1 Samúel 13
13
1SÁÚL tís baras kí ‘umr meṉ saltanat karne lagá, aur us se Isráílíoṉ par do baras saltanat kí. 2Phir Sáúl ne tín hazár Isráílí mard apne liye chune; un meṉ se do hazár Mukmás meṉ aur Baitel ke paháṛ par Sáúl ke sáth, aur ek hazár Binyamín ke Jibi‘ah meṉ Yúnatan ke sáth rahe: aur báqí logoṉ ko us ne ruḳhsat kiyá, ki apne apne ḍere ko jáeṉ. 3Aur Yúnatan ne Filistíoṉ kí chaukí ke sipáhíoṉ ko jo Jiba‘ meṉ the qatl kar ḍálá; aur Filistíoṉ ne yih suná. Aur Sáúl ne sáre mulk meṉ narsingá phuṉkwákar kahlá bhejá, ki ‘Ibrání log suneṉ. 4Aur sáre Isráíl ne yih kahte suná, ki Sáúl ne Filistíoṉ kí chaukí ke sipáhí már ḍále, aur yih bhí ki Isráíl se Filistíoṉ ko nafrat ho gayí hai. So log Sáúl ke píchhe chalkar Jiljál meṉ jama‘ ho gaye.
5Aur Filistí Isráílíoṉ se laṛne ko ikaṭṭhe húe; ya‘ní tís hazár rath aur chha hazár sawár, aur aise ḍher se log jaise samundar ke kanáre kí ret: so wuh chaṛh áe, aur Mukmás meṉ Baitáwan ke mashriq kí taraf ḳhaimazan húe. 6Jab baní Isráíl ne dekhá, ki wuh áfat meṉ mubtalá ho gaye, kyúṉki log pareshán the, to wuh g̣ároṉ, aur jháṛiyoṉ aur chaṭánoṉ, aur gaṛhiyoṉ, aur gaṛhoṉ meṉ já chhipe; 7aur ba‘z ‘Ibrání Yardan ke pár Jadd aur Jili‘ád ke ‘iláqe ko chale gaye. Par Sáúl Jiljál hí meṉ rahá, aur sab log káṉpte húe us ke píchhe píchhe rahe.
8Aur wuh waháṉ sát din Samúel ke muqarrara waqt ke mutábiq ṭhahrá rahá: par Samúel Jiljál meṉ na áyá; aur log us ke pás se idhar udhar ho gaye. 9Tab Sáúl ne kahá, Soḳhtaní qurbání, aur salámatí kí qurbání ko mere pás láo. So us ne soḳhtaní qurbání guzrání. 10Aur júṉhí wuh soḳhtaní qurbání guzrán chuká, to kyá dekhtá hai, ki Samúel á pahuṉchá; aur Sáúl us ke istiqbál ko niklá, táki use salám kare. 11Samúel ne púchhá, ki Tú ne kyá kiyá? Sáúl ne jawáb diyá, ki Jab maiṉ ne dekhá, ki log mere pás se idhar udhar ho gaye, aur tú ṭhahráe húe dinoṉ ke andar nahíṉ áyá, aur Filistí Mukmás meṉ jama‘ ho gaye haiṉ, 12to maiṉ ne sochá, ki Filistí Jiljál meṉ mujh par á paṛeṉge, aur maiṉ ne Ḳhudáwand ke karam ke liye ab tak du‘á bhí nahíṉ kí hai; is liye maiṉ ne majbúr hokar soḳhtaní qurbání guzrání. 13Samúel ne Sáúl se kahá, Tú ne bewuqúfí kí; tú ne Ḳhudáwand apne Ḳhudá ke hukm ko jo us ne tujhe diyá, nahíṉ máná, warna Ḳhudáwand terí saltanat baní Isráíl meṉ hamesha tak qáim rakhtá. 14Lekin ab terí saltanat qáim na rahegí; kyúṉki Ḳhudáwand ne ek shaḳhs ko jo us ke dil ke mutábiq hai, talásh kar liyá hai, aur Ḳhudáwand ne use apní qaum ká peshwá ṭhahráyá hai, is liye ki tú ne wuh bát nahíṉ mání jis ká hukm Ḳhudáwand ne tujhe diyá thá.
15Aur Samúel uṭhkar Jiljál se Binyamín ke Jibi‘ah ko gayá. Tab Sáúl ne un logoṉ ko jo us ke sáth házir the giná, aur wuh qaríban chha sau the. 16Aur Sáúl aur us ká beṭá Yúnatan, aur un ke sáth ke log, Binyamín ke Jiba‘ meṉ rahe; lekin Filistí Mukmás meṉ ḳhaimazan the. 17Aur g̣áratgar, Filistíoṉ ke lashkar meṉ se, tín g̣ol hokar nikle: ek g̣ol to Su‘ál ke ‘iláqe ko ‘Ufrah kí ráh se gayá; 18aur dúsre g̣ol ne Bait Haurún kí ráh lí; aur tísre g̣ol ne us sarhadd kí ráh lí, jis ká ruḳh wádí e Zibo‘ím kí taraf dasht ke sámne hai.
19Aur Isráíl ke sáre mulk meṉ kahíṉ luhár nahíṉ miltá thá: kyúṉki Filistíoṉ ne kahá thá, ki ‘Ibrání log apne liye talwáreṉ aur bhále na banáne páeṉ. 20So sab Isráílí apní apní phálí aur bhále aur kulháṛe, aur kudál ko tez karne ke liye Filistíoṉ ke pás játe the. 21Par kudáloṉ, aur pháliyoṉ, aur káṉṭoṉ, aur kulháṛoṉ ke liye, aur painoṉ ke durust karne ke liye wuh retí rakhte the. 22So laṛáí ke din Sáúl aur Yúnatan ke sáth ke logoṉ meṉ se kisí ke háth meṉ na to talwár thí, na bhálá; lekin Sáúl aur us ke beṭe Yúnatan ke pás to yih the. 23Aur Filistíoṉ kí chaukí ke sipáhí nikalkar Mukmás kí gháṭí ko gaye.
Currently Selected:
1 Samúel 13: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
