1 Samúel 15
15
1Aur Samúel ne Sáúl se kahá, ki Ḳhudáwand ne mujhe bhejá hai ki maiṉ tujhe masah karúṉ, táki tú us kí qaum Isráíl ká bádsháh ho: so ab tú Ḳhudáwand kí báteṉ sun. 2Rabb u’l afwáj yúṉ farmátá hai, ki Mujhe is ká ḳhayál hai, ki ‘Amálíq ne Isráíl se kyá kiyá, aur jab yih Misr se nikal áe, to wuh ráh meṉ un ká muḳhálif hokar áyá. 3So ab tú já, aur ‘Amálíq ko már, aur jo kuchh un ká hai sab ko bi’lkull nábúd kar de, aur un par rahm mat kar; balki mard aur ‘aurat, nannhe bachche aur shírḳhwár, gáe bail aur bheṛ bakriyáṉ, úṉṭ aur gadhe sab ko qatl kar ḍál.
4Chunáṉchi Sáúl ne logoṉ ko jama‘ kiyá, aur Taláim meṉ un ko giná; so wuh do lákh piyáde, aur Yahúdáh ke das hazár mard the. 5Aur Sáúl ‘Amálíq ke shahr ko áyá, aur wádí ke bích ghát lagákar baiṭhá. 6Aur Sáúl ne Qíníoṉ se kahá, ki Tum chal do; ‘Amálíqíoṉ ke bích se nikal jáo, tá na ho ki maiṉ tum ko un ke sáth halák kar ḍálúṉ is liye ki tum sab Isráílíoṉ se jab wuh Misr se nikal áe, mihr ke sáth pesh áe. So Qíní ‘Amálíqíoṉ meṉ se nikal gaye. 7Aur Sáúl ne ‘Amálíqíoṉ ko Hawílah se Shor tak jo Misr ke sámne hai márá: 8aur ‘Amálíqíoṉ ke bádsháh Ajáj ko jítá pakṛá, aur sab logoṉ ko talwár kí dhár se nest kar diyá. 9Lekin Sáúl ne aur un logoṉ ne Ajáj ko, aur achchhí achchhí bheṛ bakriyoṉ, gáe bailoṉ, aur moṭe moṭe bachchoṉ, aur barroṉ ko, aur jo kuchh achchhá thá, use jítá rakkhá, aur un ko nest karná na cháhá; lekin unhoṉ ne har ek chíz ko jo náqis aur nikammí thí nest kar diyá.
10Tab Ḳhudáwand ká kalám Samúel ko pahuṉchá, ki 11Mujhe afsos hai, ki maiṉ ne Sáúl ko bádsháh hone ke liye muqarrar kiyá; kyúṉki wuh merí pairawí se phir gayá hai, aur us ne mere hukm nahíṉ máne. Pas Samúel ká g̣ussa bhaṛká, aur wuh sárí rát Ḳhudáwand se faryád kartá rahá. 12Aur Samúel sawere uṭhá, ki subh ko Sáúl se muláqát kare: aur Samúel ko ḳhabar milí ki Sáúl Karmil ko áyá thá, aur us ne apne liye yádgár khaṛí kí, aur phirkar guzartá húá Jiljál ko chalá gayá hai. 13Phir Samúel Sáúl ke pás gayá, aur Sáúl ne us se kahá, Tú Ḳhudáwand kí taraf se mubárak ho! Maiṉ ne Ḳhudáwand ke hukm par ‘amal kiyá. 14Samúel ne kahá, Phir yih bheṛ bakriyoṉ ká mimiyáná, aur gáe bailoṉ ká bambáná kaisá hai, jo maiṉ suntá húṉ? 15Sáúl ne kahá, ki Yih log un ko ‘Amálíqíoṉ ke háṉ se le áe haiṉ; is liye ki logoṉ ne achchhí achchhí bheṛ bakriyoṉ aur gáe bailoṉ ko jítá rakkhá, táki un ko Ḳhudáwand tere Ḳhudá ke liye zabh kareṉ; aur báqí sab ko to ham ne nest kar diyá. 16Tab Samúel ne Sáúl se kahá, Ṭhahr já, aur jo kuchh Ḳhudáwand ne áj kí rát mujh se kahá hai, wuh maiṉ tujhe batáúṉgá. Us ne kahá, Batáiye. 17Samúel ne kahá, Go tú apní hí nazar meṉ haqír thá, taubhí kyá tú baní Isráíl ke qabíloṉ ká sardár na banáyá gayá? Aur Ḳhudáwand ne tujhe masah kiyá táki tú baní Isráíl ká bádsháh ho. 18Aur Ḳhudáwand ne tujhe safar par bhejá, aur kahá, ki Já, aur gunahgár ‘Amálíqíoṉ ko nest kar, aur jab tak wuh faná na ho jáeṉ un se laṛtá rah. 19Pas tú ne Ḳhudáwand kí bát kyúṉ na mání, balki lúṭ par ṭúṭkar wuh kám kar guzrá jo Ḳhudáwand kí nazar meṉ burá hai? 20Sáúl ne Samúel se kahá, Maiṉ ne to Ḳhudáwand ká hukm máná, aur jis ráh par Ḳhudáwand ne mujhe bhejá chalá, aur ‘Amálíq ke bádsháh Ajáj ko le áyá húṉ, aur ‘Amálíqíoṉ ko nest kar diyá. 21Par log lúṭ ke mál meṉ se bheṛ bakriyoṉ aur gáe bail, ya‘ní achchhí achchhí chízeṉ, jin ko nest karná thá, le áe táki Jiljál meṉ Ḳhudáwand tere Ḳhudá ke huzúr qurbání kareṉ. 22Samúel ne kahá, Kyá Ḳhudáwand soḳhtaní qurbáníoṉ aur zabíhoṉ se itná hí ḳhush hotá hai, jitná is bát se ki Ḳhudáwand ká hukm máná jáe? Dekh, farmánbardárí qurbání se, aur bát mánní meṉḍhoṉ kí charbí se bihtar hai. 23Kyúṉki bag̣áwat aur jádúgarí barábar haiṉ, aur sarkashí aisí hí hai jaisí múratoṉ aur butoṉ kí parastish; so chúṉki tú ne Ḳhudáwand ke hukm ko radd kiyá hai, is liye us ne bhí tujhe radd kiyá hai, ki bádsháh na rahe. 24Sáúl ne Samúel se kahá, Maiṉ ne gunáh kiyá, ki maiṉ ne Ḳhudáwand ke farmán ko aur terí bátoṉ ko ṭál diyá hai; kyúṉki maiṉ logoṉ se ḍará, aur un kí bát suní. 25So ab maiṉ terí minnat kartá húṉ, ki merá gunáh baḳhsh de, aur mere sáth lauṭ chal táki maiṉ Ḳhudáwand ko sijda karúṉ. 26Samúel ne Sáúl se kahá, Maiṉ tere sáth nahíṉ lauṭúṉgá, kyúṉki tú ne Ḳhudáwand ke kalám ko radd kiyá hai, aur Ḳhudáwand ne tujhe radd kiyá, ki Isráíl ká bádsháh na rahe. 27Aur jaise hí Samúel jáne ko muṛá, Sáúl ne us ke jubbe ká dáman pakaṛ liyá, aur wuh chák ho gayá. 28Tab Samúel ne us se kahá, Ḳhudáwand ne Isráíl kí bádsháhí tujh se áj hí chák karke chhín lí, aur tere ek paṛausí ko jo tujh se bihtar hai de dí hai. 29Aur jo Isráíl kí Quwwat hai, wuh na to jhúṭh boltá, aur na pachhtátá hai, kyúṉki wuh insán nahíṉ hai, ki pachhtáe. 30Us ne kahá, Maiṉ ne gunáh to kiyá hai, taubhí merí qaum ke buzurgoṉ aur Isráíl ke áge merí ‘izzat kar, aur mere sáth lauṭ chal, táki maiṉ Ḳhudáwand tere Ḳhudá ko sijda karúṉ. 31Tab Samúel lauṭkar Sáúl ke píchhe ho liyá; aur Sáúl ne Ḳhudáwand ko sijda kiyá.
32Tab Samúel ne kahá, ki ‘Amálíqíoṉ ke bádsháh Ajáj ko yaháṉ mere pás láo. So Ajáj ḳhushí ḳhushí us ke pás áyá. Aur Ajáj kahne lagá, Fi’lhaqíqat maut kí talḳhí guzar gayí. 33Samúel ne kahá, Jaise terí talwár ne ‘auratoṉ ko beaulád kiyá, waise hí terí máṉ ‘auratoṉ meṉ beaulád hogí. Aur Samúel ne Ajáj ko Jiljál meṉ Ḳhudáwand ke huzúr ṭukṛe ṭukṛe kiyá.
34Aur Samúel Rámah ko chalá gayá; aur Sáúl apne ghar Sáúl ke Jibi‘ah ko gayá. 35Aur Samúel apne marte dam tak Sáúl ko phir dekhne na gayá; kyúṉki Samúel Sáúl ke liye g̣am khátá rahá: aur Ḳhudáwand Sáúl ko baní Isráíl ká bádsháh karke malúl húá.
Currently Selected:
1 Samúel 15: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
