2 Salátín 20
20
1Un hí dinoṉ meṉ Hizqiyáh aisá bímár paṛá ki marne ke qaríb ho gayá. Tab Yasa‘iyáh nabí Ámús ke beṭe ne us ke pás ákar us se kahá, Ḳhudáwand yúṉ farmátá hai, ki Tú apne ghar ká intizám kar de; kyúṉki tú mar jáegá, aur bachne ká nahíṉ. 2Tab us ne apná muṉh díwár kí taraf karke Ḳhudáwand se yih du‘á kí, ki. 3Ai Ḳhudáwand, maiṉ terí minnat kartá húṉ, yád farmá ki maiṉ tere huzúr sachcháí aur púre dil se chaltá rahá húṉ, aur jo terí nazar meṉ bhalá hai, wuhí kiyá hai. Aur Hizqiyáh zár zár royá. 4Aur aisá húá ki Yasa‘iyáh nikalkar shahr ke bích ke hisse tak pahuṉchá bhí na thá, ki Ḳhudáwand ká kalám us par názil húá, ki. 5Lauṭ, aur merí qaum ke peshwá Hizqiyáh se kah, ki Ḳhudáwand tere báp Dáúd ká Ḳhudá yúṉ farmátá hai, ki Maiṉ ne terí du‘á suní, aur maiṉ ne tere áṉsú dekhe: dekh, maiṉ tujhe shifá dúṉgá, aur tísre din tú Ḳhudáwand ke ghar meṉ jáegá. 6Aur maiṉ terí ‘umr pandrah baras âur baṛhá dúṉgá, aur maiṉ tujh ko, aur is shahr ko sháh i Asúr ke háth se bachá lúṉgá, aur maiṉ apní ḳhátir, aur apne bande Dáúd kí ḳhátir is shahr kí himáyat karúṉgá. 7Aur Yasa‘iyáh ne kahá, Anjíroṉ kí ṭikkiyá lo: so unhoṉ ne use lekar phoṛe par báṉdhá, tab wuh achchhá ho gayá. 8Aur Hizqiyáh ne Yasa‘iyáh se púchhá, ki Is ká kyá nishán hogá, ki Ḳhudáwand mujhe sihhat baḳhshegá, aur maiṉ tísre din Ḳhudáwand ke ghar meṉ jáúṉgá? 9Yasa‘iyáh ne jawáb diyá, ki Is bát ká, ki Ḳhudáwand ne jis kám ko kahá hai, use wuh karegá, Ḳhudáwand kí taraf se tere liye nishán yih hogá, ki sáya yá das darje áge ko jáe, yá das darje píchhe ko lauṭe. 10Aur Hizqiyáh ne jawáb diyá, Yih to chhoṭí bát hai, ki sáya das darje áge ko jáe; so yúṉ nahíṉ, balki sáya das darje píchhe ko lauṭe. 11Tab Yasa‘iyáh nabí ne Ḳhudáwand se du‘á kí: so us ne sáye ko Áḳhaz kí dhúpghaṛí meṉ das darje ya‘ní jitná wuh ḍhal chuká thá, utná hí píchhe ko lauṭá diyá.
12Us waqt sháh i Bábul Barúdak Baladán bin Baladán ne Hizqiyáh ke pás náma aur taháif bheje: kyúṉki us ne suná thá, ki Hizqiyáh bímár ho gayá hai. 13So Hizqiyáh ne un kí báteṉ suníṉ; aur us ne apní beshbahá chízoṉ ká sárá ghar, aur chándí, aur soná, aur masálih, aur beshqímat ‘itr, aur apná siláhḳhána, aur jo kuchh us ke ḳhazánoṉ meṉ maujúd thá, un ko dikhláyá: us ke ghar meṉ, aur us kí sárí mamlukat meṉ, aisí koí chíz na thí jo Hizqiyáh ne un ko na dikháí. 14Tab Yasa‘iyáh nabí ne Hizqiyáh bádsháh ke pás ákar us se kahá, ki Yih log kyá kahte the, aur yih tere pás kaháṉ se áe? Hizqiyáh ne kahá, Yih dúr mulk se, ya‘ní Bábul se mere pás áe haiṉ. 15Phir us ne púchhá, Unhoṉ ne tere ghar meṉ kyá dekhá? Hizqiyáh ne jawáb diyá, Unhoṉ ne sab kuchh jo mere ghar meṉ hai dekhá; mere ḳhazánoṉ meṉ aisí koí chíz nahíṉ jo maiṉ ne un ko dikháí na ho. 16Tab Yasa‘iyáh ne Hizqiyáh se kahá, Ḳhudáwand ká kalám sun le. 17Dekh, wuh din áte haiṉ, ki sab kuchh jo tere ghar meṉ hai, aur jo kuchh tere bápdádá ne áj ke din tak jama‘ karke rakkhá hai, Bábul ko le jáeṉge; Ḳhudáwand farmátá hai, Kuchh bhí báqí na rahegá. 18Aur wuh tere beṭoṉ meṉ se jo tujh se paidá hoṉge, aur jin ká báp tú hí hogá, kitnoṉ ko le jáeṉge; aur wuh sháh i Bábul ke mahall meṉ ḳhwájasará hoṉge. 19Hizqiyáh ne Yasa‘iyáh se kahá, Ḳhudáwand ká kalám jo tú ne kahá hai bhalá hai. Aur us ne yih bhí kahá, Bhalá hí hogá, agar mere aiyám meṉ amn aur amán rahe. 20Aur Hizqiyáh ke báqí kám, aur us kí quwwat, aur kyúṉkar us ne táláb aur nálí banákar shahr meṉ pání pahuṉcháyá, so kyá wuh sháhán i Yahúdáh kí tawáríḳh kí kitáb meṉ qalamband nahíṉ? 21Aur Hizqiyáh apne bápdádá ke sáth so gayá: aur us ká beṭá Munassí us kí jagah bádsháh húá.
Currently Selected:
2 Salátín 20: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
