2 Salátín 2
2
1Aur jab Ḳhudáwand Íliyáh ko bagole meṉ ásmán par uṭhá lene ko thá, to aisá húá, ki Íliyáh Ilísha‘ ko sáth lekar Jiljál se chalá. 2Aur Íliyáh ne Ilísha‘ se kahá, Tú zará yahíṉ ṭhahr já, is liye ki Ḳhudáwand ne mujhe Baitel ko bhejá hai. Ilísha‘ ne kahá. Ḳhudáwand kí hayát kí qasam, aur terí ján kí saugand, maiṉ tujhe nahíṉ chhoṛúṉgá. So wuh Baitel ko chale gaye. 3Aur ambiyázáde jo Baitel meṉ the Ilísha‘ ke pás ákar us se kahne lage, Kyá tujhe ma‘lúm hai, ki Ḳhudáwand áj tere sir par se tere áqá ko uṭhá legá? Us ne kahá, Háṉ, maiṉ jántá húṉ; tum chup raho. 4Aur Íliyáh ne us se kahá, Ilísha‘, tú zará yahíṉ ṭhahr já, kyúṉki Ḳhudáwand ne mujhe Yaríhú ko bhejá hai. Us ne kahá, Ḳhudáwand kí hayát kí qasam, aur terí ján kí saugand, maiṉ tujhe nahíṉ chhoṛúṉgá. So wuh Yaríhú meṉ áe. 5Aur ambiyázáde jo Yaríhú meṉ the Ilísha‘ ke pás ákar us se kahne lage, Kyá tujhe ma‘lúm hai, ki Ḳhudáwand áj tere áqá ko tere sir par se uṭhá legá? Us ne kahá, Háṉ, maiṉ jántá húṉ; tum chup raho. 6Aur Íliyáh ne us se kahá, Tú zará yahíṉ ṭhahr já, kyúṉki Ḳhudáwand ne mujh ko Yardan ko bhejá hai. Us ne kahá, Ḳhudáwand kí hayát kí qasam, aur terí ján kí saugand, maiṉ tujhe nahíṉ chhoṛúṉgá. So wuh donoṉ áge chale. 7Aur ambiyázádoṉ meṉ se pachás ádmí jákar un ke muqábil dúr kháṛe ho gaye; aur wuh donoṉ Yardan ke kanáre khaṛe húe. 8Aur Íliyáh ne apní chádar ko liyá, aur use lapeṭkar pání par márá, aur pání do hisse hokar idhar udhar ho gayá; aur wuh donoṉ ḳhushk zamín par hokar pár gaye. 9Aur jab wuh pár ho gaye, to Íliyáh ne Ilísha‘ se kahá, ki Is se peshtar ki maiṉ tujh se le liyá jáún, batá ki maiṉ tere liye kyá karúṉ. Ilísha‘ ne kahá, Maiṉ terí minnat kartá húṉ, ki terí rúh ká dúná hissa mujh par ho. 10Us ne kahá, Tú ne mushkil suwál kiyá: taubhí agar tú mujhe apne se judá hote dekhe, to tere liye aisá hí hogá; aur agar nahíṉ, to aisá na hogá. 11Aur wuh áge chalte, aur báteṉ karte játe the, ki dekho ek átashí rath aur átashí ghoṛoṉ ne un donoṉ ko judá kar diyá: aur Íliyáh bagole meṉ ásmán par chalá gayá. 12Ilísha‘ yih dekhkar chilláyá, Ai mere báp, mere báp, Isráíl ke rath, aur us ke sawár! Aur us ne use phir na dekhá: so us ne apne kapṛoṉ ko pakaṛkar pháṛ ḍálá, aur do hisse kar diyá. 13Aur us ne Íliyáh kí chádar ko bhí jo us par se gir paṛí thí uṭhá liyá, aur ulṭá phirá, aur Yardan ke kanáre khaṛá húá. 14Aur us ne Íliyáh kí chádar ko jo us par se gir paṛí thí lekar pání par márá, aur kahá, ki Ḳhudáwand Íliyáh ká Ḳhudá kaháṉ hai? aur jab us ne bhí pání par márá, to wuh idhar udhar do hisse ho gayá, aur Ilísha‘ pár húá. 15Jab un ambiyázádoṉ ne jo Yaríhú meṉ us ke muqábil the use dekhá, to wuh kahne lage, Íliyáh kí rúh Ilísha‘ par ṭhahrí húí hai. Aur wuh us ke istiqbál ko áe, aur us ke áge zamín tak jhukkar use sijda kiyá. 16Aur unhoṉ ne us se kahá, Ab dekh, tere ḳhádimoṉ ke sáth pachás zoráwar jawán haiṉ; zará un ko jáne de, ki wuh tere áqá ko ḍhúṉḍheṉ: kahíṉ aisá na ho ki Ḳhudáwand kí rúh ne use uṭhákar kisí paháṛ par, yá kisí wádí meṉ, ḍál diyá ho. Us ne kahá, Mat bhejo. 17Aur jab unhoṉ ne us se bahut zidd kí, yaháṉ tak ki wuh sharmá bhí gayá, to us ne kahá, Bhej do. Is liye unhoṉ ne pachás ádmíoṉ ko bhejá; aur unhoṉ ne tín din tak ḍhúṉḍhá, par use na páyá. 18Aur wuh hanoz Yaríhú meṉ ṭhahrá húá thá, jab wuh us ke pás lauṭe; tab us ne un se kahá, Kyá maiṉ ne tum se na kahá thá, ki Na jáo?
19Phir us shahr ke logoṉ ne Ilísha‘ se kahá, Zará dekh, yih shahr kyá achchhe mauqa‘ par hai, jaisá hamárá ḳhudáwand ḳhud dekhtá hai; lekin pání ḳharáb aur zamín banjar hai. 20Us ne kahá, Mujhe ek nayá piyála lá do, aur us meṉ namak ḍál do. Wuh use us ke pás le áe. 21Aur wuh nikalkar pání ke chashme par gayá, aur wuh namak us meṉ ḍálkar kahá, Ḳhudáwand yúṉ farmátá hai, ki Maiṉ ne is pání ko ṭhík kar diyá hai; ab áge ko is se maut yá banjarpan na hogá. 22So Ilísha‘ ke kalám ke mutábiq jo us ne farmáyá, wuh pání áj tak ṭhík hai.
23Aur waháṉ se wuh Baitel ko chalá; aur jab wuh ráh meṉ já rahá thá, to us shahr ke chhoṭe laṛke nikle, aur use chiṛákar kahne lage, Chaṛhá chalá já, ai ganje sirwále; chaṛhá chalá já, ai ganje sirwále. 24Aur us ne apne píchhe nazar kí, aur un ko dekhá, aur Ḳhudáwand ká nám lekar un par la‘nat kí. So ban meṉ se do ríchhniyáṉ niklíṉ, aur unhoṉ ne un meṉ se bayálís bachche pháṛ ḍále. 25Waháṉ se wuh koh i Karmil ko gayá, aur phir waháṉ se Sámariya ko lauṭ áyá.
Currently Selected:
2 Salátín 2: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
