1 Samúel 11
11
1Tab ‘Ammoní Náhas chaṛháí karke Yabís Jili‘ád ke muqábil ḳhaimazan húá, aur Yabís ke sab logoṉ ne Náhas se kahá, Ham se ‘ahd o paimán kar le, aur ham terí ḳhidmat kareṉge. 2Tab ‘Ammoní Náhas ne un ko jawáb diyá, ki Is shart par maiṉ tum se ‘ahd karúṉgá, ki tum sab kí dahiní áṉkh nikál ḍálí jáe, aur maiṉ ise sab Israílíoṉ ke liye zillat ká nishán ṭhahráúṉ. 3Tab Yabís ke buzurgoṉ ne us se kahá, Ham ko sát din kí muhlat de, táki ham Isráíl kí sab sarhaddoṉ meṉ qásid bhejeṉ: tab agar hamárá himáyatí koí na mile, to ham tere pás nikal áeṉge. 4Aur wuh qásid Sáúl ke Jibi‘ah meṉ áe, aur unhoṉ ne logoṉ ko yih báteṉ kah sunáíṉ, aur sab log chillá chillákar rone lage. 5Aur Sáúl khet se bailoṉ ke píchhe píchhe chalá átá thá; aur Sáúl ne púchhá, ki In logoṉ ko kyá húá ki rote haiṉ? Unhoṉ ne Yabís ke logoṉ kí báteṉ use batáíṉ. 6Jab Sáúl ne yih báteṉ suníṉ, to Ḳhudá kí rúh us par názil húí, aur us ká g̣ussa niháyat bhaṛká. 7So us ne ek joṛí bail lekar un ko ṭukṛe ṭukṛe káṭá aur qásidoṉ ke háth Isráíl kí sab sarhaddoṉ meṉ bhej diyá, aur yih kahá, ki Jo koí ákar Sáúl aur Samúel ke píchhe na ho le, us ke bailoṉ se aisá hí kiyá jáegá. Aur Ḳhudáwand ká ḳhauf logoṉ par chhá gayá, aur wuh yaktan hokar nikal áe. 8Aur us ne un ko Bazaq meṉ giná; so baní Isráíl tín lákh, aur Yahúdáh ke mard tís hazár the. 9Aur unhoṉ ne un qásidoṉ se jo áe the kahá, ki Tum Yabís Jili‘ád ke logoṉ se yúṉ kahná, ki Kal, dhúp tez hone ke waqt tak, tum riháí páoge. So qásidoṉ ne jákar Yabís ke logoṉ ko ḳhabar dí; aur wuh ḳhush húe. 10Tab ahl i Yabís ne kahá, Kal ham tumháre pás áeṉge, aur jo kuchh tum ko achchhá lage hamáre sáth karná. 11Aur dúsrí subh ko Sáúl ne logoṉ ke tín g̣ol kiye; aur wuh rát ke pichhle pahar lashkar meṉ ghuskar ‘Ammoníoṉ ko qatl karne lage, yaháṉ tak ki din bahut chaṛh gayá: aur jo bach nikle, so aise tittar bittar ho gaye, ki do ádmí bhí kahíṉ ek sáth na rahe. 12Aur log Samúel se kahne lage, Kis ne yih kahá thá, ki Kyá Sáúl ham par hukúmat karegá? Un ádmíoṉ ko láo, táki ham un ko qatl kareṉ. 13Sáúl ne kahá, Áj ke din hargiz koí márá nahíṉ jáegá; is liye ki Ḳhudáwand ne Isráíl ko áj ke din riháí dí hai.
14Tab Samúel ne logoṉ se kahá, Áo, Jiljál ko chaleṉ, táki waháṉ saltanat ko naye sire se qáim kareṉ. 15Tab sab log Jiljál ko gaye; aur wahíṉ unhoṉ ne Ḳhudáwand ke huzúr Sáúl ko bádsháh banáyá; phir unhoṉ ne waháṉ Ḳhudáwand ke áge salámatí ke zabíhe zabh kiye; aur wahíṉ Sáúl aur sab Isráílí mardoṉ ne baṛí ḳhushí manáí.
Currently Selected:
1 Samúel 11: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
