2 Salátín 12
12
1Aur Yáhú ke sátweṉ baras Yahúás bádsháh húá: aur us ne Yarúshalem meṉ chálís baras saltanat kí. Us kí máṉ ká nám Zibyáh thá jo Baírsaba‘ kí thí. 2Aur Yahúás ne is tamám ‘arse meṉ jab tak Yahoyada‘ káhin us kí ta‘lím o tarbíyat kartá rahá, wuhí kám kiyá jo Ḳhudáwand kí nazar meṉ ṭhík thá. 3Taubhí úṉche maqám ḍháe na gaye; aur log hanoz úṉche maqámoṉ par qurbání karte aur baḳhúr jaláte the.
4Aur Yahúás ne káhinoṉ se kahá, ki Muqaddas kí húí chízoṉ kí sab naqdí, jo ráij sikke meṉ Ḳhudáwand ke ghar meṉ pahuṉcháí játí hai, ya‘ní un logoṉ kí naqdí jin ke liye har shaḳhs kí haisíyat ke mutábiq andáza lagáyá játá hai, wuh sab naqdí jo har ek apní ḳhushí se Ḳhudáwand ke ghar meṉ látá hai, 5is sab ko káhin apne apne jánpahchán se lekar apne pás rakh leṉ; aur haikal kí daráṛoṉ kí, jaháṉ kahíṉ koí daráṛ mile, marammat kareṉ. 6Lekin Yahúás ke teísweṉ sál tak káhinoṉ ne haikal kí daráṛoṉ kí marammat na kí. 7Tab Yahúás bádsháh ne Yahoyada‘ káhin ko aur âur káhinoṉ ko bulákar un se kahá, ki Tum haikal kí daráṛoṉ kí marammat kyúṉ nahíṉ karte? So ab apne apne jánpahchán se naqdí na lená, balki is ko haikal kí daráṛoṉ ke liye hawála karo. 8So káhinoṉ ne manzúr kar liyá, ki na to logoṉ se naqdí leṉ, aur na haikal ke daráṛoṉ kí marammat kareṉ. 9Tab Yahoyada‘ káhin ne ek sandúq lekar us ke sarposh meṉ ek súráḳh kiyá, aur use mazbah ke pás rakkhá, aisá ki Ḳhudáwand kíhai kal meṉ dáḳhil hote waqt wuh dahiní taraf paṛtá thá: aur jo káhin darwáze ke nigahbán the, wuh sab naqdí jo Ḳhudáwand ke ghar meṉ láí játí thí usí meṉ ḍál dete the. 10Aur jab wuh dekhte the ki sandúq meṉ bahut naqdí ho gayí hai, to bádsháh ká munshí, aur sardár káhin úpar ákar use thailiyoṉ meṉ báṉdhte the, aur us naqdí ko jo Ḳhudáwand ke ghar meṉ miltí thí gin lete the. 11Aur wuh us naqdí ko jo tol lí játí thí un ke háthoṉ meṉ sauṉp dete the jo kám karnewále, ya‘ní Ḳhudáwand kí haikal ke názir the; aur wuh use baṛhaiyoṉ, aur mi‘mároṉ par jo Ḳhudáwand ke ghar ká kám banáte the, 12aur rájoṉ, aur saṉgtaráshoṉ par, aur Ḳhudáwand kí haikal kí daráṛoṉ kí marammat ke liye lakṛí aur taráshe húe patthar ḳharídne meṉ, aur un sab chízoṉ par jo haikal kí marammat ke liye isti‘mál meṉ átí thíṉ ḳharch karte the. 13Lekin jo naqdí Ḳhudáwand kí haikal meṉ láí játí thí us se Ḳhudáwand kí haikal ke liye chándí ke piyále, yá gulgír, yá degche, yá narsinge, ya‘ní sone ke bartan, yá chándí ke bartan, na banáe gaye: 14kyúṉki yih naqdí kárígaroṉ ko dí játí thí, aur isí se unhoṉ ne Ḳhudáwand kí haikal kí marammat kí. 15Másiwá is ke jin logoṉ ke háth wuh is naqdí ko supurd karte the, táki wuh use kárígaroṉ ko deṉ, un se wuh us ká kuchh hisáb nahíṉ lete the, is liye ki wuh diyánat se kám karte the. 16Aur jurm kí qurbání kí naqdí aur ḳhatá kí qurbání kí naqdí Ḳhudáwand kí haikal meṉ nahíṉ láí játí thí; wuh káhinoṉ kí thí.
17Tab sháh i Arám Hazáel ne chaṛháí kí, aur Ját se laṛkar use le liyá: phir Hazáel ne Yarúshalem ká ruḳh kiyá, táki us par chaṛháí kare. 18Tab sháh i Yahúdáh Yahúás ne sab muqaddas chízeṉ jin ko us ke bápdádá Yahúsafat, aur Yúrám, aur Aḳhaziyáh, Yahúdáh ke bádsháhoṉ ne nazr kiyá thá, aur apní sab muqaddas chízoṉ ko, aur sab soná jo Ḳhudáwand kí haikal ke ḳhazánoṉ aur bádsháh ke qasr meṉ milá, lekar sháh i Arám Hazáel ko bhej diyá: tab wuh Yarúshalem se ṭalá. 19Aur Yúás ke báqí kám, aur sab kuchh jo us ne kiyá, so kyá wuh Yahúdáh ke bádsháhoṉ kí tawáríḳh kí kitáb meṉ qalamband nahíṉ? 20Aur us ke ḳhádimoṉ ne uṭhkar sázish kí, aur Yúás ko Millo ke mahall meṉ jo Sillá kí utráí par hai qatl kiyá: 21ya‘ní us ke ḳhádimoṉ Yúsakár bin Samá‘at, aur Yahúzabad bin Shúmír ne use márá, aur wuh mar gayá; aur unhoṉ ne use us ke bápdádá ke sáth Dáúd ke shahr meṉ dafn kiyá: aur us ká beṭá Amasiyáh us kí jagah bádsháh húá.
Currently Selected:
2 Salátín 12: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
