1 Salátín 22
22
1Aur ab tín baras wuh aise hí rahe, aur Isráíl aur Arám ke darmiyán laṛáí na húí. 2Aur tísre sál Yahúdáh ká bádsháh Yahúsafat sháh i Isráíl ke háṉ áyá. 3Aur sháh i Isráíl ne apne mulázimoṉ se kahá, Kyá tum ko ma‘lúm hai, ki Rámát Jili‘ád hamárá hai: par ham ḳhámosh haiṉ, aur sháh i Arám ke háth se use chhín nahíṉ lete? 4Phir us ne Yahúsafat se kahá, Kyá tú mere sáth Rámát Jili‘ád se laṛne chalegá? Yahúsafat ne sháh i Isráíl ko jawáb diyá, Maiṉ aisá húṉ jaisá tú; mere log aise haiṉ jaise tere log, aur mere ghoṛe aise haiṉ jaise tere ghoṛe. 5Aur Yahúsafat ne sháh i Isráíl se kahá, Zará áj Ḳhudáwand kí marzí bhí to daryáft kar le. 6Tab sháh i Isráíl ne nabíoṉ ko jo qaríb chár sau ádmí the ikaṭṭhá kiyá, aur un se púchhá, Maiṉ Rámát Jili‘ád se laṛne jáúṉ, yá báz rahúṉ? Unhoṉ ne kahá, Já, kyúṉki Ḳhudáwand use bádsháh ke qabze meṉ kar degá. 7Lekin Yahúsafat ne kahá, Kyá in ko chhoṛkar yaháṉ Ḳhudáwand ká koí nabí nahíṉ hai, táki ham us se púchheṉ? 8Sháh i Isráíl ne Yahúsafat se kahá, ki Ek shaḳhs, Imlah ká beṭá Míkáyáh hai to sahí, jis ke zarí‘e se ham Ḳhudáwand se púchh sakte haiṉ: lekin mujhe us se nafrat hai; kyúṉki wuh mere haqq meṉ nekí kí nahíṉ, balki badí kí peshíngoí kartá hai. Yahúsafat ne kahá, Bádsháh aisá na kahe. 9Tab sháh i Isráíl ne ek sardár ko bulákar kahá, ki Imlah ke beṭe Míkáyáh ko jald le á. 10Us waqt sháh i Isráíl, aur sháh i Yahúdáh Yahúsafat, Sámariya ke pháṭak ke sámne, ek khulí jagah meṉ, apne apne taḳht par, sháhána libás pahine húe baiṭhe the; aur sab nabí un ke huzúr peshíngoí kar rahe the. 11Aur Kana‘ánah ke beṭe Sidqiyáh ne apne liye lohe ke síṉg banáe, aur kahá, Ḳhudáwand yúṉ farmátá hai, ki Tú in se Arámíoṉ ko máregá, jab tak wuh nábúd na ho jáeṉ. 12Aur sab nabíoṉ ne yihí peshíngoí kí, aur kahá, ki Rámát Jili‘ád par chaṛháí kar, aur kámyáb ho; kyúṉki Ḳhudáwand use bádsháh ke qabze meṉ kar degá. 13Aur us qásid ne jo Míkáyáh ko buláne gayá thá us se kahá, Dekh, sab nabí ek zabán hokar bádsháh ko ḳhushḳhabarí de rahe haiṉ; so zará terí bát bhí un kí bát kí tarah ho, aur tú ḳhushḳhabarí hí dená. 14Míkáyáh ne kahá, Ḳhudáwand kí hayát kí qasam jo kuchh Ḳhudáwand mujhe farmáe, maiṉ wuhí kahúṉgá. 15So jab wuh bádsháh ke pás áyá, to bádsháh ne us se kahá, Míkáyáh, ham Rámát Jili‘ád se laṛne jáeṉ, yá rahne deṉ? Us ne jawáb diyá, Já, aur kámyáb ho, kyúṉki Ḳhudáwand use bádsháh ke qabze meṉ kar degá. 16Bádsháh ne us se kahá, Maiṉ kitne martaba tujhe qasam dekar kahúṉ, ki tú Ḳhudáwand ke nám se haqq ke siwá âur kuchh mujh ko na batáe? 17Tab us ne kahá, Maiṉ ne sáre Isráíl ko un bheṛoṉ kí mánind, jin ká chaupán na ho, paháṛoṉ par paráganda dekhá; aur Ḳhudáwand ne farmáyá, ki In ká koí málik nahíṉ: so wuh apne apne ghar salámat lauṭ jáeṉ. 18Tab sháh i Isráíl ne Yahúsafat se kahá, Kyá maiṉ ne tujh ko batáyá nahíṉ thá, ki Yih mere haqq meṉ nekí kí nahíṉ, balki badí kí peshíngoí karegá? 19Tab us ne kahá, Achchhá, tú Ḳhudáwand ke suḳhan ko sun le: maiṉ ne dekhá ki Ḳhudáwand apne taḳht par baiṭhá hai, aur sárá ásmání lashkar us ke dahine aur báeṉ khaṛá hai. 20Aur Ḳhudáwand ne farmáyá, Kaun Aḳhíab ko bahkáegá, táki wuh chaṛháí kare, aur Rámát Jili‘ád meṉ khet áe? Tab kisí ne kuchh kahá aur kisí ne kuchh. 21Lekin ek rúh nikalkar Ḳhudáwand ke sámne khaṛí húí, aur kahá, Maiṉ use bahkáúṉgí. 22Ḳhudáwand ne us se púchhá, Kis tarah? Us ne kahá, Maiṉ jákar us ke sab nabíoṉ ke muṉh meṉ jhúṭh bolnewálí rúh ban jáúṉgí. Us ne kahá, Tú use bahká degí, aur g̣álib bhí hogí: rawána ho já, aur aisá hí kar. 23So dekh, Ḳhudáwand ne tere in sab nabíoṉ ke muṉh meṉ jhúṭh bolnewálí rúh ḍálí hai; aur Ḳhudáwand ne tere haqq meṉ badí ká hukm diyá hai. 24Tab Kana‘ánah ká beṭá Sidqiyáh nazdík áyá, aur us ne Míkáyáh ke gál par márkar kahá, Ḳhudáwand kí Rúh tujh se bát karne ko kis ráh hokar mujh meṉ se gayí? 25Míkáyáh ne kahá, Yih tú usí din dekh legá, jab tú andar kí ek koṭhrí meṉ ghusegá, táki chhip jáe. 26Aur sháh i Isráíl ne kahá, Míkáyáh ko lekar use shahr ke názim Amún, aur Yúás sháhzáde ke pás lauṭá le jáo; 27aur kahná, Bádsháh yúṉ farmátá hai, ki Is shaḳhs ko qaidḳháne meṉ ḍál do, aur ise musíbat kí roṭí khiláná aur musíbat ká pání piláná jab tak maiṉ salámat na áúṉ. 28Tab Míkáyáh ne kahá, Agar tú salámat wápas á jáe, to Ḳhudáwand ne merí ma‘rifat kalám hí nahíṉ kiyá. Phir us ne kahá, Ai logo, tum sab ke sab sun lo.
29So sháh i Isráíl, aur sháh i Yahúdáh Yahúsafat ne Rámát Jili‘ád par chaṛháí kí. 30Aur sháh i Isráíl ne Yahúsafat se kahá, Maiṉ apná bhes badalkar laṛáí meṉ jáúṉgá; par tú apná libás pahine rah. So sháh i Isráíl apná bhes badalkar laṛáí meṉ gayá. 31Udhar sháh i Arám ne apne rathoṉ ke battísoṉ sardároṉ ko hukm diyá thá, ki Kisí chhoṭe yá baṛe se na laṛná, siwá sháh i Isráíl ke. 32So jab rathoṉ ke sardároṉ ne Yahúsafat ko dekhá, to kahá, ki Zarúr sháh i Isráíl yihí hai. Aur wuh us se laṛne ko muṛe. Tab Yahúsafat chillá uṭhá. 33Jab rathoṉ ke sardároṉ ne dekhá ki wuh sháh i Isráíl nahíṉ, to wuh us ká píchhá karne se lauṭ gaye. 34Aur kisí shaḳhs ne yúṉ hí apní kamán kheṉchí, aur sháh i Isráíl ko jaushan ke bandoṉ ke darmiyán márá. Tab us ne apne sárathí se kahá, ki Bág pherkar mujhe lashkar se báhar nikál le chal, kyúṉki maiṉ zaḳhmí ho gayá húṉ. 35Aur us din baṛe ghumsán káran paṛá, aur unhoṉ ne bádsháh ko us ke rath hí meṉ Arámíoṉ ke muqábil sambhále rakkhá; aur wuh shám ko mar gayá: aur ḳhún us ke zaḳhm se bahkar rath ke páyadán meṉ bhar gayá. 36Aur áftáb g̣urúb hote húe lashkar meṉ yih pukár ho gayí, ki Har ek ádmí apne shahr, aur har ek ádmí apne mulk ko jáe. 37So bádsháh mar gayá, aur wuh Sámariya meṉ pahuṉcháyá gayá; aur unhoṉ ne bádsháh ko Sámariya meṉ dafn kiyá; 38aur us rath ko Sámariya ke táláb meṉ dhoyá, (kasbíáṉ yahíṉ g̣usl kartí thíṉ) aur Ḳhudáwand ke kalám ke mutábiq jo us ne farmáyá thá, kuttoṉ ne us ká ḳhún cháṭá. 39Aur Aḳhíab kí báqí báteṉ, aur sab kuchh jo us ne kiyá thá, aur háthídáṉt ká ghar jo us ne banáyá thá, aur un sab shahroṉ ká hál jo us ne ta‘mír kiye, so kyá wuh Isráíl ke bádsháhoṉ kí tawáríḳh kí kitáb meṉ qalamband nahíṉ? 40Aur Aḳhíab apne bápdádá ke sáth so gayá; aur us ká beṭá Aḳhaziyáh us kí jagah bádsháh húá.
41Aur Ásá ká beṭá Yahúsafat sháh i Isráíl Aḳhíab ke chauthe sál se Yahúdáh par saltanat karne lagá. 42Aur jab Yahúsafat saltanat karne lagá, to paiṉtís baras ká thá: aur us ne Yarúshalem meṉ pachchís baras saltanat kí. Us kí máṉ ká nám ‘Azúbah thá jo Silhí kí beṭí thí. 43Wuh apne báp Ásá ke naqsh i qadam par chalá; us se wuh muṛá nahíṉ, aur jo Ḳhudáwand kí nigáh meṉ ṭhík thá use kartá rahá: taubhí úṉche maqám ḍháe na gaye, log un úṉche maqámoṉ par hanoz qurbání karte aur baḳhúr jaláte the. 44Aur Yahúsafat ne sháh i Isráíl se sulh kí. 45Aur Yahúsafat kí báqí báteṉ, aur us kí quwwat jo us ne dikháí, aur us ke jang karne kí kaifíyat, so kyá wuh Yahúdáh ke bádsháhoṉ kí tawáríḳh kí kitáb meṉ qalamband nahíṉ? 46Aur us ne báqí lútíoṉ ko jo us ke báp Ásá ke ‘ahd meṉ rah gaye the mulk se ḳhárij kar diyá. 47Aur Adom meṉ koí bádsháh na thá; balki ek náib hukúmat kartá thá. 48Aur Yahúsafat ne Tarsís ke jaház banáe, táki Ofír ko sone ke liye jáeṉ; par wuh gaye nahíṉ, kyúṉki wuh ‘Asyún Jábar hí meṉ ṭúṭ gaye. 49Tab Aḳhíab ke beṭe Aḳhaziyáh ne Yahúsafat se kahá, Apne ḳhádimoṉ ke sáth mere ḳhádimoṉ ko bhí jaházoṉ meṉ jáne de. Par Yahúsafat rází na húá. 50Aur Yahúsafat apne bápdádá ke sáth so gayá, aur apne báp Dáúd ke shahr meṉ apne bápdádá ke sáth dafn húá: aur us ká beṭá Yahúrám us kí jagah bádsháh húá.
51Aur Aḳhíab ká beṭá Aḳhaziyáh sháh i Yahúdáh Yahúsafat ke sattrahweṉ sál se Sámariya meṉ Isráíl par saltanat karne lagá; aur us ne Isráíl par do baras saltanat kí. 52Aur us ne Ḳhudáwand kí nazar meṉ badí kí; aur apne báp kí ráh, aur apní máṉ kí ráh, aur Nabát ke beṭe Yarubi‘ám kí ráh par chalá, jis se us ne baní Isráíl se gunáh karáyá: 53aur apne báp ke sab kámoṉ ke muwáfiq Ba‘l kí parastish kartá aur us ko sijda kartá rahá, aur Ḳhudáwand Isráíl ke Ḳhudá ko g̣ussa diláyá.
Currently Selected:
1 Salátín 22: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
