1 Samúel 18
18
1Jab wuh Sáúl se báteṉ kar chuká, to Yúnatan ká dil Dáúd ke dil se aisá mil gayá, ki Yúnatan us se apní ján ke barábar mahabbat karne lagá. 2Aur Sáúl ne us din se use apne sáth rakkhá, aur phir use us ke báp ke ghar jáne na diyá. 3Aur Yúnatan aur Dáúd ne báham ‘ahd kiyá; kyúṉki wuh us se apní ján ke barábar mahabbat rakhtá thá 4Tab Yúnatan ne wuh qabá jo wuh pahine húe thá utárkar Dáúd ko dí, aur apní poshák, balki apní talwár, aur apní kamán, aur apná kamarband tak de diyá. 5Aur jaháṉ kahíṉ Sáúl Dáúd ko bhejtá, wuh játá, aur ‘aqlmandí se kám kartá thá: aur Sáúl ne use jangí mardoṉ par muqarrar kar diyá, aur yih bát sárí qaum kí aur Sáúl ke mulázimoṉ kí nazar meṉ achchhí thí.
6Jab Dáúd us Filistí ko qatl karke lauṭá átá thá, aur wuh sab bhí á rahe the, to Isráíl ke sab shahroṉ se ‘aurateṉ gátí aur náchtí húí dafoṉ, aur ḳhushí ke na‘roṉ, aur bájoṉ ke sáth Sáúl bádsháh ke istiqbál ko niklíṉ. 7Aur wuh ‘aurateṉ náchtí húí ápas meṉ gátí játí thíṉ, ki
Sáúl ne to hazároṉ ko,
Par Dáúd ne lákhoṉ ko márá.
8Aur Sáúl niháyat ḳhafá húá, kyúṉki wuh bát use burí lagí, aur wuh kahne lagá, ki Unhoṉ ne Dáúd ke liye to lákhoṉ, aur mere liye faqat hazároṉ hí ṭhahráe; so bádsháhí ke siwá use âur kyá milná báqí hai? 9So us din se áge ko Sáúl Dáúd ko badgumání se dekhne lagá.
10Aur dúsre din aisá húá, ki Ḳhudá kí taraf se burí rúh Sáúl par názil húí; aur wuh ghar ke andar nubuwwat karne lagá: aur Dáúd roz kí tarah apne háth se bajá rahá thá, aur Sáúl apne háth meṉ apná bhálá liye thá. 11Tab Sáúl ne bhálá chaláyá, kyúṉki us ne kahá, ki Maiṉ Dáúd ko díwár ke sáth chhed dúṉgá. Aur Dáúd us ke sámne se do bár haṭ gayá. 12So Sáúl Dáúd se ḍará kartá thá; kyúṉki Ḳhudáwand us ke sáth thá, aur Sáúl se judá ho gayá thá. 13Is liye Sáúl ne use apne pás se judá karke use hazár jawánoṉ ká sardár baná diyá; aur wuh logoṉ ke sámne áyá jáyá kartá thá. 14Aur Dáúd apní sab ráhoṉ meṉ dánáí ke sáth chaltá thá; aur Ḳhudáwand us ke sáth thá. 15Jab Sáúl ne dekhá, ki wuh ‘aqlmandí se kám kartá hai, to wuh us se ḳhauf kháne lagá. 16Par tamám Isráíl aur Yahúdáh ke log Dáúd ko piyár karte the, is liye ki wuh un ke sámne áyá jáyá kartá thá.
17Tab Sáúl ne Dáúd se kahá, ki Dekh, maiṉ apní baṛí beṭí Mírab ko tujh se biyáh dúṉgá; tú faqat mere liye bahádurí ká kám kar, aur Ḳhudáwand kí laṛáiyáṉ laṛ. Kyúṉki Sáúl ne kahá, ki Merá háth nahíṉ, balki Filistíoṉ ká háth us par chale. 18Dáúd ne Sáúl se kahá, Maiṉ kyá húṉ, aur merí hastí hí kyá, aur Isráíl meṉ mere báp ká ḳhándán kyá hai, ki maiṉ bádsháh ká dámád banúṉ? 19Par jab waqt á gayá, ki Sáúl kí beṭí Mírab Dáúd se biyáhí jáe, to wuh Mahúlátí ‘Adríel se biyáh dí gayí. 20Aur Sáúl kí beṭí Míkal Dáúd ko cháhtí thí: so unhoṉ ne Sáúl ko batáyá, aur wuh us bát se ḳhush húá. 21Tab Sáúl ne kahá, Maiṉ usí ko use dúṉgá, táki yih us ke liye phandá ho aur Filistíoṉ ká háth us par paṛe. So Sáúl ne Dáúd se kahá, ki Is dúsrí daf‘a to tú áj ke din merá dámád ho jáegá. 22Aur Sáúl ne apne ḳhádimoṉ ko hukm kiyá, ki Dáúd se chupke chupke báteṉ karo, aur kaho, ki Dekh, bádsháh tujh se ḳhush hai, aur us ke sab ḳhádim tujhe piyár karte haiṉ, so ab tú bádsháh ká dámád ban já. 23Chunáṉchi Sáúl ke mulázimoṉ ne yih báteṉ Dáúd ke kán tak pahuṉcháíṉ. Dáúd ne kahá, Kyá bádsháh ká dámád banná tum ko koí halkí bát ma‘lúm hotí hai, jis hál ki maiṉ g̣aríb húṉ, aur merí kuchh waq‘at nahíṉ? 24So Sáúl ke mulázimoṉ ne use batáyá, ki Dáúd yúṉ kahtá hai. 25Tab Sáúl ne kahá, Tum Dáúd se kahná, ki Bádsháh mahr nahíṉ máṉgtá; wuh faqat Filistíoṉ kí sau khalṛiyáṉ cháhtá hai, táki bádsháh ke dushmanoṉ se intiqám liyá jáe. Sáúl ká yih iráda thá, ki Dáúd ko Filistíoṉ ke háth se marwá ḍále. 26Jab us ke ḳhádimoṉ ne yih báteṉ Dáúd se kahíṉ, to Dáúd bádsháh ká dámád banne ko rází ho gayá, aur hanoz din púre bhí nahíṉ húe the, 27ki Dáúd uṭhá, aur apne logoṉ ko lekar gayá, aur do sau Filistí qatl kar ḍále, aur Dáúd un kí khalṛiyáṉ láyá; aur unhoṉ ne un kí púrí ta‘dád meṉ bádsháh ko diyá, táki wuh bádsháh ká dámád ho. Aur Sáúl ne apní beṭí Míkal use biyáh dí. 28Aur Sáúl ne dekhá, aur ján liyá, ki Ḳhudáwand Dáúd ke sáth hai; aur Sáúl kí beṭí Míkal use cháhtí thí. 29Aur Sáúl Dáúd se âur bhí ḍarne lagá, aur Sáúl barábar Dáúd ká dushman rahá.
30Phir Filistíoṉ ke sardároṉ ne dháwá kiyá, aur jab jab unhoṉ ne dháwá kiyá, Sáúl ke sab ḳhádimoṉ kí nisbat Dáúd ne ziyáda dánáí ká kám kiyá; is se us ká nám bahut baṛá ho gayá.
Currently Selected:
1 Samúel 18: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
