2 Salátín 13
13
1Aur sháh i Yahúdáh Aḳhaziyáh ke beṭe Yúás ke teísweṉ baras se Yáhú ká beṭá Yahúáḳhaz Sámariya meṉ Isráíl par saltanat karne lagá, aur us ne sattrah baras saltanat kí. 2Aur us ne Ḳhudáwand kí nazar meṉ badí kí; aur Nabát ke beṭe Yarubi‘ám ke gunáhoṉ kí pairawí kí, jin se us ne baní Isráíl se gunáh karáyá; us ne un se kanára na kiyá. 3Aur Ḳhudáwand ká g̣ussa baní Isráíl par bhaṛká, aur us ne un ko bár bár sháh i Arám Hazáel, aur Hazáel ke beṭe Bin Hadad ke qábú meṉ kar diyá. 4Aur Yahúáḳhaz Ḳhudáwand ke huzúr giṛgiṛáyá; aur Ḳhudáwand ne us kí suní; kyúṉki us ne Isráíl kí mazlúmí ko dekhá, ki Arám ká bádsháh un par kaisá zulm kartá hai. 5(Aur Ḳhudáwand ne baní Isráíl ko ek naját denewálá ‘ináyat kiyá, so wuh Arámíoṉ ke háth se nikal gaye; aur baní Isráíl pahle kí tarah apne ḍeroṉ meṉ rahne lage. 6Taubhí unhoṉ ne Yarubi‘ám ke gharáne ke gunáhoṉ se jin se us ne baní Isráíl se gunáh karáyá, kanárakashí na kí, balki un hí par chalte rahe; aur Yasírat bhí Sámariya meṉ rahí.) 7Aur us ne Yahúáḳhaz ke liye logoṉ meṉ se sirf pachás sawár, aur das rath, aur das hazár piyáde chhoṛe: is liye ki Arám ke bádsháh ne un ko tabáh kar ḍálá, aur rauṉd rauṉdkar ḳhák kí mánind kar diyá. 8Aur Yahúáḳhaz ke báqí kám, aur sab kuchh jo us ne kiyá, aur us kí quwwat, so kyá wuh Isráíl ke bádsháhoṉ kí tawáríḳh kí kitáb meṉ qalamband nahíṉ? 9Aur Yahúáḳhaz apne bápdádá ke sáth so gayá, aur unhoṉ ne use Sámariya meṉ dafn kiyá. Aur us ká beṭá Yúás us kí jagah bádsháh húá.
10Aur sháh i Yahúdáh Yúás ke saiṉtísweṉ baras Yahúáḳhaz ká beṭá Yahúás Sámariya meṉ Isráíl par saltanat karne lagá: aur us ne solah baras saltanat kí. 11Aur us ne Ḳhudáwand kí nazar meṉ badí kí; aur Nabát ke beṭe Yarubi‘ám ke gunáhoṉ se, jin se us ne Isráíl se gunáh karáyá, báz na áyá, balki un hí par chaltá rahá. 12Aur Yúás ke báqí kám, aur sab kuchh jo us ne kiyá, aur us kí quwwat jis se wuh sháh i Yahúdáh Amasiyah se laṛá, so kyá wuh Isráíl ke bádsháhoṉ kí tawáríḳh kí kitáb meṉ qalamband nahíṉ? 13Aur Yúás apne bápdádá ke sáth so gayá; aur Yarubi‘ám us ke taḳht par baiṭhá: aur Yúás Sámariya meṉ Isráíl ke bádsháhoṉ ke sáth dafn húá.
14Aur Ilísha‘ ko wuh marz lagá, jis se wuh mar gayá. Aur sháh i Isráíl Yúás us ke pás gayá, aur us ke úpar rokar kahne lagá, Ai mere báp, ai mere báp, Isráíl ke rath, aur us ke sawár! 15Aur Ilísha‘ ne us se kahá, Tír o kamán le le. So us ne apne liye tír o kamán le liyá. 16Phir us ne sháh i Isráíl se kahá, Kamán par apná háth rakh. So us ne apná háth us par rakkhá; aur Ilísha‘ ne bádsháh ke háthoṉ par apne háth rakkhe, 17aur kahá, Mashriq kí taraf kí khiṛkí khol. So us ne use kholá. Tab Ilísha‘ ne kahá, ki Tír chalá. So us ne chaláyá. Tab wuh kahne lagá, Yih fath ká tír Ḳhudáwand ká, ya‘ní Arám par fath páne ká tír hai: kyúṉki tú Afíq meṉ Arámíoṉ ko máregá, yaháṉ tak ki un ko nábúd kar degá. 18Phir us ne kahá, Tíroṉ ko le. So us ne un ko liyá. Phir us ne sháh i Isráíl se kahá, Zamín par már. So us ne tín bár márá, aur ṭhahr gayá. 19Tab mard i Ḳhudá us par g̣ussa húá, aur kahne lagá, ki Tujhe páṉch yá chha bár márná cháhiye thá, tab tú Arámíoṉ ko itná mártá ki un ko nábúd kar detá: par ab tú Arámíoṉ ko faqat tín bár máregá.
20Aur Ilísha‘ ne wafát páí, aur unhoṉ ne use dafn kiyá. Aur naye sál ke shurú‘ meṉ Moáb ke jathe mulk meṉ ghus áe. 21Aur aisá húá, ki jab wuh ek ádmí ko dafn kar rahe the, to un ko ek jathá nazar áyá; so unhoṉ ne us shaḳhs ko Ilísha‘ kí qabr meṉ ḍál diyá: aur wuh shaḳhs Ilísha‘ kí haḍḍiyoṉ se ṭakráte hí jí uṭhá, aur apne páṉwoṉ par khaṛá ho gayá.
22Aur sháh i Arám Hazáel, Yahúáḳhaz ke ‘ahd meṉ barábar Isráíl ko satátá rahá. 23Aur Ḳhudáwand un par mihrbán húá, aur us ne un par tars kháyá; aur us ‘ahd ke sabab se jo us ne Abrahám, aur Izháq, aur Ya‘qúb se báṉdhá thá, un kí taraf iltifát kí; aur na cháhá ki un ko halák kare, aur ab bhí un ko apne huzúr se dúr na kiyá. 24Aur sháh i Arám Hazáel mar gayá; aur us ká beṭá Bin Hadad us kí jagah bádsháh húá. 25Aur Yahúáḳhaz ke beṭe Yahúás ne Hazáel ke beṭe Bin Hadad ke háth se wuh shahr chhín liye jo us ne us ke báp Yahúáḳhaz ke háth se jang karke le liye the. Tín bár Yúás ne use shikast dí, aur Isráíl ke shahroṉ ko wápas le liyá.
Currently Selected:
2 Salátín 13: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
