Эюп 36
36
Элихунынъ сонъки лафы
Алла адалетли
1Элиху даа бойле сёзлерни къошты:
2– Бираз бекле, санъа бир шей айтаджагъым,
Алланынъ Адындан бир къач сёзюм бар.
3Лафымны узакътан башлайджагъым,
Яратыджыма акъ береджегим.
4 #
Эюп 37.16
Керчектен де, сёзлерим ялан дегиль,
огюнъде энъ бильгили адам бар.
5Мына, Алла буюктир,
ве О, кимсени хорламаз.
Буюк Алла эр шейни анълай.
6 #
Эюп 34.28
О, яман адамларны сагъ къалдырмаз,
хорлангъанларгъа адалет косьтерир.
7 #
1 Пад 2.8; Збр 33.16 Козьлерини догъру адамлардан айырмаз,
оларны юксельтир
ве падишалар оларакъ эбедиен тахткъа отуртыр.
8 #
Збр 106.10
Эгер олар зынджырларнен багъланып,
бахытсызлыкъ йиплеринде тутулсалар,
9оларгъа япкъан ишлерини,
акъсыз япкъанларыны ве къопайлыгъыны косьтерир,
10 #
Эюп 33.16
беля ёлундан къайтсынлар деп,
огютлерине къулакъларыны ачар.
11Эгер Оны динълеп, Онъа хызмет этселер,
къалгъан куньлери яхшы
ве йыллары татлы олурлар.
12 #
Эюп 4.21; Еш 1.19-20 Амма Оны динълемеселер,
къылычтан олерлер#36.12 Я да «озен оларнынъ омюрлерини олюмге алып кетер». Даа 33.18 бакъ.,
бильгисиз адамлар дайын гъайып олурлар.
13Алласыз адамларнынъ юреклери ачувгъа толу,
Алла оларны къыйналувнен багълагъанда,
Ондан ярдым истемезлер.
14Шунынъ ичюн яшлыкъ вакътында олип кетерлер,
омюрлери де путхане янында,
ороспуларнынъ арасында сонъуна етер.
15Амма Алла заваллыларны белядан къуртарыр,
сыкъынты вакътында олар Оны эшитир.
16 #
Збр 4.2
Сени де сыкъынтыдан тар олмагъан кениш бир ерге
чекип чыкъарыр эди,
софранъа къоюлгъан ашларынъ бол-берекетли олур эди.
17Сен яман адамларнынъ джезасыны толусынен алдынъ,
къарар ве суд башынъа тюшти.
18Эгер сенинъ мыскъылларынъ чокълашса,
Алланынъ хышымы башынъа тюшер,
ве буюк къапар биле сени къуртармаз#36.18 Я да «Гъазапкъа сени мыскъылджыгъа чевирмеге ёл берме, буюк къапаргъа сени ёлдан урмагъа ёл берме»..
19 #
Збр 48.8; Икм 11.4 Башынъ белягъа къалмайып,
сап-сагълам олгъанынъда,
ярдым сорап ялвараджанъмы?
20Халкъларны апансыздан
къыраджакъ геджени истеме.
21Яманлыкъкъа урулмакътан къачын –
башынъа сынавлар бошуна тюшюрильмеген.
Алланынъ буюклиги
22Алланынъ къудрети не буюк!
Онынъ киби оджа бармы?
23Ким Онъа не япмагъа айтып олур?
Ким Онъа: «Сен акъсызлыкъ эттинъ», – деп олур?
24Онынъ ишлерини, адамлар тюркюлеринде йырлагъан ишлерини
макътамагъа унутма.
25Эписи адамлар оларны корелер,
адам оларны узакътан корьмек мумкюн.
26 #
Збр 101.28
Мына, Алла буюк,
ве биз Оны бутюнлей анълап оламаймыз,
йырларынынъ сайысы эсапланмаз.
27 #
Икм 3.20
О, сув тамчыларыны топлай
ве оларны туманда ягъмургъа чевире;
28олар булутлардан тамчылап,
адамларнынъ устюне боллукънен ягъа.
29Булутларнынъ джайгъаныны,
Алла булунгъан коклернинъ гудюрдисини ким анълап олур?
30Мына, О, оларнынъ устюне Озь ярыгъыны джайрата
ве денъизнинъ тюбюни къаранлыкънен къаплай.
31Оларнынъ ярдымынен Алла халкъларны суд эте,
оларгъа бол-берекет ашны бере.
32 #
Хав 3.4
Йылдырымны къолларында тута,
не ерге урмагъа буюра.
33Гудюрдилер Онынъ акъкъында хабер берелер,
айванлар биле боран якъынлашкъаныны сезелер.
Currently Selected:
Эюп 36: CTB
Highlight
Copy
Compare
Share
Want to have your highlights saved across all your devices? Sign up or sign in
© Институт перевода Библии, 2016
