Kata Lom 13

Jítuul huhaane hanoohan

1Anoowan laate átuul huhaane hanoohan, mata bajut huhaane habilumuloot li Ateemit. Kuhaanaaku káami tomuu, Ateemit akaan ko to. 2Mó mújimuu an áhoogulumuu huhaane, láhooguuhoogul hul̥uulahu han Ateemit akaan tomuu. Bukanabuku kátuuleliitumuu kuhaanaaku fan kutiibi min kubaj katek. 3Li mal̥egenamu, an akaane majake aatut ákoli kutiibaabuku, bale bukanabuku kakaanemuu majakut koote kúkoliyiil. Waa ufañut min úkoli an aake huhaane? Kama ukaan majake min úbajum kasal li akila. 4Li mal̥egenamu, an aake huhaane, bulok láami li bo boot li Ateemit boot li majakaamu mooli. Bale ukaanumuu majakut, loote úkoliwool, mata sembaasu san abajumuu boot katek an akaane majakut, let boot maayiiñ. An aake huhaane, aloka laam ata Ateemit boot káhiis an akaane majakut etindihuuñayi yata Ateemit. 5Wahawu unwu újimuu, joote jítuul bukanabuku kaakumuu kuhaanaaku. Jikaan momuu, let jilo li katekaku kata Ateemit, ban fan jihaas li uyinumuul joon jikankaan jak.

6Wahawu unwu újimuu foof li jinaak jihal. Li mal̥egenamu, bukanabuku kayabemuu búhalabu kuloka koom kata Ateemit boot kakaan bulokabu umbu. 7Jisen anoowan wahawu wan atookumuu min abaj: Jisen búhalabu anawu an jóotimuu jisen bo, li jisen júutiyayi anawu an jóotimuu jisen yo. Jiluuken an an jóotiye jiluuken, li jisal an atooke kasal.

Ubóolimuu bukan, lukankaan loon eluwaayi yata Ateemit elobumuu

8Jakum jooken an ecaagen. Ecaagenayi yan jóotimuu jookoo yo yommuu jíbooliwoo. An áboolimuu bukan, lakankaan wahawu feh wan eluwaayi elobumuu. 9Li mal̥egenamu, siluwaasu saanumuu: «Jakum uhinto li an an jiyabowut, jakum umuk an, jakum úkuwet, jakum úsiibo jata an,» li foof siluwa saasu feh, li eluwaayi inye yanolayi soom foof so feh: «Ubóoli afaali an loon awu humumi úbooliwoolomuu.» 10An áboolimuu an, let akaanool majakut. Ubóolimuu bukan, kama lukankaan loon eluwaayi elobumuu feh.

Lootaale ufaleyaal boot li ebilayi yata Kilisita

11Bukuluul jihaase taŋ buu loomaalumuu li yo: waatuwayi éliiŋe mín jíliwo li kámooliyaku kooluul. Li mal̥egenamu, muñeˈe kafakaku kuhaŋe makoojolaal, li taŋayi nan útoŋaalumuu úyinenaal li Kilisita. 12Hukahu huyiiliye, muñeˈe banakabu li búkatenul. Uhoyaal wahawu wakaaneyimuu li élim, min utebaal ujunkowawu waŋaleyimuu min tiik tihunak. 13Uloŋaal buloŋ bacole loon loŋemuu tihunak. Jakum unaak utiñaal ujow uwuuhenaal, jakum unaak úkaliyenoolaal, jakum unaak uhintowaal li aletalet, jakum úkaanikoolaal, jakum unaak úmuyutenoolaal, jakum baj batahaay li ololaal. 14Jiŋa’ bóonowabu bata Amaaŋenawu, ban jakum jikat bóonowabu bata eniilayi min buŋaluul bubet li kásiibowaku kata yo.

Currently Selected:

Kata Lom 13: cskDBL

Highlight

Copy