2 Salátín 21
21
1Jab Munassí saltanat karne lagá, to wuh bárah baras ká thá: us ne pachpan baras Yarúshalem meṉ saltanat kí. Aur us kí máṉ ká nám Hifsíbáh thá. 2Us ne un qaumoṉ ke nafratí kámoṉ kí tarah, jin ko Ḳhudáwand ne baní Isráíl ke áge se dafa‘ kiyá, Ḳhudáwand kí nazar meṉ badí kí. 3Kyúṉki us ne un úṉche maqámoṉ ko jin ko us ke báp Hizqiyáh ne ḍháyá thá, phir banáyá; aur Ba‘l ke liye mazbah banáe, aur Yasírat banáí, jaise sháh i Isráíl Aḳhíab ne kiyá thá; aur ásmán kí sárí fauj ko sijda kartá, aur un kí parastish kartá thá. 4Aur us ne Ḳhudáwand kí haikal meṉ, jis kí bábat Ḳhudáwand ne farmáyá thá, ki Maiṉ Yarúshalem meṉ apná nám rakkhúṉgá, mazbahe banáe. 5Aur us ne ásmán kí sárí fauj ke liye Ḳhudáwand kí haikal ke donoṉ sahnoṉ meṉ mazbahe banáe. 6Aur us ne apne beṭe ko ág meṉ chaláyá, aur wuh shugún nikáltá, aur afsúngarí kartá, aur jinnát ke yároṉ aur jádúgaroṉ se ta‘alluq rakhtá thá; us ne Ḳhudáwand ke áge us ko gussa diláne ke liye baṛí sharárat kí. 7Aur us ne Yasírat kí khodí húí múrat ko jise us ne banáyá thá us ghar meṉ nasb kiyá, jis kí bábat Ḳhudáwand ne Dáúd aur us ke beṭe Sulaimán se kahá thá, ki Isí ghar meṉ, aur Yarúshalem meṉ jise maiṉ ne baní Isráíl ke sab qabíloṉ meṉ se chun liyá hai maiṉ apná nám abad tak rakkhúṉgá: 8aur maiṉ aisá na karúṉgá ki baní Isráíl ke páṉw us mulk se báhar áwára phireṉ jise maiṉ ne un ke bápdádá ko diyá; basharte ki wuh un sab ahkám ke mutábiq aur us sharí‘at ke mutábiq, jis ká hukm mere bande Músá ne un ko diyá, ‘amal karne kí ihtiyát rakkheṉ. 9Par unhoṉ ne na máná: aur Munassí ne un ko bahkáyá, ki wuh un qaumoṉ kí nisbat jin ko Ḳhudáwand ne baní Isráíl ke áge se nábúd kiyá, ziyáda badí kareṉ. 10So Ḳhudáwand ne apne bandoṉ nabíoṉ kí ma‘rifat farmáyá; 11Chúṉki sháh i Yahúdáh Munassí ne nafratí kám kiye, aur Amoríoṉ kí nisbat jo us se peshtar húe ziyáda badí kí, aur Yahúdáh se bhí apne butoṉ ke zarí‘e se gunáh karáyá: 12is liye Ḳhudáwand Isráíl ká Ḳhudá yúṉ farmátá hai, Dekho, maiṉ Yarúshalem aur Yahúdáh par aisí balá láne ko húṉ, ki jo koí us ká hál sune, us ke kán jhanná uṭheṉge. 13Aur maiṉ Yarúshalem par Sámariya kí rassí, aur Aḳhíab ke gharáne ká sáhúl ḍálúṉgá; aur maiṉ Yarúshalem ko aisá poṉchhúṉgá, jaise ádmí thálí ko poṉchhtá hai aur use poṉchhkar ulṭí rakh detá hai. 14Aur maiṉ apní mírás ke báqí logoṉ ko tark karke un ko un ke dushmanoṉ ke hawále karúṉgá; aur wuh apne sab dushmanoṉ ke liye shikár aur lúṭ ṭhahreṉge; 15kyúṉki jab se un ke bápdádá Misr se nikle, us din se áj tak, wuh mere áge badí karte aur mujhe g̣ussa diláte rahe. 16‘Aláwa is ke Munassí ne us gunáh ke siwá, ki us ne Yahúdáh ko gumráh karke Ḳhudáwand kí nazar meṉ badí karáí begunáhoṉ ká ḳhún bhí is qadr kiyá, ki Yarúshalem is sire se us sire tak bhar gayá. 17Aur Munassí ke báqí kám, aur sab kuchh jo us ne kiyá, aur wuh gunáh jo us se sarzad húá, so kyá wuh baní Yahúdáh ke bádsháhoṉ kí tawáríḳh kí kitáb meṉ qalamband nahíṉ? 18Aur Munassí apne bápdádá ke sáth so gayá, aur apne ghar ke bág̣ meṉ jo ‘Uzzá ká bág̣ hai dafn húá: aur us ká beṭá Amún us kí jagah bádsháh húá.
19Aur Amún jab saltanat karne lagá to báís baras ká thá. Us ne Yarúshalem meṉ do baras saltanat kí. Us kí máṉ ká nám Musallimat thá jo Harús Yutbahí kí beṭí thí. 20Aur us ne Ḳhudáwand kí nazar meṉ badí kí, jaise us ke báp Munassí ne kí thí. 21Aur wuh apne báp kí sab ráhoṉ par chalá, aur un butoṉ kí parastish kí, jin kí parastish us ke báp ne kí thí, aur un ko sijda kiyá. 22Aur us ne Ḳhudáwand apne bápdádá ke Ḳhudá ko tark kiyá, aur Ḳhudáwand kí ráh par na chalá. 23Aur Amún ke ḳhádimoṉ ne us ke ḳhiláf sázish kí, aur bádsháh ko usí ke qasr meṉ ján se már diyá. 24Lekin us mulk ke logoṉ ne un sab ko jinhoṉ ne Amún bádsháh ke ḳhiláf sázish kí thí, qatl kiyá. Aur mulk ke logoṉ ne us ke beṭe Yúsiyáh ko us kí jagah bádsháh banáyá. 25Aur Amún ke báqí kám jo us ne kiye, so kyá wuh Yahúdáh ke bádsháhoṉ kí tawáríḳh kí kitáb meṉ qalamband nahíṉ? 26Aur wuh apní gor meṉ ‘Uzzá ke bág̣ meṉ dafn húá: aur us ká beṭá Yúsiyáh us kí jagah bádsháh húá.
Currently Selected:
2 Salátín 21: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
