1 Samúel 16
16
1Aur Ḳhudáwand ne Samúel se kahá, Tú kab tak Sáúl ke liye g̣am khátá rahegá, jis hál ki maiṉ ne use baní Isráíl ká bádsháh hone se radd kar diyá hai? tú apne síṉg meṉ tel bhar, aur já; maiṉ tujhe Baitlahmí Yassí ke pás bhejtá húṉ: kyúṉki maiṉ ne us ke beṭoṉ meṉ se ek ko apní taraf se bádsháh chuná hai. 2Samúel ne kahá, Maiṉ kyúṉkar jáúṉ? Agar Sáúl sun legá, to mujhe már hí ḍálegá. Ḳhudáwand ne kahá, Ek bachhiyá apne sáth le já, aur kahná ki Maiṉ Ḳhudáwand ke liye qurbání karne ko áyá húṉ. 3Aur Yassí ko qurbání kí da‘wat dená: phir maiṉ tujhe batá dúṉgá, ki tujhe kyá karná hai; aur usí ko jis ká nám maiṉ tujhe batáúṉ, mere liye masah karná. 4Aur Samúel ne wuhí jo Ḳhudáwand ne kahá thá kiyá, aur Baitlahm meṉ áyá. Tab shahr ke buzurg káṉpte húe us se milne ko gaye, aur kahne lage, Tú sulh ke ḳhayál se áyá hai? 5Us ne kahá, Sulh ke ḳhayál se. Maiṉ Ḳhudáwand ke liye qurbání chaṛháne áyá húṉ: tum apne áp ko pák sáf karo, aur mere sáth qurbání ke liye áo. Aur us ne Yassí ko aur us ke beṭoṉ ko pák kiyá, aur un ko qurbání kí da‘wat dí. 6Jab wuh áe, to wuh Ilíáb ko dekhkar kahne lagá, Yaqínan Ḳhudáwand ká mamsúh us ke áge hai. 7Par Ḳhudáwand ne Samúel se kahá, ki Tú us ke chihre, aur us ke qadd kí balandí ko na dekh, is liye ki maiṉ ne use nápasand kiyá hai; kyúṉki Ḳhudáwand insán kí mánind nazar nahíṉ kartá, is liye ki insán záhirí súrat ko dekhtá hai, par Ḳhudáwand dil par nazar kartá hai. 8Tab Yassí ne Abínadáb ko buláyá, aur use Samúel ke sámne se nikálá. Us ne kahá, Ḳhudáwand ne is ko bhí nahíṉ chuná. 9Phir Yassí ne Sammah ko áge kiyá. Us ne kahá, Ḳhudáwand ne is ko bhí nahíṉ chuná. 10Aur Yassí ne apne sát beṭoṉ ko Samúel ke sámne se nikálá. Aur Samúel ne Yassí se kahá, ki Ḳhudáwand ne in ko nahíṉ chuná hai. 11Phir Samúel ne Yassí se púchhá, Kyá tere sab laṛke yihí haiṉ? Us ne kahá, Sab se chhoṭá abhí rah gayá; wuh bheṛ bakriyáṉ charátá hai. Samúel ne Yassí se kahá, Use bulá bhej; kyúṉki jab tak wuh yaháṉ na á jáe, ham nahíṉ baiṭheṉge. 12So wuh use bulwákar andar láyá. Wuh surḳhrang, aur ḳhúbsúrat, aur hasín thá. Aur Ḳhudáwand ne farmáyá, Uṭh, aur use masah kar; kyúṉki wuh yihí hai. 13Tab Samúel ne tel ká síṉg liyá, aur use us ke bháiyoṉ ke darmiyán masah kiyá: aur Ḳhudáwand kí rúh us din se áge ko Dáúd par názil hotí rahí. Phir Samúel uṭhkar Rámah ko chalá gayá.
14Aur Ḳhudáwand kí rúh Sáúl se judá ho gayí, aur Ḳhudáwand kí taraf se ek burí rúh use satáne lagí. 15Aur Sáúl ke mulázimoṉ ne us se kahá, Dekh, ab ek burí rúh Ḳhudá kí taraf se tujhe satátí hai. 16So hamárá málik ab apne ḳhádimoṉ ko jo us ke sámne haiṉ, hukm de ki wuh ek aise shaḳhs ko talásh kar láeṉ jo barbat bajáne meṉ ustád ho: aur jab jab Ḳhudá kí taraf se yih burí rúh tujh par chaṛhe, wuh apne háth se bajáe, aur tú bahál ho jáe. 17Sáúl ne apne ḳhádimoṉ se kahá, Ḳhair, ek achchhá bajánewálá mere liye ḍhúṉḍho, aur use mere pás láo. 18Tab jawánoṉ meṉ se ek yúṉ bol uṭhá, ki Dekh, maiṉ ne Baitlahm ke Yassí ke ek beṭe ko dekhá, jo bajáne meṉ ustád aur zabardast súrmá aur jangí mard aur guftogú meṉ sáhib i tamíz, aur ḳhúbsúrat ádmí hai, aur Ḳhudáwand us ke sáth hai. 19Pas Sáúl ne Yassí ke pas qásid rawána kiye aur kahlá bhejá, ki Apne beṭe Dáúd ko jo bheṛ bakriyoṉ ke sáth rahtá hai mere pás bhej de. 20Tab Yassí ne ek gadhá, jis par roṭiyáṉ ladí thíṉ, aur mai ká ek mashkíza aur bakrí ká ek bachcha lekar apne beṭe Dáúd ke háth Sáúl ke pás bhejá. 21Aur Dáúd Sáúl ke pás ákar us ke sámne khaṛá húá; aur Sáúl us se mahabbat karne lagá, aur wuh us ká siláhbardár ho gayá. 22Aur Sáúl ne Yassí ko kahlá bhejá, ki Dáúd ko mere huzúr rahne de, kyúṉki wuh merá manzúr i nazar húá hai. 23So jab wuh burí rúh Ḳhudá kí taraf se Sáúl par chaṛhtí thí, to Dáúd barbat lekar háth se bajátá thá; aur Sáúl ko ráhat hotí, aur wuh bahál ho játá thá, aur wuh burí rúh us par se utar játí thí.
Currently Selected:
1 Samúel 16: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
