Kata Lom 12

Buloŋ buwunkul li Yéesu Kilisita

1Kutuyom, emmuu Ateemit lababbaj li alolaal káyiyen káamak, ínje ummu kama li kawankulenuul min jisenool siniilasu sooluul saloŋumuu min silako kasila kanabe ban li kúsuumool. Muñowu jóotimuu jikaan min jimanen Ateemit li mal̥egen. 2Jakum jinab li bakaanelabu bata bukanabuku kata adunaayi inye, bale jikat Ateemit min akaanuul jilako bukan kábuto ban li asenuul butuuko buwunkul. Akaanuulumuu loon muñaˈa aban, fan jiyili jikooñaam min jihaas waa lafañumuu: wahawu wajakumuu, wahawu wásuumoolumuu, li wáliiŋumuu máliiŋ loon afañumuu.

3Boot min ilobuul humum hata kájiyaku kan Ateemit asenommuu eenuul: Jakum an li bukuluul atebenoolo ajow áliiŋ tan áliiŋut, bale jiwalenoolo li mayineluul, naboo li buu Ateemit aliikumuu káyinenaku kan asenuulumuu kule. 4Li mal̥egenamu, anoowan li alolaal labaje eniil yano. Eniilayi inyu ebaje wah wameeŋe, ban wah wanoowan wata yo ubaje bulokabu bata wo. 5Li manolamu, maayeet min umeeŋaalumuu, bale loonowaasoono eniil yano li hujokoolahu hoololaal li Kilisita, ban alolaal foofolaal feh lujokoolaajokoo loon wahawu feh wata eniil yano ujokoomuu. 6Lubajaale úji wábutoole wan Ateemit asenolaamuu, ban anoowan li alolaal laate aŋa’ koola min alok. Nokoomuu loon an li alolaal abaje káji kata min alob kulim kan Ateemit asenool, laate akaan mo naboo li káyinenaku. 7Li bil nokoo loon an abaje káji kata bulok boot li bukanabuku, li akaan bo. An li abaj káji kata kaliiken wah bukan, li aliikeniil wo. 8Li nokoo loon an abaje káji kata kawankulen bukan, li awankuleniil. An li abaj káji kata naak kasen bukan wah, jakum anaak atii baseniil wo. Li bil nokoo loon an abaje káji kata kaaken ésuk, li ajooŋoo to min ajokiil jak. An li abaj káji kata káyiyen bukan, li akaan mo li ésuumansuum ló.

9Jíbooliwoo li mal̥egen. Jitey majakut, ban kayinooluul feh li kulako kakaan majake. 10Jíbooliwoo loon batuyaay bafañoole ŋáa’. Jihanken min jisuuwoo. 11Jikaan bukan kajasowe, jakum jilako bukan káfal̥e. Jilok súf boot li Amaaŋenawu li buyinumuul feh. 12Jibaj ésuumansuum humum hata kákangumaku kooluul. Jímuñ bukuluul li sílaam. Jijooŋoo to li kal̥awaku. 13Jilamben bukanabuku kata Ateemit kan jokiilumuu li wah, ban li jinaak jiyab bukan booluul.

14Jil̥aw Ateemit min ásooniyen bukanabuku kálaamenewuulumuu. Jil̥awool min ásooniyeniil. Jakum jil̥awool min akaaniil majakut. 15Jilako li ésuumansuum li bukanabuku kabajumuu ésuumansuum. Jil̥ok li bukanabuku kammuu li jíl̥ok. 16Jijokoo jile keb. Jakum jikaan bukan kayilo háamaketo, bale jiŋa’ uyinumuul jikaan li wah walewoo to. Jakum jijokoolo bukan kájallowe.

17Jakum an akaani majakut, li uluken. Jiŋes kakaan majake man bukanabuku feh koote kusal. 18Nokoomuu loon kayiliwuma, ban li ñooluul bale, jiloŋ li kásuumaay li bukanabuku feh. 19Kufaalom kan iboolaat, jakum an akaanuul wah wajakut li jilukenoolo bukuluul humumuul, bale jikat etindihuuñayi yata Ateemit min ekaan bulokabu bata yo, mata li Bakiicelabu Amaaŋenawu lansaan ló: «Injé ilukenemuu, ínje icaamemuu#Dótelonom 32:35.» 20Amaaŋenawu lansaan foof: «Alatoolayi acaaletumuu, li usenool atiñ. Li bil nokoo loon bahob bujokool, li usenool ahob, mata ukaanumuu alatoolayi loon muñaˈa, fan nokoo loon kujek káwake lúwomenulo ukaanool li húkow#Kúlobuwaku 25:21-22.» 21Jakum ukat majakutamu min muheeki, bale uŋa’ majakaamu min uheek majakutamu.

Currently Selected:

Kata Lom 12: cskDBL

Highlight

Copy