Kata Lom 11
11
Ateemit abetenut kata Isilayeel
1Kama boot min igel̥l̥en een: Waa Ateemit labetembeten kata Isilayeel kammuu ésukayi yoola? Maayeet! Abetenutiil. Injé humumom an ata Isilayeel leem, bubukoolum bata Abulaham, ban li kalandaku kata Bayiseme lífulumulo. 2Ateemit abetenut ésukayi yoola yan akila humumool al̥us nomuu ákibben. Manooman bukuluul humumuul jihaase waa Ateemit alobumuu li Bakiicelabu aya li Elí, nan al̥okoomuu mata kata Isilayeel asenool. 3Elí lansaan: «Amaaŋen, kumuumuk kufulofetaku kooli. Injé balewom isaŋowe, ban kumbuku li huŋes min kumukom#1 Kúyiiyaku 19:10, 14.» 4Bale Ateemit buu lalobool? Laanoosaan: «Likaakat to bukan koono sínjunne hutok li síl̥uba boot lí ínje, kákuntuŋut hákil Baal#11:4 Baal ateemit ata bukanabuku kakin nomuu li etaamayi yata Kanaan. Alet ateemit ata mal̥egen#1 Kúyiiyaku 19:18.» 5Li manolamu, li taŋayi yan oomaalumee foof, saŋosaŋo bukan kan Ateemit al̥use humum hata kájiyaku koola. 6Lal̥usiil̥us humum hata kájiyaku koola, let bakaanelabu booliil bújiye. Letumuu mo, kama kájiyaku kata Ateemit let kulako káji kata mal̥egen.
7Kama boot min oonaal buu? Bukanabuku kata Isilayeel kujukut wahawu wan kulakomuu huŋesahu. Bukanabuku kan Ateemit al̥usumuu li buko, buko bale kubaj womuu. Bukan kaabuku Ateemit lal̥aal̥enl̥aal̥en uyinumawu wooliil. 8Loon Bakiicelabu bulobumuu:
«Ateemit lábakembaken uyinumawu wooliil,
láhihhi’ kúkilaku kooliil kujukum,
lí áhi’ sijanasu sooliil síjamum, boot yok síyaat#Dótelonom 29:3.»
9Ayíiyawu Dayit li aan foof:
«Hutiñahu hooliil hujow hulako enkoliñen boot li buko,
embaal boot li buko.
Hutiñahu hooliil hujow hulako foof wah wáami li újiyiil li kulo,
li hulako katek boot li buko.
10Kúkilaku kooliil kujow kúlim,
jakum bil kunaak kujuk,
ban li ukaaniil kunaak kúkonkoloŋo boot nanoonan#Ukijenawu 69:23-24.»
11Muñeˈe li igel̥l̥en een: Mantee nan kusuwifaku kujontenumuu, kulolo hulo hata kale? Maayeet! Kulowut hulo hata kale. Bale bafetabu booliil bújimuu bukanabuku kaletumuu kusuwif li kubaj kafak, min jí kusuwifaku li kutahaay. 12Ban nokoomuu loon hubajahu hata adunaayi hubilumbilum li bafetabu bata kusuwifaku, ban hubajahu hata bukanabuku kaletumuu kusuwif li hubilum li hulowahu hooliil, kama nan kusuwifaku foofiil feh kommuu li kufak, inti hubajahu fan huhaŋ maluuk?
Kafakaku kata bukanabuku kaletumuu kusuwif
13Muñeˈe boot min ilob li bukuluul jaletumuu kusuwif. Emmuu ínje afootal leem ata bukanabuku kaletumuu kusuwif, kama boot min íhiis máyiineniyamu mata bulokabu búmbaam. 14Iyiliyeenumuu ikaan mo, fan íji kukee li bukanabuku kammuu kusuwif loon ínje li kutahaay, min ífakenum tó kukee li buko. 15Li mal̥egenamu, nan Ateemit akaanumuu kusuwifaku li kakaŋ, adunaayi ebabbaj hujamoo li akila. Muñeˈe waa wóomi li ubaj nan Ateemit ammuu li alaañen ayabiil? Fan lako bukanabuku kaketumuu fan kúlaañul li buloŋabu.
16Nokoomuu loon hukiibahu hútinaalahu hata emaanaayi husenisen Ateemit, kama emaanaayi foof yo feh yoola. Li bil nokoo loon kuhaa’ kata bunuunuken kóomi kata Ateemit, kama waanawu feh wata bunuunukenabu woola foof. 17Bukanabuku kata Isilayeel kunokoonokoo loon bunuunuken ban koone óliibiye bal̥uki, ban Ateemit li afalen waan wakee wata bo. Awu jaletumuu asuwif li unokoo li kaan kata bunuunukenabu umbu ban koonemuu óliibiye bata li bujal. Ateemit li aŋali ajow akoten li kújonkoonaku kata waanawu wafalenimuu wata búwoliibiyaabu bal̥ukimuu. Muñeˈe luyilo úloŋum li waanawu unwu li húsimahu habilummuu li kuhaalaku kata búwoliibiyaabu umbu bal̥ukimuu. 18Mó mújimuu, jakum usaloolo hákil waanawu wafalenimuu. Nokoomuu loon boot min usaloolo, uwayil̥o oon let awu humumi utebe huhaalahu, bale huhaalahu hutebi.
19Manooman nakee fan oonom: «Waanawu unwu ufalenifalen bájum ínje li ikoteni to.» 20To mal̥egen. Waanawu unwu ufalenifalen mata ubajut káyinen, min awu óomi tan waanawu ulakoweenumuu humum hata káyinenaku kooli, bale jakum utebenoolo li kayinooli. Loote kama ubaj ekole. 21Ateemit, afanumuu afalen waanawu wata búwoliibiyaabu bal̥ukimuu wammuu kusuwifaku, layilo foof afaleni abeten awu jammuu jaan jata búwoliibiye bata li bujal. 22Muñeˈe kama ujuke min ujuk buu Ateemit ásuumumuu ban li átaañi foof. Látaañitaañimuu li bukanabuku kalomuu, min ásuum li awu. Loote kama útuk lit li másuumamu moola. Ukaanut momuu, awu foof fan afaleni abeten. 23Kusuwifaku kukatumuu káyinenaatiyaku kooliil min kúyinen, Ateemit fan akoteniil tan kulakoweenemmuu. Ateemit layilo alaañen akoteniil. 24Li mal̥egenamu, awu jaan loom jata bunuunukenabu ban koonemuu óliibiye bata li bujal, dán Ateemit áfalenumulimuu abil akoten li búwoliibiyaabu bal̥ukimuu, ban inti mo fin kaane. Bale kusuwifaku buko kufimmuu min koono waanawu wata búwoliibiyaabu bal̥ukimuu. Mó mújimuu, Ateemit layilo alaañen akoteniil li bunuunukenabu bafimmuu min boono booliil, ban let hul.
Bukanabuku kata Isilayeel fan kubil kufak li húbanumahu
25Kutuyom, lifañe min ikaanuul min jihaas wahawu wayolomuu wan Ateemit afañumuu min akaan, jakum bil jijokoolo loon bukan kájallowe: bugeb bakee bata kata Isilayeel fan buhoy kale báyinen li Ateemit boot yok nan bukanabuku feh kaletumuu kusuwif kóotimuu kufak. 26No unnu, no bukanabuku kata Isilayeel foofiil feh kommuu li kufak loon bakiicelabu bulobumuu:
«Afakenaawu fan áfulumul Siyoŋ#11:26 Siyoŋ: yo yommuu Yeelusalem,
fan akaan min baj kákoli Ateemit
li bubukoolumabu bata Sakob,
27 Húfaalumahu unhu léemimuu li ijokoo li buko,
nan emmuu li ífulen uhoofoolawu wooliil#Esay 59:20-21.»
28Ujukelaamuu li kahoyaku kan kata Isilayeel kuhoyumuu Hulimahu Hásuumaahu, koonosoono kulatoola kata Ateemit boot li majake mooluul, bale ujukelaamuu li bamanabu ban Ateemit amanumuu, koonosoono bukan kan Ateemit aloŋe li afañ humum hata situubayiil sihaan. 29Li mal̥egenamu, Ateemit ásenoliit wah aban li alaañen ayab wo, ban foof ábetoliit búsol bukan kan ahooñe. 30Naanaŋ bukuluul jítuulut Ateemit, bale muñeˈe Ateemit láyiyenuuyiyen mata kusuwifaku kútuulutool. 31Li manolamu, buko foof muñeˈe kútuulut Ateemit mantee Ateemit li áyiyenuul. Kama muñeˈe buko foof Ateemit layilo áyiyeniil. 32Ateemit lakaakat bukanabuku feh min kuhoy bátuulool, mantee li áhiis káyiyenaku koola bukanabuku feh.
Maluukamu mata Ateemit
33Mo hubajahu hata Ateemit hukite huluuk! Mó bújallowabu boola bukite buluuk! Mo ehaasemiñayi yoola foof ekite eluuk! Bajut an ayilo ahaas batiibelabu boola, an foof ayilaat ánaanum bakaanelabu boola. 34Loon Bakiicelabu bulobumuu:
«Ayimaa ahaase kayinoolaku kata Amaaŋenawu?
Ayimaa ayilo alako asaabaawu oola?#Esay 40:13
35Ayimaa abile ajand asenool wah ukee,
min anawu ummu áyabum bacaam li akila?#Sob 41:3»
36Li mal̥egenamu, wahawu feh li akila ubilume, li akila úloŋume, ban boot li akila humumool. Máyiineniyamu mujow mulako mata Ateemit boot nanoonan! Aameen.
Currently Selected:
Kata Lom 11: cskDBL
Highlight
Share
Copy

Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.