2 Salátín 14
14
1Aur sháh i Isráíl Yahúáḳhaz ke beṭe Yúás ke dúsre sál se sháh i Yahúdáh Yúás ká beṭá Amasiyáh saltanat karne lagá. 2Wuh pachchís baras ká thá jab saltanat karne lagá, aur us ne Yarúshalem meṉ untís baras saltanat kí. Us kí máṉ ká nám Yahú‘addán thá, jo Yarúshalem kí thí. 3Aur us ne wuh kám kiyá jo Ḳhudáwand kí nazar meṉ bhalá thá; taubhí apne báp Dáúd kí mánind nahíṉ: balki us ne sab kuchh apne báp Yúás kí tarah kiyá. 4Kyúṉki úṉche maqám ḍháe na gaye: log hanoz úṉche maqámoṉ par qurbání karte, aur baḳhúr jaláte the. 5Aur jab saltanat us ke háth meṉ mustahkam ho gayí, to us ne apne un mulázimoṉ ko jinhoṉ ne us ke báp bádsháh ko qatl kiyá thá ján se márá. 6Par us ne un ḳhúníoṉ ke bachchoṉ ko ján se na márá; kyúṉki Músá kí sharí‘at kí kitáb meṉ, jaisá Ḳhudáwand ne farmáyá, likhá hai, ki Beṭoṉ ke badle báp na máre jáeṉ, aur na báp ke badle beṭe máre jáeṉ; balki har shaḳhs apne hí gunáh ke sabab se mare. 7Aur us ne wádí e Shor meṉ das hazár Adomí máre, aur Sila‘ ko jang karke le liyá; aur us ká nám Yuqtíl rakkhá jo áj tak hai.
8Tab Amasiyáh ne sháh i Isráíl Yahúás bin Yahúáḳhaz bin Yáhú ke pás qásid rawána kiye, aur kahlá bhejá, ki Zará á, to ham ek dúsre ká muqábala kareṉ. 9Aur sháh i Isráíl Yahúás ne sháh i Yahúdáh Amasiyáh ko kahlá bhejá, ki Lubnán ke úṉṭkaṭáre ne Lubnán ke deodár ko paig̣ám bhejá, ki Apní beṭí mere beṭe se biyáh de; itne meṉ ek janglí jánwar jo Lubnán meṉ thá guzrá, aur úṉṭkaṭáre ko rauṉd ḍálá. 10Tú ne beshakk Adom ko márá; aur tere dil meṉ g̣urúr samá gayá hai; so usí kí ḍíṉg már, aur ghar hí meṉ rah: tú kyúṉ nuqsán uṭháne ko chheṛ chháṛ kartá hai, jis se tú bhí zak uṭháe, aur tere sáth Yahúdáh bhí? 11Par Amasiyáh ne na máná. Tab sháh i Isráíl Yahúás ne chaṛháí kí, aur wuh aur sháh i Yahúdáh Amasiyáh Bait Shams meṉ jo Yahúdáh meṉ hai ek dúsre ke muqábil húe. 12Aur Yahúdáh ne Isráíl ke áge shikast kháí; aur un meṉ se har ek apne ḍere ko bhágá. 13Lekin sháh i Isráíl Yahúás ne sháh i Yahúdáh Amasiyáh bin Yahúás bin Aḳhaziyáh ko Bait Shams meṉ pakaṛ liyá, aur Yarúshalem meṉ áyá, aur Yarúshalem kí díwár Ifráím ke pháṭak se konewále pháṭak tak, chár sau háth ke barábar ḍhá dí. 14Aur us ne sab sone, aur chándí ko, aur sab bartanoṉ ko jo Ḳhudáwand kí haikal, aur sháhí mahall ke ḳhazánoṉ meṉ mile, aur kafíloṉ ko bhí sáth liyá, aur Sámariya ko lauṭá. 15Aur Yahúás ke báqí kám jo us ne kiye, aur us kí quwwat, aur jaise sháh i Yahúdáh Amasiyáh se laṛá, so kyá wuh Isráíl ke bádsháhoṉ kí tawáriḳh kí kitáb meṉ qalamband nahíṉ? 16Aur Yahúás apne bápdádá ke sáth so gayá, aur Isráíl ke bádsháhoṉ ke sáth Sámariya meṉ dafn húá; aur us ká beṭá Yarubi‘ám us kí jagah bádsháh húá.
17Aur sháh i Yahúdáh Yúás ká beṭá Amasiyáh sháh i Isráíl Yahúáḳhaz ke beṭe Yahúás ke marne ke ba‘d pandrah baras jítá rahá. 18Aur Amasiyáh ke báqí kám, so kyá wuh Yahúdáh ke bádsháhoṉ kí tawáriḳh kí kitáb meṉ qalamband nahíṉ? 19Aur unhoṉ ne Yarúshalem meṉ us ke ḳhiláf sázish kí; so wuh Lakís ko bhágá: lekin unhoṉ ne Lakís tak us ká píchhá karke wahíṉ use qatl kiyá. 20Aur wuh use ghoṛoṉ par le áe, aur wuh Yarúshalem meṉ apne bápdádá ke sáth Dáúd ke shahr meṉ dafn húá. 21Aur Yahúdáh ke sab logoṉ ne ‘Azariyáh ko jo solah baras ká thá us ke báp Amasiyáh kí jagah bádsháh banáyá. 22Aur bádsháh ke apne bápdádá ke sáth so jáne ke ba‘d us ne Ailát ko ko banáyá, aur use phir Yahúdáh kí mamlukat meṉ dáḳhil kar liyá.
23Aur sháh i Yahúdáh Yúás ke beṭe Amasiyáh ke pandrahweṉ baras se sháh i Isráíl Yúás ká beṭá Yarubi‘ám Sámariya meṉ bádsháhí karne lagá: us ne iktálís baras bádsháhí kí. 24Aur us ne Ḳhudáwand kí nazar meṉ badí kí: wuh Nabát ke beṭe Yarubi‘ám ke un sab gunáhoṉ se jin se us ne Isráíl se gunáh karáyá báz na áyá. 25Aur us ne Ḳhudáwand Isráíl ke Ḳhudá ke us suḳhan ke mutábiq jo us ne apne bande aur nabí Yúnáh bin Amittai kí ma‘rifat jo Ját Hifr ká thá farmáyá thá, Isráíl kí hadd ko Hamát ke madḳhal se maidán ke daryá tak phir pahuṉchá diyá. 26Is liye ki Ḳhudáwand ne Isráíl ke dukh ko dekhá, ki wuh bahut saḳht hai, kyúṉki na to koí band kiyá húá, na ázád chhúṭá húá rahá, aur na koí Isráíl ká madadgár thá. 27Aur Ḳhudáwand ne yih to nahíṉ farmáyá thá, ki Maiṉ rú e zamín par se Isráíl ká nám miṭá dúṉgá: so us ne un ko Yúás ke beṭe Yarubi‘ám ke wasíle se riháí dí. 28Aur Yarubi‘ám ke báqí kám, aur sab kuchh jo us ne kiyá, aur us kí quwwat, ya‘ní kyúṉkar us ne laṛkar Damishq aur Hamát ko jo Yahúdáh ke the Isráíl ke liye wápas le liyá, so kyá wuh Isráíl ke bádsháhoṉ kí tawáríḳh kí kitáb meṉ qalamband nahíṉ? 29Aur Yarubi‘ám apne bápdádá, ya‘ní Isráíl ke bádsháhoṉ ke sáth so gayá; aur us ká beṭá Zakariyáh us kí jagah bádsháh húá.
Currently Selected:
2 Salátín 14: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
