1 Samúel 17
17
1Phir Filistíoṉ ne jang ke liye apní faujeṉ jama‘ kíṉ, aur Yahúdáh ke shahr Shokah meṉ faráham húe, aur Shokah aur ‘Azíqah ke darmiyán Afasdammím meṉ ḳhaimazan húe. 2Aur Sáúl aur Isráíl ke logoṉ ne jama‘ hokar Ailah kí wádí meṉ ḍere ḍále, aur laṛáí ke liye Filistíoṉ ke muqábil saffáráí kí. 3Aur ek taraf ke paháṛ par Filistí aur dúsrí taraf ke paháṛ par baní Isráíl khaṛe húe, aur in donoṉ ke darmiyán wádí thí. 4Aur Filistíoṉ ke lashkar se ek pahlawán niklá, jis ká nám Játí Joliyat thá: us ká qadd chha háth aur ek bálisht thá; 5aur us ke sir par pítal ká ḳhod thá, aur wuh pítal hí kí zirah pahine húe thá jo tol meṉ páṉch hazár pítal kí misqál ke barábar thí. 6Aur us kí ṭáṉgoṉ par pítal ke do sáqposh the, aur us ke donoṉ shánoṉ ke darmiyán pítal kí barchhí thí. 7Aur us ke bhále kí chhaṛ aisí thí, jaise juláhe ká shahtír; aur us ke neze ká phal chha sau misqál lohe ká thá; aur ek shaḳhs sipar liye húe us ke áge áge chaltá thá. 8Wuh khaṛá húá, aur Isráíl ke lashkaroṉ ko pukárkar un se kahne lagá, ki Tum ne ákar jang ke liye kyúṉ saffáráí kí? kyá maiṉ Filistí nahíṉ, aur tum Sáúl ke ḳhádim nahíṉ? so apne liye kisí shaḳhs ko chuno jo mere pás utar áe. 9Agar wuh mujh se laṛ sake, aur mujhe qatl kar ḍále, to ham tumháre ḳhádim ho jáeṉge; par agar maiṉ us par g̣álib áúṉ, aur use qatl kar ḍálúṉ, to tum hamáre ḳhádim ho jáná, aur hamárí ḳhidmat karná. 10Phir us Filistí ne kahá, ki Maiṉ áj ke din Isráílí faujoṉ kí fazíhat kartá húṉ; koí mard nikálo, táki ham laṛeṉ. 11Jab Sáúl aur sab Isráílíoṉ ne us Filistí kí bateṉ suníṉ, to hirásán húe, aur niháyat ḍar gaye.
12Aur Dáúd Baitlahm i Yahúdáh ke us Ifrátí mard ká beṭá thá, jis ká nám Yassí thá; us ke áṭh beṭe the: aur wuh áp Sáúl ke zamáne ke logoṉ ke darmiyán buḍḍhá aur ‘umrrasída thá. 13Aur Yassí ke tín baṛe beṭe Sáúl ke píchhe píchhe jang meṉ gaye the; aur us ke tínoṉ beṭoṉ ke nam jo jang meṉ gaye the, yih the: Ilíáb jo pahlauṭhá thá; dúsrá Abínadáb, aur tísrá Sammah. 14Aur Dáúd sab se chhoṭá thá: aur tínoṉ baṛe beṭe Sáúl ke píchhe píchhe the. 15Aur Dáúd Baitlahm meṉ apne báp kí bheṛ bakriyáṉ charáne ko Sáúl ke pás se áyá jáyá kartá thá. 16Aur wuh Filistí subh aur shám nazdík átá, aur chálís din tak nikalkar átá rahá.
17Aur Yassí ne apne beṭe Dáúd se kahá, ki Is bhúne anáj meṉ se ek aifah, aur yih das roṭiyáṉ apne bháiyoṉ ke liye lekar in ko jald lashkargáh meṉ apne bháiyoṉ ke pás pahuṉchá de; 18aur un ke hazárí sardár ke pás panír kí yih das ṭikkiyáṉ le já: aur dekh, ki tere bháiyoṉ ká kyá hál hai, aur un kí kuchh nishání le á. 19Aur Sáúl, aur wuh bháí aur sab Isráílí mard, Ailah kí wádí meṉ Filistíoṉ se laṛ rahe the. 20Aur Dáúd subh ko sawere uṭhá, aur bheṛ bakriyoṉ ko ek nigahbán ke pás chhoṛkar Yassí ke hukm ke mutábiq sab kuchh lekar rawána húá; aur jab wuh lashkar jo laṛne já rahá thá, jang ke liye lalkár rahá thá, us waqt wuh chhakṛoṉ ke paṛáo meṉ pahuṉchá. 21Aur Isráílíoṉ aur Filistíoṉ ne apne apne lashkar ko ámne sámne karke saffáráí kí. 22Aur Dáúd apná sámán asbáb ke nigahbán ke háth meṉ chhoṛkar áp lashkar meṉ dauṛ gayá, aur jákar apne bháiyoṉ se ḳhair o ‘áfiyat púchhí. 23Aur wuh un se báteṉ kartá hí thá, ki dekho, wuh pahlawán Ját ká Filistí jis ká nám Joliyat thá, Filistí saffoṉ meṉ se niklá: aur us ne phir waisí hí bátoṉ kahíṉ, aur Dáúd ne un ko suná. 24Aur sab Isráílí mard us shaḳhs ko dekhkar us ke sámne se bháge, aur bahut ḍar gaye. 25Tab Isráílí mard yúṉ kahne lage, Tum is ádmí ko jo niklá hai dekhte ho? Yaqínan yih Isráíl kí fazíhat karne ko áyá hai: so jo koí us ko már ḍále, use bádsháh baṛí daulat se nihál karegá, aur apní beṭí use biyáh degá, aur us ke báp ke gharáne ko Isráíl ke darmiyán ázád kar degá. 26Aur Dáúd ne un logoṉ se jo us ke pás khaṛe the púchhá, ki Jo shaḳhs is Filistí ko márkar yih nang Isráíl se dúr kare, us se kyá sulúk kiyá jáegá? kyúṉki yih námaḳhtún Filistí hotá kaun hai, ki wuh zinda Ḳhudá kí faujoṉ kí fazíhat kare? 27Aur logoṉ ne use yihí jawáb diyá, ki Us shaḳhs se jo use már ḍále yih yih sulúk kiyá jáegá.
28Aur us ke sab se baṛe bháí Ilíáb ne us kí bátoṉ ko jo wuh logoṉ se kartá thá suná; aur Ilíáb ká g̣ussa Dáúd par bhaṛká, aur wuh kahne lagá, Tú yaháṉ kyúṉ áyá hai, aur wuh thoṛí sí bheṛ bakriyáṉ tú ne jangal meṉ kis ke pás chhoṛíṉ? Maiṉ tere ghamanḍ aur tere dil kí sharárat se wáqif húṉ; tú laṛáí dekhne áyá hai. 29Dáúd ne kahá, Maiṉ ne ab kyá kiyá? Kyá bát hí nahíṉ ho rahí hai? 30Aur wuh us ke pás se phirkar dúsre kí taraf gayá, aur waisí hí báteṉ karne lagá; aur logoṉ ne use phir pahle kí tarah jawáb diyá. 31Aur jab wuh báteṉ jo Dáúd ne kahíṉ sunne meṉ áíṉ, to unhoṉ ne Sáúl ke áge un ká charchá kiyá, aur us ne use bulá bhejá. 32Aur Dáúd ne Sáúl se kahá, ki Us shaḳhs ke sabab se kisí ká dil na ghabráe; terá ḳhádim jákar us Filistí se laṛegá. 33Sáúl ne Dáúd se kahá, ki Tú is qábil nahíṉ, ki us Filistí se laṛne ko us ke sámne jáe, kyúṉki tú mahz laṛká hai, aur wuh apne bachpan se jangí mard hai. 34Tab Dáúd ne Sáúl ko jawáb diyá, ki Terá ḳhádim apne báp kí bheṛ bakriyáṉ charátá thá, aur jab kabhí koí sher yá ríchh ákar jhunḍ meṉ se koí barra uṭhá le játá, 35to maiṉ us ke píchhe píchhe jákar use mártá aur use us ke muṉh se chhuṛá látá thá; aur jab wuh mujh par jhapaṭtá, to maiṉ us kí dáṛhí pakaṛkar use mártá aur halák kar detá thá. 36Tere ḳhádim ne sher aur ríchh donoṉ ko ján se márá: so yih námaḳhtún Filistí un meṉ se ek kí mánind hogá, is liye ki us ne zinda Ḳhudá kí faujoṉ kí fazíhat kí hai. 37Phir Dáúd ne kahá, ki Ḳhudáwand ne mujhe sher aur ríchh ke panje se bacháyá, wuhí mujh ko is Filistí ke háth se bacháegá. Sáúl ne Dáúd se kahá, Já, Ḳhudáwand tere sáth rahe. 38Tab Sáúl ne apne kapṛe Dáúd ko pahináe, aur pítal ká ḳhod us ke sir par rakkhá, aur use zirah bhí pahináí. 39Aur Dáúd ne us kí talwár apne kapṛoṉ par kas lí, aur chalne kí koshish kí; kyúṉki us ne in ko ázmáyá nahíṉ thá. Tab Dáúd ne Sáúl se kahá, Maiṉ in ko pahinkar chal nahíṉ saktá; kyúṉki maiṉ ne in ko ázmáyá nahíṉ hai; so Dáúd ne un sab ko utár diyá. 40Aur us ne apní láṭhí apne háth meṉ lí, aur us nále se páṉch chikne chikne patthar apne wáste chunkar un ko charwáhe ke thaile meṉ jo us ke pás thá, ya‘ní jhole meṉ, ḍál liyá; aur us ká faláḳhun us ke háth meṉ thá: phir wuh us Filistí ke nazdík chalá. 41Aur wuh Filistí baṛhá, aur Dáúd ke nazdík áyá; aur us ke áge áge us ká siparbardár thá. 42Aur jab us Filistí ne idhar udhar nigáh kí, aur Dáúd ko dekhá, to use náchíz jáná; kyúṉki wuh mahz laṛká thá, aur surḳhrú aur názuk chihre ká thá. 43So Filistí ne Dáúd se kahá, Kyá maiṉ kuttá húṉ jo tú láṭhí lekar mere pás átá hai? Aur us Filistí ne apne deotáoṉ ká nám lekar Dáúd par la‘nat kí. 44Aur us Filistí ne Dáúd se kahá, Tú mere pás á, aur maiṉ terá gosht hawáí parandoṉ aur janglí darandoṉ ko dúṉgá. 45Aur Dáúd ne us Filistí se kahá, ki Tú talwár bhálá aur barchhí liye húe mere pás átá hai; par maiṉ Rabb u’l afwáj ke nám se jo Isráíl ke lashkaroṉ ká Ḳhudá hai, jis kí tú ne fazíhat kí hai, tere pás átá húṉ. 46Aur áj hí ke din Ḳhudáwand tujh ko mere háth meṉ kar degá; aur maiṉ tujh ko márkar terá sir tujh par se utár lúṉgá, aur maiṉ áj ke din Filistíoṉ ke lashkar kí lásheṉ hawáí parandoṉ aur zamín ke janglí jánwaroṉ ko dúṉgá; táki dunyá ján le, ki Isráíl meṉ ek Ḳhudá hai: 47aur yih sárí jamá‘at ján le, ki Ḳhudáwand talwár aur bhále ke zarí‘e se nahíṉ bachátá; is liye ki jang to Ḳhudáwand ki hai, aur wuhí tum ko hamáre háth meṉ kar degá. 48Aur aisá húá, ki jab wuh Filistí uṭhá, aur baṛhkar Dáúd ke muqábale ke liye nazdík áyá, to Dáúd ne jaldí kí, aur lashkar kí taraf us Filistí se muqábala karne ko dauṛá. 49Aur Dáúd ne apne thaile meṉ apná háth ḍálá, aur us meṉ se ek patthar liyá, aur faláḳhun meṉ rakhkar us Filistí ke máthe par márá, aur wuh patthar us ke máthe ke andar ghus gayá; aur wuh zamín par muṉh ke bal gir paṛá. 50So Dáúd us faláḳhun aur ek patthar se us Filistí par g̣álib húá, aur us Filistí ko márá, aur qatl kiyá; aur Dáúd ke háth meṉ talwár na thí. 51Aur Dáúd dauṛkar us Filistí ke úpar khaṛá ho gayá, aur us kí talwár pakaṛkar miyán se kheṉchí, aur use qatl kiyá, aur usí se us ká sir kát ḍálá. Aur Filistíoṉ ne jo dekhá, ki un ká pahlawán márá gayá, to wuh bháge. 52Aur Isráíl aur Yahúdáh ke log uṭhe, aur lalkárkar Filistíoṉ ko Gaí aur ‘Aqrún ke pháṭakoṉ tak ragedá: aur Filistíoṉ meṉ se jo zaḳhmí húe the, wuh Sa‘rím ke ráste meṉ aur Ját aur ‘Aqrún tak girte gaye. 53Tab baní Isráíl Filistíoṉ ke ta‘áqqub se ulṭe phire, aur un ke ḳhaimoṉ ko lúṭá. 54Aur Dáúd us Filistí ká sir lekar use Yarúshalem meṉ láyá; aur us ke hathyároṉ ko us ne apne ḍere meṉ rakh diyá.
55Jab Sáúl ne Dáúd ko us Filistí ká muqábale karne ke liye játe dekhá, to us ne lashkar ke sardár Abinaiyir se púchhá, Abinaiyir, yih laṛká kis ká beṭá hai? Abinaiyir ne kahá, Ai bádsháh, terí ján kí qasam, maiṉ nahíṉ jántá. 56Tab bádsháh ne kahá, Tú tahqíq kar, ki yih naujawán kis ká beṭá hai. 57Aur jab Dáúd us Filistí ko qatl karke phirá, to Abinaiyir use lekar Sáúl ke pás láyá, aur Filistí ká sir us ke háth meṉ thá. 58Tab Sáúl ne us se kahá, Ai jawán, tú kis ká beṭá hai? Dáúd ne jawáb diyá, Maiṉ tere ḳhádim Baitlahmí Yassí ká beṭá húṉ.
Currently Selected:
1 Samúel 17: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
