2 Salátín 1
1
1Aur Aḳhíab ke marne ke ba‘d Moáb Isráíl se bág̣í ho gayá. 2Aur Aḳhaziyáh us jhilmilídár khiṛkí meṉ se, jo Sámariya meṉ us ke báláḳháne meṉ thí, gir paṛá, aur bímár ho gayá: so us ne qásidoṉ ko bhejá, aur un se yih kahá, ki Jákar ‘Aqrún ke deotá Ba‘lzabúb se púchho, ki Mujhe is bímárí se shifá ho jáegí, yá nahíṉ. 3Lekin Ḳhudáwand ke firishte ne Íliyáh Tishbí se kahá, Uṭh, aur sháh i Sámariya ke qásidoṉ se milne ko já, aur un se kah, Kyá Isráíl meṉ Ḳhudá nahíṉ jo tum ‘Aqrún ke deotá Ba‘lzabúb se púchhne chale ho? 4Is liye ab Ḳhudáwand yúṉ farmátá hai, ki Tú us palang par se, jis par tú chaṛhá hai, utarne na páegá, balki tú zarúr hí maregá. So Íliyáh rawána húá. 5Aur wuh qásid us ke pás lauṭ áe, so us ne un se púchhá, Tum lauṭ kyúṉ áe? 6Unhoṉ ne us se kahá, Ek shaḳhs ham se milne ko áyá, aur ham se kahá, ki Us bádsháh ke pás jis ne tum ko bhejá hai phir jao, aur us se kaho, Ḳhudáwand yúṉ farmátá hai, Kyá Isráíl meṉ koí Ḳhudá nahíṉ jo tú ‘Aqrún ke deotá Ba‘lzabúb se púchhne ko bhejtá hai? Is liye tú us palang se, jis par tú chaṛhá hai, utarne na páegá, balki zarúr hí maregá. 7Us ne un se kahá, ki Us shaḳhs kí kaisí shakl thí jo tum se milne ko áyá, aur tum se yih báteṉ kahíṉ? 8Unhoṉ ne use jawáb diyá, ki Wuh bahut báloṉwálá ádmí thá, aur chamṛe ká kamarband apní kamar par kase húe thá. Tab us ne kahá, ki Yih to Íliyáh Tishbí hai. 9Tab bádsháh ne pachás sipáhíoṉ ke ek sardár ko us ke pachás sipáhíoṉ samet us ke pás bhejá. So wuh us ke pás gayá; aur dekhá ki wuh ek ṭíle kí choṭí par baiṭhá hai. Us ne us se kahá, Ai mard i Ḳhudá, bádsháh ne kahá hai, Tú utar á. 10Íliyáh ne us pachás ke sardár ko jawáb diyá, Agar maiṉ mard i Ḳhudá húṉ, to ág ásmán se názil ho, aur tujhe tere pachásoṉ samet bhasam kar de. Pas ág ásmán se názil húí, aur use us ke pachásoṉ samet bhasam kar diyá. 11Phir us ne dobára pachás sipáhíoṉ ke dúsre sardár ko us ke pachásoṉ sipáhíoṉ samet us ke pás bhejá. Us ne us se muḳhátib hokar kahá, Ai mard i Ḳhudá, bádsháh ne yúṉ kahá hai, ki Jald utar á. 12Íliyáh ne un ko bhí jawáb diyá, ki Agar maiṉ mard i Ḳhudá húṉ, to ág ásmán se názil ho, aur tujhe tere pachásoṉ samet bhasam kar de. Pas Ḳhudá kí ág ásmán se názil húí, aur use us ke pachásoṉ samet bhasam kar diyá. 13Phir us ne tísre pachás sipáhíoṉ ke sardár ko us ke pachásoṉ sipáhíoṉ samet bhejá. Aur pachás sipáhíoṉ ká yih tísrá sardár úpar chaṛhkar Íliyáh ke áge ghuṭnoṉ ke bal girá, aur us kí minnat karke us se kahne lagá, Ai mard i Ḳhudá, merí ján, aur in pachásoṉ kí jáneṉ jo tere ḳhádim haiṉ terí nigáh meṉ giránbahá hoṉ. 14Dekh, ásmán se ág názil húí aur pachás pachás sipáhíoṉ ke pahle donoṉ sardároṉ ko, un ke pachásoṉ samet bhasam kar diyá; so ab merí ján terí nazar meṉ giráṉbahá ho. 15Tab Ḳhudáwand ke firishte ne Íliyáh se kahá, Us ke sáth níche já; us se na ḍar. Tab wuh uṭhkar us ke sáth bádsháh ke pás níche gayá. 16Aur us se kahá, Ḳhudáwand yúṉ farmátá hai, ki Tú ne jo ‘Aqrún ke deotá Ba‘lzabúb se púchhne ko log bheje haiṉ, to kyá is liye ki Isráíl meṉ koí Ḳhudá nahíṉ hai, jis kí marzí ko tú daryáft kar sake? is liye tú us palang par se, jis par tú chaṛhá hai, utarne na páegá; balki zarúr hí maregá. 17So wuh Ḳhudáwand ke kalám ke mutábiq jo Íliyáh ne kahá thá mar gayá. Aur chúṉki us ká koí beṭá na thá, is liye sháh i Yahúdáh Yahúrám bin Yahúsafat ke dúsre sál se Yahúrám us kí jagah saltanat karne lagá. 18Aur Aḳhaziyáh ke âur kám jo us ne kiye, so kyá wuh Isráíl ke bádsháhoṉ kí tawáríḳh kí kitáb meṉ qalamband nahíṉ?
Currently Selected:
2 Salátín 1: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
