2 Salátín 19
19
1Jab Hizqiyáh bádsháh ne yih suná, to apne kapṛe pháṛe, aur ṭáṭ oṛhkar Ḳhudáwand ke ghar meṉ gayá. 2Aur us ne ghar ke díwán Iliyáqím, aur Shabnáh munshí, aur káhinoṉ ke buzurgoṉ ko ṭáṭ uṛhákar Ámús ke beṭe Yasa‘iyáh nabí ke pás bhejá. 3Aur unhoṉ ne us se kahá, Hizqiyáh yúṉ kahtá hai, ki Áj ká din dukh, aur malámat, aur tauhín ká din hai: kyúṉki bachche paidá hone par haiṉ, lekin wiládat kí táqat nahíṉ. 4Sháyad Ḳhudáwand terá Ḳhudá Rab Sháqí kí sab báteṉ sune jis ko us ke áqá sháh i Asúr ne bhejá hai, ki zinda Ḳhudá kí tauhín kare, aur jo báteṉ Ḳhudáwand tere Ḳhudá ne suní haiṉ un par wuh malámat karegá. Pas tú us baqiya ke liye jo maujúd hai, du‘á kar. 5Pas Hizqiyáh bádsháh ke mulázim Yasa‘iyáh ke pás áe. 6Yasa‘iyáh ne un se kahá, ki Tum apne áqá se yúṉ kahná, ki Ḳhudáwand yúṉ farmátá hai, ki Tú un bátoṉ se jo tú ne suní haiṉ, jin se sháh i Asúr ke mulázimoṉ ne merí takfír kí hai, na ḍar. 7Dekh, maiṉ us meṉ ek rúh ḍál dúṉgá, aur wuh ek afwáh sunkar apne mulk ko lauṭ jáegá: aur maiṉ use usí ke mulk meṉ talwár se marwá ḍálúṉgá.
8So Rab Sháqí lauṭ gayá; aur us ne sháh i Asúr ko Libnáh se laṛte páyá, kyúṉki us ne suná thá, ki wuh Lakís se chalá gayá hai; 9aur jab us ne Kúsh ke bádsháh Tirháqah kí bábat yih kahte suná, ki Dekh, wuh tujh se laṛne ko niklá hai, to us ne phir Hizqiyáh ke pás elchí rawána kiye, aur kahá, 10ki Sháh i Yahúdáh Hizqiyáh se yúṉ kahná, ki Terá Ḳhudá, jis par terá bharosá hai, tujhe yih kahkar fareb na de, ki Yarúshalem sháh i Asúr ke qabze meṉ nahíṉ kiyá jáegá. 11Dekh, tú ne suná hai, ki Asúr ke bádsháhoṉ ne tamám mamálik ko bi’lkull g̣árat karke un ká kyá hál banáyá hai: so kyá tú bachá rahegá? 12Kyá un qaumoṉ ke deotáoṉ ne un ko, ya‘ní Jauzán, aur Harrán, aur Rasaf, aur baní ‘Adan jo Tillasár meṉ the jin ko hamáre bápdádá ne halák kiyá, chhuṛáyá? 13Hamát ká bádsháh, aur Arfád ká bádsháh, aur shahr Sifrwáím, aur Hena‘ aur ‘Iwáh ká bádsháh kaháṉ haiṉ? 14Hizqiyáh ne elchíoṉ ke háth se náma liyá, aur use paṛhá; aur Hizqiyáh ne Ḳhudáwand ke ghar meṉ jákar use Ḳhudáwand ke huzúr phailá diyá. 15Aur Hizqiyáh ne Ḳhudáwand ke huzúr yúṉ du‘á kí, Ai Ḳhudáwand, Isráíl ke Ḳhudá, karúbíoṉ ke úpar baiṭhnewále, tú hí akelá zamín kí sab saltanatoṉ ká Ḳhudá hai; tú hí ne ásmán aur zamín ko paidá kiyá. 16Ai Ḳhudáwand, kán lagá, aur sun; ai Ḳhudáwand, apní áṉkheṉ khol, aur dekh; aur Sanherib kí bátoṉ ko, jin se zinda Ḳhudá kí tauhín karne ke liye us ne is ádmí ko bhejá hai, sun le. 17Ai Ḳhudáwand, Asúr ke bádsháhoṉ ne darhaqíqat qaumoṉ ko un ke mulkoṉ samet tabáh kiyá, 18aur un ke deotáoṉ ko ág meṉ ḍálá; kyúṉki wuh ḳhudá na the, balki ádmíoṉ kí dastkárí, ya‘ní lakṛí, aur patthar the: is liye unhoṉ ne un ko nábúd kiyá hai. 19So ab, ai Ḳhudáwand, hamáre Ḳhudá, maiṉ terí minnat kartá húṉ, ki tú ham ko us ke háth se bachá le, táki zamín kí sab saltanateṉ ján leṉ ki tú hí akelá Ḳhudáwand Ḳhudá hai.
20Tab Yasa‘iyáh bin Ámús ne Hizqiyáh ko kahlá bhejá, ki Ḳhudáwand Isráíl ká Ḳhudá yúṉ farmátá hai, Chúṉki tú ne sháh i Asúr Sanherib ke ḳhiláf mujh se du‘á kí hai, maiṉ ne terí sun lí. 21Is liye Ḳhudáwand ne us ke haqq meṉ yúṉ farmáyá hai, ki Kuṉwárí duḳhtar i Siyyún ne tujh ko haqír jáná, aur terá mazhaka uṛáyá hai. Yarúshalem kí beṭí ne tujh par sir hiláyá hai. 22Tú ne kis kí tauhín o takfír kí hai? tú ne kis ke ḳhiláf apní áwáz baland kí, aur apní áṉkheṉ úpar uṭháíṉ? Isráíl ke Quddús ke ḳhiláf. 23Tú ne apne qásidoṉ ke zarí‘e se Ḳhudáwand kí tauhín kí, aur kahá, ki Maiṉ bahut se rathoṉ ko sáth lekar paháṛoṉ kí choṭiyoṉ par, balki Lubnán ke wastí hissoṉ tak chaṛh áyá húṉ: aur maiṉ us ke úṉche úṉche deodároṉ aur achchhe se achchhe sanaubar ke daraḳhtoṉ ko káṭ ḍálúṉgá, aur maiṉ us ke dúr se dúr maqám meṉ, jaháṉ us kí zarḳhez zamín ká jangal hai, ghusá chalá jáúṉgá. 24Maiṉ ne jagah jagah ká pání khod khodkar piyá hai, aur maiṉ apne páṉwoṉ ke talwe se Misr kí sab nadiyáṉ sukhá ḍálúṉgá. 25Kyá tú ne nahíṉ suná, ki mujhe yih kiye húe muddat húí, aur maiṉ ne ise qadím aiyám meṉ ṭhahrá diyá thá? Ab maiṉ ne usí ko púrá kiyá hai, ki tú fasíldár shahroṉ ko ujáṛkar khanḍar baná dene ke liye barpá ho. 26Isí sabab se un ke báshinde kamzor húe, aur wuh ghabrá gaye, aur sharminda húe; wuh maidán kí ghás aur harí paud aur chhatoṉ par kí ghás, aur us anáj kí mánind ho gaye jo baṛhne se peshtar súkh jáe. 27Lekin maiṉ terí nishast aur ámad o raft, aur terá mujh par jhunjhláná jántá húṉ. 28Tere mujh par jhunjhláne ke sabab se, aur is liye ki terá ghamanḍ mere kánoṉ tak pahuṉchá hai, maiṉ apní nakel teṛí nák meṉ, aur apní lagám tere muṉh meṉ ḍálúṉgá; aur tú jis ráh se áyá hai, maiṉ tujhe usí ráh se wápas lauṭá dúṉgá. 29Aur tere liye yih nishán hogá, ki tum is sál wuh chízeṉ jo azḳhud ugtí haiṉ, aur dúsre sál wuh chízeṉ jo un se paidá hoṉ kháoge; aur tísre sál tum boná, aur káṭná, aur tákistán lagákar un ká phal kháná. 30Aur wuh baqiya jo Yahúdáh ke gharáne se bach rahá hai phir níche kí taraf jaṛ pakṛegá, aur úpar kí taraf phal láegá. 31Kyúṉki ek baqiya Yarúshalem se, aur wuh jo bach rahe haiṉ, koh i Siyyún se nikleṉge; Ḳhudáwand kí g̣aiyúrí yih kar dikháegí. 32So Ḳhudáwand sháh i Asúr ke haqq meṉ yúṉ farmátá hai, ki Wuh is shahr meṉ áne, yá yaháṉ tír chaláne na páegá; wuh na to sipar lekar us ke sámne áne, aur na us ke muqábil damdama báṉdhne páegá; 33balki Ḳhudáwand farmátá hai, ki Jis ráh se wuh áyá, usí ráh se lauṭ jáegá; aur is shahr meṉ áne na páegá; 34kyúṉki maiṉ apní ḳhátir, aur apne bande Dáúd kí ḳhátir, is shahr kí himáyat karúṉgá, táki use bachá lúṉ.
35So usí rát ko Ḳhudáwand ke firishte ne nikalkar Asúr kí lashkargáh meṉ ek lákh pachásí hazár ádmí már ḍále; aur subh ko jab log sawere uṭhe, to dekhá, ki wuh sab mare paṛe haiṉ. 36Tab sháh i Asúr Sanherib waháṉ se chalá gayá, aur lauṭkar Nínawah meṉ rahne lagá. 37Aur jab wuh apne deotá Nisrúk ke mandir meṉ pújá kar rahá thá, to Adrammalik aur Sharázar ne use talwár se qatl kiyá: aur Arárát kí sarzamín ko bhág gaye. Aur us ká beṭá Asar Haddún us kí jagah bádsháh húá.
Currently Selected:
2 Salátín 19: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
