1 Samúel 12
12
1Tab Samúel ne sab Isráílíoṉ se kahá, Dekho, jo kuchh tum ne mujh se kahá maiṉ ne tumhárí ek ek bát mání, aur ek bádsháh tumháre úpar ṭhahráyá hai. 2Aur ab dekho, yih bádsháh tumháre áge áge chaltá hai: maiṉ to buḍḍhá húṉ, aur merá sir safed ho gayá, aur dekho, mere beṭe tumháre sáth haiṉ; maiṉ laṛakpan se áj tak tumháre sámne hí chaltá rahá húṉ. 3Maiṉ házir húṉ; so tum Ḳhudáwand aur us ke mamsúh ke áge mere muṉh par batáo, ki maiṉ ne kis ká bail le liyá, yá kis ká gadhá liyá? maiṉ ne kis ká haqq márá, yá kis par zulm kiyá, yá kis ke háth se maiṉ ne rishwat lí, táki andhá ban jáúṉ? batáo, aur yih maiṉ tum ko wápas kar dúṉgá. 4Unhoṉ ne jawáb diyá, Tú ne hamárá haqq nahíṉ márá, aur na ham par zulm kiyá, aur na tú ne kisí ke háth se kuchh liyá. 5Tab us ne un se kahá, ki Ḳhudáwand tumhárá gawáh, aur us ká mamsúh áj ke din gawáh hai, ki mere pás tumhárá kuchh nahíṉ niklá. Unhoṉ ne kahá, Wuh gawáh hai. 6Phir Samúel logoṉ se kahne lagá, Wuh Ḳhudáwand hí hai jis ne Músá aur Hárún ko muqarrar kiyá aur tumháre bápdádá ko mulk i Misr se nikál láyá. 7So ab ṭhahre raho, táki maiṉ Ḳhudáwand ke huzúr un sab nekíoṉ ke báre meṉ jo Ḳhudáwand ne tum se aur tumháre bápdádá se kíṉ guftogú karúṉ. 8Jab Ya‘qúb Misr meṉ gayá, aur tumháre bápdádá ne Ḳhudáwand se faryád kí, to Ḳhudáwand ne Músá aur Hárún ko bhejá, jinhoṉ ne tumháre bápdádá ko Misr se nikálkar is jagah basáyá. 9Par wuh Ḳhudáwand apne Ḳhudá ko bhúl gaye, so us ne un ko Hasúr kí fauj ke sipahsálár Sísará ke háth, aur Filistíoṉ ke háth, aur sháh i Moáb ke háth bech ḍálá, aur wuh un se laṛe. 10Phir unhoṉ ne Ḳhudáwand se faryád kí, aur kahá, ki Ham ne gunáh kiyá, is liye ki ham ne Ḳhudáwand ko chhoṛá, aur Ba‘lím aur ‘Istárát kí parastish kí: par ab tú ham ko hamáre dushmanoṉ ke háth se chhuṛá, to ham terí parastish kareṉge. 11So Ḳhudáwand ne Yarubba‘l, aur Bidán, aur Iftáh, aur Samúel ko bhejá, aur tum ko tumháre dushmanoṉ ke háth se jo tumhárí chároṉ taraf the riháí dí; aur tum chain se rahne lage. 12Aur jab tum ne dekhá, ki baní ‘Ammon ká bádsháh Náhas tum par chaṛh áyá, to tum ne mujh se kahá, ki Ham par koí bádsháh saltanat kare; háláṉki Ḳhudáwand tumhárá Ḳhudá tumhárá bádsháh thá. 13So ab us bádsháh ko dekho jise tum ne chun liyá, aur jis ke liye tum ne darḳhwást kí thí: dekho, Ḳhudáwand ne tum par bádsháh muqarrar kar diyá hai. 14Agar tum Ḳhudáwand se ḍarte, aur us kí parastish karte, aur us kí bát mánte raho, aur Ḳhudáwand ke hukm se sarkashí na karo, aur tum aur wuh bádsháh bhí jo tum par saltanat kartá hai Ḳhudáwand apne Ḳhudá ke pairau bane raho, to ḳhair; 15par agar tum Ḳhudáwand kí bát na máno balki Ḳhudáwand ke hukm se sarkashí karo; to Ḳhudáwand ká háth tumháre ḳhiláf hogá, jaise wuh tumháre bápdádá ke ḳhiláf hotá thá. 16So ab tum ṭhahre raho, aur is baṛe kám ko dekho jise Ḳhudáwand tumhárí áṉkhoṉ ke sámne karegá. 17Kyá áj gehúṉ káṭne ká din nahíṉ? Maiṉ Ḳhudáwand se ‘arz karúṉgá, ki bádal garje, aur pání barse; aur tum ján loge, aur dekh bhí loge, ki tum ne Ḳhudáwand ke huzúr apne liye bádsháh máṉgne se kitní baṛí sharárat kí. 18Chunáṉchi Samúel ne Ḳhudáwand se ‘arz kí; aur Ḳhudáwand kí taraf se usí din bádal garjá, aur pání barsá: tab sab log Ḳhudáwand aur Samúel se niháyat ḍar gaye. 19Aur sab logoṉ ne Samúel se kahá, ki Apne ḳhádimoṉ ke liye Ḳhudáwand apne Ḳhudá se du‘á kar, ki ham mar na jáeṉ: kyúṉki ham ne apne sab gunáhoṉ par yih sharárat bhí baṛhá dí hai, ki apne liye ek bádsháh máṉgá. 20Samúel ne logoṉ se kahá: Ḳhauf na karo; yih sab sharárat to tum ne kí hai; taubhí Ḳhudáwand kí pairawí se kanárakashí na karo, balki apne sáre dil se Ḳhudáwand kí parastish karo. 21Tum kanárakashí na karná, warna bátil chízoṉ kí pairawí karne lagoge, jo na fáida pahuṉchá saktí na riháí de saktí haiṉ, is liye ki wuh sab bátil haiṉ. 22Kyúṉki Ḳhudáwand apne baṛe nám ke bá‘is apne logoṉ ko tark nahíṉ karegá: is liye ki Ḳhudáwand ko yihí pasand áyá, ki tum ko apní qaum banáe. 23Ab rahá maiṉ; so Ḳhudá na kare ki tumháre liye du‘á máṉgne se báz ákar Ḳhudáwand ká gunahgár ṭhahrúṉ: balki maiṉ wuhí ráh jo achchhí aur sídhí hai tum ko batáúṉgá: 24faqat itná ho, ki tum Ḳhudáwand se ḍaro, aur apne sáre dil aur sachcháí se us kí ‘ibádat karo; kyúṉki socho ki us ne tumháre liye kaise baṛe kám kiye haiṉ. 25Par agar tum ab bhí sharárat hí karte jáo, to tum aur tumhárá bádsháh donoṉ ke donoṉ nábúd kar diye jáoge.
Currently Selected:
1 Samúel 12: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)