; aur ‘Aqrún par háth chaláúṉgá, aur Filistíoṉ ke báqí log nest ho jáeṉge, Ḳhudáwand Ḳhudá farmátá hai.
9 Ḳhudáwand yúṉ farmátá hai, ki Súr ke tín balki chár gunáhoṉ ke sabab se maiṉ us ko besazá na chhoṛúṉgá; kyúṉki unhoṉ ne sab logoṉ ko Adom ke hawále kiyá, aur birádarána ‘ahd ko yád na kiyá: 10pas maiṉ Súr kí shahrpanáh par ág bhejúṉgá, jo us ke qasroṉ ko khá jáegí.
11 Ḳhudáwand yúṉ farmátá hai, ki Adom ke tín balki chár gunáhoṉ ke sabab se maiṉ us ko besazá na chhoṛúṉgá; kyúṉki us ne talwár lekar apne bháí ko ragedá, aur rahmdilí ko tark kar diyá, aur us ká qahr hamesha pháṛtá rahá, aur us ká g̣azab mauqúf na húá: 12pas maiṉ Temán par ág bhejúṉgá, aur wuh Busráh ke qasroṉ ko khá jáegí.
13 Ḳhudáwand yúṉ farmátá hai, ki Baní ‘Ammon ke tín balki chár gunáhoṉ ke sabab se maiṉ us ko besazá na chhoṛúṉgá; kyúṉki unhoṉ ne apní hudúd ko baṛháne ke liye Jili‘ád kí bárdár ‘auratoṉ ke peṭ chák kiye; 14pas maiṉ Rabbah kí shahrpanáh par ág bhaṛkáúṉgá, jo us ke qasroṉ ko laṛáí ke din lalkár aur áṉdhí ke din girdbád ke sáth khá jáegí: 15aur un ká bádsháh balki wuh apne umará ke sáth asír hokar jáegá, Ḳhudáwand farmátá hai.
Currently Selected:
‘Ámús 1: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
