Yúel 3
3
1Un aiyám meṉ aur usí waqt jab maiṉ Yahúdáh aur Yarúshalem ke ásíroṉ ko wápas láúṉgá, 2to sab qaumoṉ ko jama‘ karúṉgá, aur un ko Yahúsafat kí wádí meṉ utár láúṉgá, aur waháṉ un par apní qaum aur mírás baní Isráíl ke liye, jin ko unhoṉ ne qaumoṉ ke darmiyán paráganda kiyá, aur mere mulk ko báṉṭ liyá hujjat sábit karúṉgá. 3Háṉ, unhoṉ ne mere logoṉ par qur‘a ḍálá, aur ek kasbí ke badle ek laṛká diyá, aur mai ke liye ek laṛkí bechí, táki maiḳhwárí kareṉ. 4Pas, ai Súr o Saidá aur Filistín ke tamám ‘iláqo, mere liye tumhárí kyá haqíqat hai? kyá tum mujh ko badla doge? aur agar doge, to maiṉ wahíṉ fauran tumhárá badla tumháre sir par pheṉk dúṉgá. 5Chúṉki tum ne merá soná chándí le liyá hai, aur merí latíf o nafís chízeṉ apne mandiroṉ meṉ le gaye ho; 6aur tum ne Yahúdáh aur Yarúshalem kí aulád ko Yúnáníoṉ ke háth bechá hai, táki un ko un kí hudúd se dúr karo; 7is liye maiṉ un ko us jagah se jaháṉ tum ne bechá hai barangeḳhta karúṉgá, aur tumhárá badla tumháre sir par láúṉgá. 8Aur tumháre beṭe beṭiyoṉ ko baní Yahúdáh ke háth bechúṉgá, aur wuh un ko ahl i Sabá ke háth, jo dúr ke mulk meṉ rahte haiṉ, becheṉge, kyúṉki yih Ḳhudáwand ká farmán hai.
9Qaumoṉ ke darmiyán is bát kí manádí karo; laṛáí kí taiyárí karo: baháduroṉ ko barangeḳhta karo, jangí jawán házir hoṉ, wuh chaṛháí kareṉ. 10Apne hal kí pháloṉ ko píṭkar talwáreṉ banáo, aur haṉsúoṉ ko píṭkar bhále: kamzor kahe, ki Maiṉ zoráwar húṉ. 11Ai irdgird kí sab qaumo, jald ákar jama‘ ho jáo: ai Ḳhudáwand, apne baháduroṉ ko waháṉ bhej de. 12Qaumeṉ barangeḳhta hoṉ, aur Yahúsafat kí wádí meṉ áeṉ, kyúṉki maiṉ waháṉ baiṭhkar irdgird kí sab qaumoṉ kí ‘adálat karúṉgá. 13Haṉsúá lagáo, kyúṉki khet pak gayá hai: áo, rauṉdo; kyúṉki hauz labálab aur kolhú labrez haiṉ; kyúṉki un kí sharárat ‘azím hai. 14Guroh par guroh infisál kí wádí meṉ hai, kyúṉki Ḳhudáwand ká din infisál kí wádí meṉ á pahuṉchá. 15Súraj aur chánd tárík ho jáeṉge, aur sitároṉ ká chamakná band ho jáegá. 16Kyúṉki Ḳhudáwand Siyyún se na‘ra máregá, aur Yarúshalem se áwáz baland karegá, aur ásmán o zamín káṉpeṉge: lekin Ḳhudáwand apne logoṉ kí panáhgáh aur baní Isráíl ká qil‘a hai. 17Pas tum jánoge ki maiṉ Ḳhudáwand tumhárá Ḳhudá húṉ, jo Siyyún meṉ apne koh i muqaddas par rahtá húṉ: tab Yarúshalem bhí muqaddas hogá, aur phir us meṉ kisí ajnabí ká guzar na hogá. 18Aur us roz paháṛoṉ par se nayí mai ṭapkegí, aur ṭíloṉ par se dúdh bahegá, aur Yahúdáh kí sab nadiyoṉ meṉ pání járí hogá; aur Ḳhudáwand ke ghar se ek chashma phúṭ niklegá, aur wádí e Shittím ko seráb karegá. 19Misr wírána hogá aur Adom sunsán biyábán, kyúṉki unhoṉ ne baní Yahúdáh par zulm kiyá aur un ke mulk meṉ begunáhoṉ ká ḳhún baháyá. 20Lekin Yahúdáh hamesha ábád aur Yarúshalem pusht dar pusht qáim rahegá. 21Kyúṉki maiṉ un ká ḳhún pák qarár dúṉgá, jo maiṉ ne ab tak pák qarár na diyá thá: kyúṉki Ḳhudáwand Siyyún meṉ sukúnatpazír hai.
Currently Selected:
Yúel 3: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
